紙言

〔100%FF〕我愛上樓下個女仔: 二



我被帶到荔枝角的一間工業大廈 

「呢到咩部門呀？」我問 

「呢到係貨倉，公司批發部喺四樓」德頌說 

「咁即係我係批發部經理？」 

「醒目咗喎」他說得比好假的肥仔還要假 



然後我們便乘搭升降機到四樓 

「Mary姐？」我一進去便看到之前的秘書Mary 

「係呀，今日開始佢係你秘書」德頌說 

「咁你秘書呢？你唔用？」我問 

「我請咗以前阿華結婚識嗰條女呀」他在我耳邊悄悄說 



「嗰個大波妹？」 

「係呀」他看起來十分興奮 

「咳咳」Mary的咳聲提示我們她還在 

「好啦，咁你跟住Mary熟悉下公司同新同事啦，我走先，約咗老豆食飯」德頌說 

和他道別後，我便跟隨Mary在公司一樓到四樓走了一遍 



她也向我介紹了其他兩個組長和幾個同事 

我也提出一會兒請他們吃下午茶，所以大家都十分興奮，公司上下都十分的融洽 

經過突如其來的工作天，我開始熟悉了公司大概的工作

然後因為星期六的關係，我也讓他們早一點下班去陪伴家人和情人 

Mary則留在公司要我簽署一些文件，然後她留下一條公司的鑰匙給我叫我下班時把門鎖好 

「真係估唔到我都會有一間自己嘅房」我雙手放在頭後挨著椅背 

然後我看了一下部門資料也回家了 




「返嚟喇？啱啱好食得飯喇」我媽說 

「嗯，我沖個涼先」我答 

「係呢你今日做咩又話返工嘅？唔係話比人炒咗咩？」 

「你比人炒呀，哈哈」我哥從他房間走出來飯廳 

「冇呀，原來係誤會」我一邊脫衣服一邊說 

然後我在吃飯的時候我向大家說了整件事的來龍去脈 

「咁你收到信都唔睇都幾白痴下喎」我哥說 

「阿麒你好意思笑你細佬架？你第一日返工…」我爸說 



「喂，老爹子，你又話以後唔提嘅？」 

「好好好，唔講唔講」 

我爸和我哥是同一公司的職員 

一個是公司老臣子，一個則是公司中升職最快的人 

「係呢呀域仔，今日你走咗之後黃太叫我問你幾時得閒幫佢個女補習喎，如果你唔得閒我就幫你講聲啦」我媽說 

「得嘅，就逄星期日嘅五點左右啦」我說

「咁我一陣拎啲紅豆糕落去比佢地順便同佢講埋啦」 



「係呢，你升咗職，洗唔洗買架車代步呀？」我爸問 

「係囉，唔洗同人迫地鐵嘛，啲細嘅睇到點諗呢」我哥說 

「唔洗喇掛，公司好近啫」我說 

「你唔係成日都話想要一部電單車咩，買返架型型地都好吖」我爸說 

「咁我考慮吓啦…」 


第二天早上，我便去了一間駕駛學校報名電單車課程 

也去了看一下那些電單車的店舖 



回到家時也在網上看了有沒有合我心意的電單車 

「域仔，五點喇，要落去喇」我媽在飯廳叫我 

「哦」我關掉電腦，拿起多年沒用的筆袋，也拿了一本筆記本就走樓梯到了樓下 

我按了門鐘，開門的是阿寧 

「你阿媽呢？」我問 

「出咗同朋友去行山呀」她答 

我走進她的房間，原來床上有著一隻跳跳虎的玩偶，上次都沒留意到 

「坐吖，駛唔駛飲咩呀？」她拿了一張摺椅給我坐又問我 

「唔駛喇唔該」我說 

然後她又走到廚房拿飲品，我則在環顧她的房間，正好被她看見了

「未見過女仔間房咩，望望望」她說 

她說得很小聲但她家很靜，所以我全都聽到，這女生說話還真不客氣呀 

「好啦，咁開始喇，你邊間學校架？」我問 

她說的學校名字正好就是我的中學 

「咁啱？我都係呢間喎」我說 

「唔係呀？你扮熟咋掛？」她好像不太相信 

「我好地地呃你做咩呢」 

「咁我喺學校都未見過你嘅？」 

「我大你六年，中六中七又轉咗間好啲嘅學校，你緊係未見過我啦？」 

「大我六年？即係你廿四喇？睇唔出喎」 

「你唔知我大你六年咩？尋日有講過我地呀媽有講過」 

「係咩」 

這是因為同一所學校的關係，我們兩人開始混熟了 

而我也說了不少的學校的往事給她聽，她也說出了不少當年教過我的老師名字 

「咁快就七點喇？我地都未開始溫過書」我看看手錶說 

「唔緊要啦，反正都唔係即刻考，之後慢慢溫都唔遲啦」她說 

「一係你講啲你唔識嘅科目呀，唔識啲咩話比我聽，等我準備吓吖嘛下次」 

「其實最主要都係數學囉」 

女生大多數都是數學差，這令我想到中學時我喜歡的女生

「喂，你諗緊咩呀？」阿寧把拉回現實生活中 

「冇，諗緊點幫你搞好啲數學啫」我說 

「咁都唔洗諗到咁入神下話」 

「呢啲係老師嘅職責」 

「咁唔該哂你喎，方老師」 

這時門鐘響了，是姨姨回來了 

「阿域仔，唔該哂你囉，佢有專心聽你講嘢嗎？」姨姨問 

我看一看阿寧，她的笑容告訴我她有專心聽我說話，但今天實際沒有得著 

但是我還是不要告訴她媽好了 

「有，緊係有，好留心聽添，仲有回應」我笑說 

「好喇，方哥哥都差唔多要返屋企食飯喇」阿寧說 

她把我推出門口，應該是不想我再多說甚麼 

「咁我走先喇」我說 

「嗯，麻煩哂你」姨姨說 

阿寧推著我到升降機前 

「今日唔該哂，下次應該見到面都唔會因為上次件事而阻阻掛」她說 

「希望啦」我笑說 

多虧了母校，我才能和阿寧的破了冰 

接著我每個星期都不用和她那麼尷尬地坐兩小時了
又過了一個工作天，這天我只是待在辦公室中 

因為新分部剛成立，這裡連貨櫃幾乎都沒有 

停車場則只有兩輛公司車泊著 

所以我又便讓他們提早下班 


在地鐵站到回家的路上，我剛好想回學校那邊看看 

所以我便走了家的相反方向 

我走到一半滑著手機時，突然對面馬路有人大叫「方哥哥」 

嗯？難道是叫我？ 

我抬頭看過去才發現是阿寧和幾個女學生 

因此我便過了馬路找她 

「你搵我呀？」我說 

「你都自己行到過嚟，唔通聽唔到我叫你咩」她說 

「做咩叫我嘅咁？」 

「見到你咪叫你囉，唔係咁大牌連嗌你都唔叫得呀？」 

「咁又唔係，係呢你去邊呀？」 

「去同班朋友食糖水囉」 

我看一看她的朋友，每個的樣子都不差 

她們向我揮手打招呼，而我則對他說微笑點頭 

而且是學生妹呀，話說我好像很久沒看到穿校服的女生


因為平時上班比她們上學遲，下班也是 

而且中環那邊多都是辦公室，午餐時看到的清潔姨姨都比學生多 

「係呢，咁你去邊呀？」阿寧問 

「冇呀，我見今日早收工咪諗住返中學到睇下囉」我說 

我看一看阿寧，她穿起校服時和在家衣著和醉酒那天是三個人 

而且是真的有純情學生妹的味道… 

不，我不能想這些！ 

「係呢點解你唔帶眼鏡嘅今日？」我問 

「哦，我本身就冇戴眼鏡，只係平時喺屋企好似有啲水腫咁先搵嚟遮吓啫」 

「咁樣幾好睇吖」而且我覺得女生紥起馬尾更好看 

她沉默了兩秒「你行啦，我啲Friend等緊我呀」 

「哦，咁你食得開心啲喇」 

然後我便向阿寧和她的同學揮手道別 


「唉，好耐冇返嚟喇」我看著學校的舊翼 

學校早兩年因為翻新和興建新翼所以不少東西都變得不同了 

而當年教我過的老師很多都走了，校長也換了 

我在老師名單中看見了中五畢業班的班主任，因此便想去找他 

當我走到教員室時，有一個女生也正站在外面，但身上卻不是穿著校服

「方澤域？」那女生看到我時居然說出我的名字 

「你係李韻晴？」我有點驚訝我竟然下意識說出這名字 

「哈哈，你竟然仲記得我」她掩著嘴巴笑說 

沒錯，她就是我之前說到那個數學很差的我暗戀的女生 

班主任對於我們到訪感到十分意外，他居然還記得我倆的名字 

而且還記得我在班中十分頑皮卻讀書不錯 

老師把自己的電話號碼給我，叫我下次約大家一起食飯 

我當然也隨口答應了，但大家現在都是社會人士，應該約齊人也很難吧 

我們三人聊了三十多分鐘便因為老師要開會所以我和阿晴便走了 

「係呢，你而家返緊咩工呀？」阿晴問我 

「我而家幫緊德頌做嘢囉，記唔記得陳德頌呀？成日同我一齊玩嗰個呀」我說 

「哦，嗰個二世祖吖嘛，你仲有同佢聯絡咩中五之後？」 

這樣直接說人家是二世祖好像不太好吧… 

「佢中五之後都係同我讀同一間，大學都係，所以咪係少數我仲有聯絡嘅人囉，係呢，你話你中七畢業去咗日本讀書，點解又返返嚟嘅？」 

「日本好係好，但我好多年都未見過屋企人，咪同公司申請返香港分部囉」 

「咁你咪即係返緊大公司？」 

「都係架，不過我係個小職員囉」 

「你尋日先返嚟，一定好掛住香港啲嘢食喇，一係我請你食飯吖」我鼓起勇氣約她吃飯
「唔喇，我阿媽今晚煮咗好多餸，而家已經催我返去食飯喇」 

「哦」我再一次被拒絕了 

我既然說「再」，當然是我在以前有約過她 

當時學校的女生比男生多，所以男生是大家混在一起玩 

而女生們則是這個不喜歡那個，那個討厭另一個，所以她們分了很多堆 

當中阿晴絕對是她們中最出眾的那個，因為她那些朋友全都是暴龍，速龍和三角龍，是史前生物 

阿晴當然引來不少狂蜂浪蝶，當中少不了我 

那時MSN尚有營運，我好幾次約她出外，但是都被拒絕 

後來我告訴我的一眾好友說我喜歡她，他們也願意做我的「軍師」 

但是沒想到原來阿晴背後也有一群「女軍師」 

所以每次我們都是以慘敗收場 

「一係我比我電話號碼你，你得閒再約我出街囉」阿晴說 

「吓？」我反應不來 

「做咩呀？唔好呀？」 

「唔係，唔係，緊係好啦，緊係好啦」 

結果我得到她的電話號碼，也送了她到地鐵站 

沒想到多年沒見面，一見面便得到這麼重要的東西 

難道我會和女神有進一步的進展嗎？ 

我只是想一想就覺得十分興奮


公司接到的訂單漸漸變多，總公司那邊也會給一些訂單叫我們送貨 

隨著工作變多，分部門也慢慢上了軌道，變得忙不開支 

「返嚟喇」我打開門後說 

「星期六都咁夜返嘅？」我媽說 

「係呀，開始忙起上嚟吖嘛」 

「哦，咁你沖涼先啦，就快食得飯喇」 

「唔喇，我搞埋少少公司嘅手尾先沖啦」我回到自己的房間 

結果忙完後已經很晚，我連晚飯都沒吃 

所以便到廚房拿了一個杯麵打開電視看 

我在等三分鐘時看一下手機，原來阿晴找過我 

「你聽日得唔得閒呀？」２０：３２ 

「唔應人嘅」２３：４４ 

現在時間則是凌晨兩點，她應該睡了吧 

「得閒呀」我回她，她應該明天早上會看到吧 

沒想到她秒回了「咁聽日出街？」 

害我看的時候噴了麵，差點噎死 

「緊係好啦，聽日十一點旺角地鐵站等？」 

「好呀，咁到時我再打比你啦」 

由於我太激動，所以大聲喊了一句「Yes!!」 

結果被我哥在房間向外罵

那晚我幾乎徹夜未眠，腦海中一直想著明天要穿甚麼，要帶她吃甚麼 

但我睡著的時候，我較忘了調較好鬧鐘 

「如果想開心，為什麼需要等，你是…」我的電話鈴聲響起 

我睡眼惺忪的接起電話，連誰打給我都不知道 

「喂？」我對不知道誰說 

「喂，我就快到喇，我而家喺九龍塘呀，我地喺邊到等呀？」是一把女生的聲音 

糟糕，是阿晴！ 

「Er…朗豪坊，旺角C出口等」我馬上醒了過來 

「好啦，咁一陣見啦」 

我立刻跳下床，花了五分鐘高速洗刷後便換好衣服出門 

我跑到升降機前，因為太著急而多按了幾下，但是它的速度卻沒有加快 

升降機下了一層後打開了門，進來的是阿寧 

「方哥哥，你出街呀？」阿寧問 

「係呀，咁你又去邊呀？」我問 

「見到著到咁就知我都係出街啦」她的衣著明顯是有細心打扮過 

「幾靚呀今日你，男朋友約你出去玩？」 

她的臉紅了起來「我都冇男朋友，應該話，可能好快會有」 

這時升降機剛好到了地下 

「今日應該幫唔到你補習喇，唔好意思」我說

「唔緊要啦，我本身都想話今日唔補」 

「咁我走先喇，就快遲到」說罷我便跑著到地鐵站 

幸好深水埗和旺角只差兩個站，所以我還是比阿晴快一點到 

「等咗好耐呀？」阿晴在我滑手機時原來已來到 

我由下到上打量她，她穿的是紅黑間格上衣，緊身黑色褲，還有一件灰色外套 

「唔係呀，我都係啱啱到啫，你今日好靚呀」我一邊收起手機一邊說 

「多謝」她低下頭把一邊頭髮的撥到耳後，好像有點害羞 

「你著到咁搞到我好似好求其添，哈哈…哈哈…」我突然這樣覺得 

因為我身上穿著純白的短袖底衫，牛仔褲，而剛剛沒拿手機的手其他是拿著一件淺藍色嘅長袖襯衫 

「哈哈，唔算好求其啫」 

「咁，我地行囉」我和她並排而行 

我帶她從朗豪坊的CD warehouse一層一層向下，又走了一遍旺角 

中午的時候我帶她吃女人街旁邊的一家日式料理 

到了入夜則兩人走到油麻地廟街那邊吃煲仔飯 

「嘩，好耐冇食過喇」她打開煲蓋後說 

「頭先你話日本嘢口味唔同，而家帶你食地道少少，開心返啦」 

「嗯，頭先嗰到啲嘢好香港Feel，似急凍海鮮，日本嗰啲有鮮味好多」 

「我都唔明點解你喺日本返嚟仲要食日本嘢」 

「試下有咩分別嘛」 

「快啲食啦，一陣飯焦痴哂喺底就好笑喇」

吃完後，我便和她一起走到地鐵站 

「係呢，你有冇去過日本呀？」阿晴問 

「冇喎，除咗畢業旅行之外都試過去其他地方旅行喇」我說 

「咁你畢業旅行係去邊呀？」 

「台灣囉，嗰到幾靚架，話說嗰次成班人去完返黎香港，第二日就地震，佢地仲話想試下地震係點樣，真係搞笑」 

「日本成日都地震，所以我地都覺得冇乜嘢，冇人命傷亡就已經算好好」 

「日本…我都想去玩下，不過屋企人做嘢忙，夾下假期去旅行都好難」 

「咁你唔同屋企人去咪得囉」 

「咁咪即係同班損友去？算啦，約到出嚟食飯已經好好」 

「咁唔一定同朋友去啫，一係你同我去囉，我帶你周圍玩下」 

我眼前這個女生和以前大為不同，居然我感覺到好像她在追求我 

「真係？」我不可置信 

「係呀，如果你放假想去日本咪叫埋我囉」 

「咁，約實你喇喎」 

「嗯，我仲要落多層去搭」 

「哦，咁，下次見喇」 

「嗯，今日真係好多謝你」她向我揮手然後搭著扶手電梯往下一層