[惡搞無極限] 就係咁，我同幾個豬朋上左大陸獵金: ２６２　結局會係點？

舅父講完個真相後，全場靜晒……我真係、真係無諗到，原來令到阿爸死既人，係……

我而家，諗返起十四歲果年，嫲嫲話阿爸係比人害死，佢神志不清時仲會講係阿媽害死阿爸，原來，係真架……

我成個人無力咁坐左係個位度，我望住阿妹，佢用雙手好用力咁掩住個口，好似，唔想比我聽到佢係度大喊咁，又可能，佢係驚訝到，唔知講Ｄ咩好。

阿欣佢都好驚訝，佢好似眼神失左焦一樣，只係望住一個地方呆左，而阿妹就係呢個時候，嘗試問果位老前輩，因為佢喊到，係連野都講唔到，「外公……係未真架？」

老前輩只可以無奈咁點一點頭，然後話：「那天早上我沒有在場，不過我聽到這個消息，都跟你們現在一樣。」





舅父呢個時候嘆一嘆氣，而大寶見到我地愁雲慘霧咁，都被感染開始大喊，舅父企左起身，行左去大寶既身邊，安撫住佢邊同我地講：「最後大寶救返，但因為打中既係佢既頭，腦部受損，醫返後就變左成個細佬仔咁。」

無力既我而家先抬起頭望住舅父，而佢話：「賢仔，你知道我點解唔話比你地知，你阿爸係點死未。」

我望住舅父，深切咁明白佢點解將叱件事隱瞞咁耐，原來，佢一直都承擔住咁多事。

仲喊緊既阿妹呢個時間問舅父：「咁之後點啊？長恨哥呢？」

舅父吸左啖氣之後話：「之後既事，就要講另一個人，一個叫阿碇既人，而家每個人都叫佢做碇司令。」





「碇司令！？」我好驚訝地講左呢三個字，但阿妹就用一個早就知道既表情望住舅父。

碇司令，我點會唔記得佢，就係佢放左四本回鄉證係我個肚入面，差Ｄ整到我死。

「碇司令！！！」阿妹咬牙切齒咁話：「我果然無估錯！不枉我係你身邊潛伏左咁耐！」

舅父無理到阿妹既咬牙切齒，佢只係繼續講：「之後果個叫阿碇既男人出現，佢係我地面前將長恨哥殺左，仍仲好陰險咁對住我地笑，就話：『計劃成功。』佢落下呢一句後就消失左，任我地點搵都搵唔到，止於之後老方搵人去搵泙兒同可兒既時後，發現已經……」

「太遲拿……」阿妹接住舅父既話：「碇司令一早安排左人捉我地，而且，仲係用一個好慘烈既方法……」





「屠村。」舅父呢兩個字重重咁打入我既腦海入面，而阿妹就繼續接話：「佢不停咁殺村民，迫媽媽佢出去，最去媽媽見到咁多人為左佢而死，就叫我搵個佢地搵唔到既地方，然後衝左出去……」阿妹一路講，一路喊，「媽媽……媽媽佢係佢地面前自殺……我……我望住媽媽死……救唔到佢……」

我終於明白，點解阿妹佢一直都想報仇。

跟住，好耐無講過野既方中瀡就話：「果位碇司令後來好快就接管晒長恨哥既野，仲殺左好幾個大哥，獨霸一方，但除左呢度佢占令唔到外。」

「當然，當年我跟它方拼死護住這裡，好幾年後他才放棄這裡的主意。」老前輩話。

方中瀡行到我面前，然後話：「雖然真相已經查出，但結局，就要由你同你阿妹話事。」

我聽完佢講後，望一望而家仲喊緊既阿妹，而阿妹咁岩都望住我，究竟，阿妹知道殺左我地阿爸既人，係我阿媽後，佢，會點諗。