[惡搞無極限] 就係咁，我同幾個豬朋上左大陸獵金: ２６８　行動

同我諗既一樣，我果兩個兄弟一聽到真係有金，即刻搖成尾話要去搵批金出黎，我就同佢地兩個講，話佢地都上左黎咁耐，唔駛返工咩？屋企人唔會擔心咩？

點知佢地兩個講……

「返到去又要做返隻狗幫老闆食埋晒Ｄ屎，點解我唔駁下啊。」阿倫話。

而阿輝就講：「我上黎前屋企人叫我玩耐Ｄ都唔緊要，最好唔返去添ＷＯ，仲話唔知咩野遠Ｄ啦去。」我諗佢地係同阿輝講死就死遠Ｄ啦。

佢地都講到咁，即係無方法說服佢地啦。





而至於阿俊，佢就一副處之泰然咁話：「無所謂。」

唔通，係佢熱情冷卻左，我好記得一開始最想去搵果批金既人，應該係佢架。

唔知點解，阿倫同阿輝都用一個好敵仇既目光望住阿俊，不過阿俊就好少理，講左一句就走左，「你地準備出發叫埋我。」

究竟，係我同阿妹搵阿爸既死因果陣，佢地發生左Ｄ咩野事？而呢一個問題好快就有答案。

「都唔知佢先前搵果Ｄ人係咩野人。」阿倫好老實不客氣咁話。





「果Ｄ人？」我問佢。

「係啊，拍晒膀頭架佢地，阿俊仲一路聽佢地講野，一路點晒頭。」阿輝補充，而阿妹聽到佢地兩個咁講後，就話：「阿哥，駛唔駛我跟下佢，睇下佢發生Ｄ咩事？」

每個人都有佢自己既秘密，唔通阿俊有Ｄ野收埋唔想比我地知道，跟唔跟佢去呢？但係我有其他人更想阿妹陪我去做架ＷＯ。

「唔駛拿，我想妳同我去搵大寶舅父，問下佢會唔會記得阿爸比佢果五封遺書放左係邊。」我話，雖然我知道大寶佢記起既可能性好渺茫，但都想去試一試。

阿妹聽到我咁講後，就話：「好啊。」





而阿欣呢個時候就嬲嬲地講：「你地兩個有得去玩唔叫我，有無搞錯。」

係ＷＯ，差Ｄ唔記得左佢都係度添，比Ｄ咩野佢做好呢，「阿欣啊，上次妳同我地玩跟蹤未瓦得好叻既。」

「你都覺得我好叻啊。」阿欣笑得好天真咁話。

「係啊，咁不如妳幫我去跟阿俊好唔好啊？」我用哄細路女既語氣講。

「好啊！」阿欣就好歡喜雀躍咁話。

「但真係唔好比佢發現ＷＯ，唔係妳就輸架件。」我叮囑佢，而阿欣就好似個小朋友細細聲咁講：「知道……」

其實阿欣又時候都幾可愛下。

「咁阿哥你想幾時去搵大寶舅父？」阿妹問。





「就而家啦。」我望住阿倫同阿輝，「你地兩個都跟埋去。」

「下，咁辛苦既野我唔做架。」呢兩條友仔我遲早打鑊佢地。