所有事都好似簡單地落幕,舅父呢個不能說的秘密終於講左出黎,行出公安局,我成個腦仲係空盪盪。

「姑良,多少錢?」大寶仍然係好傻咁講住呢一句,但我地聽完個秘密後就唔覺得怪,仲覺得佢有d可憐。

而老前輩就行到我同阿妹面前,語重心長咁話:「希望你們兩個,可以像爸爸一樣,做完任何事都不會後悔。」

我地兩個,點一點頭。

目送佢同大寶走左之後,舅父無咩點講野,方中瀡就伸左個懶腰後話:「都話左查案有時要睇運氣。」佢好似放下心頭大石咁。





佢安排左公安車送我地返去方叔叔度,而一返到去,方叔叔就不停問我地去邊,我只係記得,舅父同方叔叔咬完耳仔後,就無左問我去左邊。

返到房,訓左係床上面,唔知點解總覺得,呢一晚過得好耐,就好似好幾年咁,我亦都因為呢一晚,先清楚我爸爸係個點樣既人。

阿欣佢無返自己房,佢留左係度陪我,佢攬到我好實,但就無講過任何說話,直到,我問佢:「妳覺得,如果我唔話比媽媽聽,好唔好?」

阿欣佢答我:「只要你覺得個選擇唔會令你後悔,咁就得拿。」

「嗯。」我點一點頭,然後話:「我想……自己一個靜下。」





阿欣佢鬆開左手,然後錫左我一啖後話:「你需要人既時候,我一定會係度。」

我,向佢微笑左一下。

阿欣走左後,我都無繼續留係房入面,走出房,今日既走廊就好似我既心情一樣,空盪盪,我企左係一個窗前,望住個天,今日,個天一粒星都無。

「賢仔,咁夜仲唔訓?」係舅父,佢係我身後面問我。

我望一望舅父,然後話:「點會訓得著。」





「你係未怕唔知以後點面對阿媽?」舅父問,而我就搖搖頭答佢:「其實聽你話我知,阿媽係一個不知情既情況下先錯手打死阿爸,我知道佢一d都唔想咁,所以,我無怪阿媽……只不過……」

「不過咩野?」舅父問。

「我應唔應該將個真相話比阿媽知道?」我問舅父,但係舅父無講任何野,只係陪我一齊望住一粒星都無既夜空。

過左一陣,「咁好慶致出黎睇天空啊。」係方中瀡,佢行左去我地身邊,笑而不語,而我就問佢:「方中瀡,你已經知道左真相,咁……你係未會拉我阿媽?」

方中瀡只係笑左笑,然後話:「我查呢單案,係為興趣,而唔係為左破案,有時,查案唔係拉到人就等於破案,而係知道真相後,所做既野先會代表果單案破左未。」

「下?」我不解咁答佢,而佢又係笑一笑話:「總之,單案係我既層面已經破左,我係唔會拉你阿媽,不過係你地既層面,我就唔知破左未,不過我可以比個建議,有時,大話講一世,係一件好事。」

方中瀡講完呢句就離開左,又剩低我同舅父兩個人。

「舅父,我決定左。」我好認真咁同舅父講:「以後,就由我同你兩個一齊,去保守呢個秘密。」





舅父聽到我咁講後,好感動咁流下眼淚,而我就對住舅父鞠左個躬話:「舅父,咁多年黎,辛苦你拿。」
已有 0 人追稿