[惡搞無極限] 就係咁，我同幾個豬朋上左大陸獵金: ２３２　前面兩位阿婆企係度

「咁……咁我地仲跟唔跟落去好？」聽到方瀡既說話後，我問佢。

而方瀡向我笑一笑，再望向前方果陣，就話：「頭先本來想答你佢地都唔拆穿我地的話，就跟落去，但係，而家人都唔見左，仲跟黎做咩。」

我聽到方瀡既說話後，望一望前方，舅父同果位老前輩又真係唔見左ＷＯ。

「咁……」正當我想講放棄既說話果陣，阿欣就好大聲咁講：「佢地無唔見到啊，佢地係果邊啊。」阿欣，我地跟蹤緊，妳見到佢地唔駛咁大聲架ＷＯ。

「係邊啊？」我問。





「果邊啊。」阿欣拍向兩個人既背影，我地望過去後，我第一時間就話阿欣：「阿欣，你未玩啦，果兩個人睇背影就知係兩個老婆婆啦。」

「我頭先見住佢地換左阿婆既衫架。」阿欣用一個好肯定既語氣話，而我地幾個就用一個難以置估既表情望住果兩個阿婆。

而果兩個阿婆好似聽到阿欣既說話，停左停，而方瀡就向果兩位阿婆講：「前面那兩位老婆婆，可以麻煩一下看看這裡嗎？」

兩位婆婆貌似轉身，但轉到一半，就拔足狂奔。

「都話係佢地架啦，阿婆又點會跑得咁快。」阿欣講完之後就衝左過去。





方瀡笑左一笑，「香港既警察真係勁。」然後都追左上去。

而阿妹見到阿欣同方瀡已經追左上去，都唔敢慢落黎，仲同我講：「阿哥，做咩發呆啊，一齊追啦。」

「係……」我發呆，係估唔到平時係我面前咁麻甩佬既舅父，今日竟然係我面前著阿婆既衫。