【真人真事改編】《去年暑假，我在街上賣寬頻。》: 《去年暑假，我在街上賣寬頻。》（十）

　　「偉仔，得你一個嘅？Ｌｅｏｎ呢？佢唔係『射波』吓嘛？」堅爺面色不悅地問。我沉默半晌，反問他一句：「咩叫『射波』？我第一次聽呢個術語。」「姐係詐病偷懶，扮嘢唔返啊！咁佢喺邊啊？」他表現得更不耐煩了，但此時我的思維卻十分冷靜，我知道我不能夠出賣隊友，便說了一個謊：「哦，咁佢又冇『射波』，頭先我哋兩點一齊開壇嘅，不過我哋輪流食飯姐嘛，我就啱啱食完返嚟冇耐，佢而家應該去咗食下午茶啩！唔信你問下隔籬『線上遊』個師兄嘞！」朱仔識趣地點頭稱是，堅爺方肯相信。
 
　　「咁你做咗三日覺得點啊？開始上手未？」「都慢慢習慣咗種模式，要繼續努力，希望快啲開到我第一張單。」「咁你努力啦喎，你係白紙可以畀多少少時間你適應，但過多十日八日之後，我都唔想因為你開唔到單，要日日Ｃｈｅｃｋ住你，打嚟催你交數。好啦唔講咁多住，我去睇吓阿文同嘉寶點先。」「嗯嗯……」堅爺像是在警惕我什麼，使我不寒而慄，我預料到若不好好工作，將會受到更強的脅逼。
 
　　「喂！偉仔！而家先嚟到唔好意思，中午同條女食完飯，仲要陪佢睇埋場戲先走得人，真係好煩！」Ｌｅｏｎ到達後抱怨道。「同條女食飯睇戲咁開心心啊？去死啦！」我不忿地道。「嘩！做咩咁惡？你唔係文人嚟咩？你未試過畀女朋友煩住哂咩巴打？」Ｌｅｏｎ此言令我充滿酸味，因為我從未拍過拖，當然不知道這種滋味，但我又不能像「毒男」般答他沒有戀愛經驗，以免被他恥笑。「車！唔畀串你啊而家？頭先經理嚟巡，如果唔係我醒目幫你頂，呃佢話你今日準時返工，頭先輪流食飯所以唔喺度，你一定會畀佢鬧死，仲煩過你條女啊！」不知為何，我突然起了無名火，對Ｌｅｏｎ連珠炮發，可能是源於我妒嫉他於上班時間與女友玩樂，而他不但沒有反駁，反而多謝我救他一命。
 
　　今日仍是毫無斬獲，巴士回程時浩哥又來電：「偉仔，今日你醒目救咗Ｌｅｏｎ，佢條友仔真係唔知衰！嗱，你就做咗三日，都知你唔會開到單㗎嘞，不過都要畀你試下唔同環境工作，聽日就益吓你，可以去返自己地頭開工。」我喜出望外地問：「咁正？邊度啊？唔會係我樓下啩？如果係咁就有啲尷尬喎！」「馬鞍山錦豐苑天橋底石柱囉，我諗你都知邊度。仲有聽日阿Ｌｅｏｎ就會去碩門邨，所以自己一個加油啦！」「哦，我明啦，姐係通去對面運動場條天橋吖嘛，隔籬有巴士同小巴站，喺自己地頭我會更加努力嘅！」
 
　　翌日６月１２日下午一時半，我與母親於樓下茶樓吃完飯，才慢條斯理出發，我家住利安邨，從總站烏溪沙站乘坐馬鐵到恆安站，再由Ｃ出口步行至錦豐苑，都不過是十五分鐘的光景。我來到了天橋底，那石柱赫然掛上一個綠底白字的鐵牌，上面印著「錦豐苑」三個大字，下面有「Ｋａｍ Ｆｕｎｇ Ｃｏｕｒｔ」的譯名，我就要在此牌下靠著石柱開壇，由於石柱表面很難貼上膠紙，所以花了十分鐘才能將易拉架五花大綁，使其不易倒下。
 




　　這地點左面是小巴站與巴士站，上面那道天橋方便人們越過馬路直達馬鞍山運動場，而右方則有通道連接居屋錦豐苑與公屋頌安邨，所以無論是下車回家的，或是跑完步回家的街坊，都會經過此地。我很熟悉這個地方，因為我小時候就經常和朋友到頌安邨的大球場踢波，中學陸運會亦曾經在馬鞍山運動場舉辦，加上幾個月前還在頌安商場裡的Ｍ記給中學生補習，我可算是一個「地頭蟲」了。
 
　　突然，一把熟悉的女聲在呼喚我的名字：「咦！偉仔？你今日嚟呢度開工啊？」回頭一望，原來是Ｐａｕｌｉｎｅ，我的中學同學。
 
【　活在這盛世
　　就似呼吸般習慣被騙
　　承受虛幻
　　城內最笨也學會欣賞
　　矇著眼
　　瞎說話

 
　　〈謊言〉 陳奕迅 】