[惡搞無極限] 就係咁，我同幾個豬朋上左大陸獵金: ３５２　有幾奇

（尋日太忙無更新，今日連放兩話，大家記得睇返３５２既「補返更新」啊）

花木蘭講完之後坐係阿欣旁邊，阿欣成個人好似好緊張既貓仔咁，而花木蘭就望住我話：「我答應大寶幫佢保管封遺書，如果唔係似相人面果個女人既人同埋大寶黎拎返，我係唔會比佢。」

佢用一副高高在上既姿態望住我，呢種姿態就似一個好老練既男人咁，然後佢一手攬住阿欣話：「除非，你一係比你條女我。」

我聽到佢咁講後，眼定定望住佢，而勞斯萊斯就話：「耶～妳咁花心架～係都揀我啦～」

「一陣先揀你下，ＢＢ豬～」呢一句ＢＢ豬就係聽到我打晒冷震。





而我就問花木蘭：「呢個係妳開出黎既條件？」

「係啊，你條友有無咁蠢啊。」佢講完後，我就一杯酒潑去佢度，「妳傻撚左啊！佢係我條女黎架！我點會比妳啊！」

呢一刻望住我既阿欣，呆左，然後花木蘭就放開左佢，行到我面前話：「算你識做，如果你真係揀比條女我既話，我一定唔會比封遺書你。」

我不解地望住佢，然後佢就笑住話我知：「其實我收到風，有個由香港著草黎大陸既香港仔，唔打唔撞去左搵阿爸既遺書，期間仲發生左好多事添。」

「妳……妳點知架？」我問。





「呢個地方唔係只有英紅吧一個收風既地方，仲有好多地方你都唔知啊，小朋友，估唔到你阿爸咁醒，而你就咁蠢。」我聽到花木蘭既口吻後，就問佢：「聽妳咁講，唔通妳識得阿爸？」

花木蘭只係笑左一聲後就話：「識你阿爸有幾奇，有ｄ事仲奇你唔知添啊。」