[惡搞無極限] 就係咁，我同幾個豬朋上左大陸獵金: ３６７　格格不入既木屋（補返更新）

飛伯係天上飛，我地就係地上追，係就係行動力升左好多，不過……「飛伯你亂９咁飛我地點跟啊！！！」我忍唔住講左呢句野出黎。

佢真係亂９咁黎架ｗｏ，一時飛左一時飛右，一時又飛返轉頭然後又突然加速向前飛返，追到我地上氣唔接下氣。

我、勞斯萊斯同花木蘭都跑到喘晒氣，係得阿欣就好開心咁不停追黎追去，就不停話：「好好玩啊！」

我真係唔知有咩咁好玩……

而飛伯係半空望落黎話：「你班後生仔真係無用，呢個姑娘就唔同啦，跑咁耐都咁生猛。」





係拿，阿欣最叻好未，我再跑落去真係頂唔到，我諗勞斯萊斯同花木蘭都一樣，而花木蘭就問飛伯：「仲有幾耐先到啊。」

飛伯笑左一下話：「好快啦，最好呢條大直路。」佢向前一指，而我地望向佢所指既方向，前方真係一條大直路，而盡頭係一間破爛木屋。

真係估唔到，係呢個無人住既屋村入面，點解會有一間格格不入既木屋，而呢一間木屋，距離我地都有成幾百米。

「你係未講真架？」花木蘭問。

「係啊，做咩呃你地，點啊，休息夠就黎架拿，睇下我地邊個快Ｄ到間木屋。」





「好啊！」阿欣聽到後不知幾興奮，因為知道又有得玩嘛……