[惡搞無極限] 就係咁，我同幾個豬朋上左大陸獵金: ２５２　關你Ｘ事

「老前輩我唔係想阻你地相認，但我都想知道我阿爸之後既事，我諗阿妹都好想知道。」我對住眼前已經攬左阿妹成二幾分鐘意老前輩講。

「係啊，外公，到底阿爸之後發生左Ｄ咩事，係邊個害佢既，你同我講，我一定要報仇。」阿妹話，估唔到阿妹到而家都係諗住報仇既事。

老前輩嘆一嘆氣，「那是一個我一生中都忘不了的夜。」

———————————————回惰線出沒注意———————————————————

大半日同平叔講可兒既事，仲同佢講個傻妹因為鐘意食某個品牌既零食，所以就改左個同果個品牌一樣既名，平叔聽到後不知笑得幾開心。





我真係無諗過，今次既著草竟然可以比我見到泙兒既阿爸，可能，呢個係上天係我死前比我既驚喜。

如果，我既直覺出錯就好，因為送死既感覺，每日都放大，就好似有個死神係我身後面，拎住鐮刀架係我條頸度，隨便向後一拉，就會拎左我條命

「對了，泙兒現在怎樣？」平返既問題，令我從新進入認真既狀態，「我已經叫左朋友搵人去睇住佢地，希望無事啦。」

平叔只係嘆一嘆氣，「那個長恨哥，就像他的名字一樣，恨，那個人被他恨，他到得要那個人死，而且還要禍連家人。」

「對不起。」我對平叔話，而平叔就搖一搖手講：「這些事都是我女兒選擇，怪不了誰，一切都有定數，就讓我在這個時間跟你相預，也是一樣。」





我聽到佢咁講後，點一點頭，而平叔又再問：「這次他要害的人，有多少？」

我將長恨哥既目標一個又一個話左比平叔聽，而平叔就話：「要麼你死，要不是他們。」

「係啊。」我笑左笑，「你到這個時候還笑得出來？」平叔問。

係囉，唔知點解，係呢個時刻我竟然可以咁輕鬆……應該係話，我未試過咁輕鬆，「可能，因為我覺我已經不枉此生，好野又食過，嘆又嘆過，識左咁多好兄弟，有兩位刎頸之交，有兩個好愛既女人，有一仔一女，事業上又成功過，江湖上又有Ｄ地位，人生如此，夫復何求。」

「但是，這些都讓你踏上了絕路，不是嗎？你真的沒有後悔過？」平叔問。





「我從來唔會為自己做過既野而後悔，我只會後悔自己無去做。」我笑住又講我呢句人生座右銘。

「好樣的，我知道為甚麼我女兒會看上你了。」平叔話。

我聽到佢咁講後大笑左幾聲，然後問左個唔關於頭先所講既野：「平叔，你同果個阿寶係咩野關係？點解見你地兩個相處間，好似有Ｄ唔同？」

平叔望一望我，講左句令我笑到仆街既廣東話：「關你撚事咩。」

係係係，咁我唔問囉。