紙言

〔100%FF〕我愛上樓下個女仔: 三



又過了一個星期 

這天早上我要去上課，上之前的電單車課程， 

而下午則是到阿寧家幫她補習 

「咁遲嘅？」阿寧開門時說 

我到樓下的時候已是五時十七分 



「頭先上完堂返嚟唔小心訓著咗」我解釋 

「上堂？上咩堂呀？」 

「考電單車牌啫」 

「你有電單車架？」 

「都冇牌我又邊會有電單車呢」 



「咁都可以買咗先去考架啫」她好像說得有道理 

我坐在她的書桌前「一係你幫下眼睇邊一架好囉」 

我上網搜尋過幾款電單車的型號，但是我卻知道選哪一種好 

於是我便用手機打開一個電單車網頁讓她看 

「呢款呢，好型喎」她指著一款類似劉德華在天若有情中的電單車 



「吓？我想買綿羊仔咋喎本身」 

「邊有人買綿羊仔咖，緊係呢種先型架啦」 

「我返工著西裝點揸呢種呀」 

「咁唔知喇，你自己考慮下喇」

「咁，開始溫書啦」我說 

來到第三個星期日，我以為今天終於可以幫她溫習 

但是她的電話一直震個不停 

「呀姐姐，你部電話每一分鐘震幾下，你每三十秒就篤一次手機，我返工做嘢都冇咁多人搵我啦，到底你聽唔聽書架？」我埋怨 



「聽，聽，聽緊喇，你繼續啦」她回覆別人後才放下電話 

結果又過了一會兒電話又在震，這次她又拿起她的電話，所以我便偷看到底是誰找她 

「男朋友？」我照著她所設定的名字讀 

「噓，唔好咁大聲呀，我阿媽唔知架」她說 

「你幾時有個男朋友架？上次你唔係話冇架咩？」 

「我上次話冇，但係可能好快有，結果嗰日同佢出街佢同我表白，我地就一齊咗囉」 

「嘩，咁就真係恭喜哂你喎」 



沒想到連阿寧都有男朋友了，但我連拖都沒拍過 

「佢係同你同班同學嚟架？」我問 

「係呀，同咗班三年喇，佢不嬲都有啲表示，我都對佢有好感，不過我班Friend叫我唔好咁快應承佢啫」 

「點解個個女仔都係咁…寧願聽朋友講都唔跟自己意願」 

「咁我都係第一次拍拖，要聽下佢地經驗吖嘛」 

沒想到這個似是mk妹的女生竟然是拍第一次拖

「我比佢啲相你睇吖」她打開了手機相簿 
「你地啱啱一齊咁快有咁多自拍嘅？」我問 



「冇計啦，我中意自拍吖嘛，放學又影，放學又影，出街又影」 

那男生看起來的樣子比阿寧成熟得多 

「幾靚仔吖」我在阿寧面前怎樣裝也要稱讚他一下 

「靚唔靚仔都係其次，專一就夠喇」她說 

「咁睇完喇，我地又開始得未呢？」 

「嗯嗯開始啦，但係你一陣要比下時間我覆whatsapp喎」 

「得喇得喇。」熱戀中的女生十分麻煩 




終於快到八點時，阿寧家快要吃飯，而我也差不多回去 

「係呢方哥哥，你有冇女朋友架？」阿寧問 

「做咩咁問」我被突如其來的問題嚇到 

「你答咗我先啦」 

「冇呀，做咩呀？」 

「記唔記得嗰次我撞到你，仲有成班女仔一齊呀？」 

「你講緊我返中學嗰次？」 

「係呀，佢地話你好靚仔，嗰次一邊食糖水一邊喺到比人問呢樣嗰樣，又話收埋個靚仔唔介紹比佢地識，又喺到問你年紀，返咩工，個個都發哂姣咁，我都唔知點答佢地」 

「我咁都叫靚仔呀，咁佢地應該視力幾有問題喎」 

「唔係吖，我都覺得你幾靚仔呀」沒想到她居然稱讚我

「咁你講咗成段嘢係想表達啲咩呢？」我問 

「冇，我諗住問你，方唔方便比個電話比我比…」 

「唔得喎」我打斷她的說話堅決地說 

「唔好咁啦，你咁樣我好難做架」她拉扯著我的手臂 

「你嗲我都冇用喎」 

「咁你比你電話我，我有咩數學唔識就問你囉」 

「唔喎，你一定會出賣我嘅」我已經看穿了她，這一招對我無效 

「唔好咁啦，你都唔想我考試考得差架？咁咪令我阿媽對你好失望啫」 

「你咁嘅說話都講得出口呀…」 

「嚟啦，幫下我手啦，我都想考好啲呀」她再次拉扯著我的手臂 

「唉，好喇好喇，但係唔可以比我電話比其他人架」 

「一定唔會」 

「咁勾手指尾啦」 

最後我還是把我的電話號碼給她了，但是當天凌晨時份我就被那丫頭出賣了 

為甚麼我知道她出賣我？因為無緣無故有幾個我不認識的女生whatsapp我 

而且有兩個女生我看她的頭像記得那天見過 

下次再去那丫頭家幫她補習時一定要罵痛她 

我裝作晚上睡覺未能看手機，上班太忙，所以一天之中只回她們幾次 

希望她們會知難而退吧…
終於挨到了星期六明天不用上班 

我下班後用精神拖著自己毫無力量的身軀走回家 

到了家樓下時正好看到阿寧 

她身旁還有一個男生，我認出來是她男朋友 

「方哥哥？咁晏先收工呀？」阿寧問 

「忙吖嘛，邊似你呢啲學生可以成日hea」我說 

「邊有hea呀，我有比心機溫緊書架」 

「話說呢位係？」那男生開口說話 

「我叫方澤域，住阿寧樓上架」我回答 

「我叫曾永俊呀，叫我阿俊得架喇」 

「俊？邊向左走向右走到俊呀，睇過」我很想說這句 

「你好你好」我和他握手 

「你叫佢阿寧，即係同佢好熟架？」 

「雖然我喺到住在廿幾年，但係差唔多一個月前先識佢」 

「咁搞笑？」 

「好喇，好喇，唔好講喇，方哥哥你快啲上返去啦」阿寧打斷我們的對話 

看來她好像不想我在她男朋友面前說那天後續的事 

「咁，我都走喇要」阿俊說 

「吓，咁早，唔陪我多陣呀？」阿寧在男友面前嬌嗲的說

她們好像完全無視了我還站在這裡，而我聽到這樣的對話不禁起了雞皮疙瘩 

「唔啦，你都就快要食飯，我都係嚟拎份功課就走」 

「咁好啦，小心啲行呀」 

「得啦好近啫」 

阿俊對我們道別後便回家，我們兩人也進了大廈 

「你頭先係咪想出賣我」阿寧用凶狠的眼神看著我說 

「大佬係你出賣我先架喎」我反駁 

她沒說話，然後我把她慢慢迫到牆角 

「係邊個勾哂手指話唔出賣我架，結果嗰個人一次都冇問過我數但係就好多唔識嘅人問我數喎」我說 

這時，升降機剛好停在她那層 

「嘻嘻，唔小心啫」說完她便以比保特更快的速度跑出升降機 

要不是她是女生我早就在升降機裡和她開打了 

不過算了，就當作是認識幾個年紀較小的朋友吧 

畢竟我沒可能喜歡上那年紀的女生，還太小了 

喜歡…女生，對了，明天是星期日，反正上完電單車課程到幫阿寧補習時還有一段時間，約阿晴出來玩好了 

「喂，阿晴？」我打電話給她 

「做咩呀？」她回話 

「你聽日得唔得閒呀？」

「唔得呀應該，我阿媽發緊燒，我要照顧住佢呀」她說 

「咁好啦，屋企人都係緊要啲，希望伯母早啲好返啦」 

「嗯，咁我代佢多謝你先啦」說完她便掛掉電話 

所以那就是說明天我應該是在家無所事事了嗎？ 


第二天早上，我哥在我上完課回家後好像要出外 

「落街呀？」我問 

「係呀打波，一唔一齊，屋企冇哂人，跟唔跟隨便你」我哥說 

星期天家中基本上只有我和我哥兩人，因為這天必定是我爸媽二人世界的日子 

要是我哥都出外就沒人煮東西給我吃，所以他出外時我也常常跟著他要不然就要自己到樓下拿外賣 

「你行先啦，我換完衫就落去」我說 

雖然平常甚少做運動，但我以前也算是校隊，只是足球罷了 

而我哥是真正的籃球校隊，而且他公司舉辦的籃球比賽好幾次都由他帶領的隊伍勝出 

他習慣到公屋的籃球場打，說因為人比較多，而且不少人都很強 

剛進籃球場，我就看到一個十分熟悉的身影 

正是我昨晚碰到的阿俊 

而我哥竟然比我早走到阿俊面前和他打招呼 

「你地識架？」我驚訝的問 

「有咩咁出奇，人地籃球隊隊長，喺球場到我識人又有咩咁出奇，咁你地又識架咩？」這次反而是我哥問

「叫做有過一面之緣咁啦」阿俊說 

我們射了一會兒球後就開始和別人三對三 

他們兩個都很強，所以我們一直輾壓其他隊伍，而我就像啦啦隊一樣站在一邊看他們打 

最後打了兩個小時我們才各自回家 

回家洗了個澡後，又是時候幫阿寧補習 

「我男朋友話喺籃球場撞到你喎」阿寧打開門後第一句便說 

「人人都叫我深水埗MJ，咁又點會喺籃球場見唔到我」我吹噓 

「MJ？Micheal Jackson下話？」 

「張家輝跟佢學打邊爐嗰個呀」 

「係係係，你威你威」 

在她敷衍我過後我們又正式開始這天的補習 

「我問你一個問題吖，如果一個女仔你追佢好耐，佢都冇比咩反應，你幾年之後見返佢，佢成個人變到積極追返你咁，係咪代表佢對你有意思？」我突然問這問題 

「我覺得，睇人咋喎」阿寧回答 

「咁如果我呢？」 

「咁就緊係對你無意思啦，哈哈」 

「認真問架」 

「即係你而家面對緊咁嘅情況？講多啲嚟聽吓先啦」

於是我便將整件事告訴給她 

「咁你地又真係幾有緣分喎」阿寧說 

「你都覺得呢」我說 

「既然人地返咗嚟，又咁積極，點解你唔去馬呢？」 

「我都唔知佢點諗」 

「女仔嘅心意就緊係難睇穿架啦，一係咁以後我幫你手做你軍師喇」 

「得咩？」我有點信不過她 

「得啦，大家都係女人，應該明對方點諗掛，嗱，以後我地補習改做星期六夜晚八點啦，咁你星期日咪有多啲時間出街囉」 

「你覺得講呢番說話咁好聽我就唔知係你想星期日出去拍拖咩」 

「嘻嘻，咁都比你發現到」 

「我食鹽多過你食米啦」我拿手上的鉛芯筆打了她額頭一下 

只要約她星期天出外，便是成功的第一步了 


回到家後，我打電話給阿晴 

「喂？」電話的另一方傳來她的聲音 

「阿晴呀，你下星期日得唔得閒呀？」我提早一個星期約她應該一定約到吧 

「唔知喎，可能公司有嘢做掛，我地公司唔係個個星期日都放假，所以我都唔清楚」 

「哦...」我感到有點失望

「不過應該有假放嘅我諗，我而家應承咗你先啦，到時唔得嘅話再傾啦，不過，你諗住帶我去邊呀？」 

「Er...睇場戲囉，有套新上畫啲人話好好睇，諗住帶埋你啫」我臨時編了一個活動 

「睇戲呀...都好喎，嗯...咁我到時再通知你啦」 

「好啦，早抖喇」 

「嗯，早抖」 

掛掉電話後，我再次高興得叫出了一句「Yes」 

而且再一次被我哥由房間向外罵 

我這時也打開whatsapp向阿寧傳了一句「第一階段任務完成」

我滿心期待的等到了星期天 

這天我和阿晴繼好了到九龍灣地鐵站等 

由於是她家附近，所以她便先到了 

「Sorry，遲咗少少」我沒預好時間因此遲了五分鐘 

「唔緊要啦，我都唔係等咗好耐」阿晴說 

之後我們兩人便走到德福買電影票 

「你想睇咩戲呀？」我問 

「你唔係話你有套戲想睇咩，咁又問我嘅」她說 

糟了，我只約她看電影，忘記了上網看那一套好看 

「Er…因為套嘢落咗畫」我隨時編了一個藉口 

「嗯，咁睇呢套啦，好似好得意咁」她指著一套動畫，而我連動畫的名字都沒聽過 

星期天大家都不用上班，而且很多人都來看電影 

所以排了很久的隊才到我們，但是最快的一場票都賣光了 

「咁點呀？照睇呢套？」我問 

「唔緊要啦，等下一場嘅時候搵啲嘢做吓咪得囉」她說 

「咁要5點15嗰場，h7同8啦」我對職員說 

由於還是中午時間，我還未吃飯 

所以阿晴便帶著我，走了一段時間去了一間餐廳 

「咁多年冇見，其實你有冇覺得我有咩唔同咗」點了餐後我問

「有，都幾多吓架」她說 

「有咩唔同呀？」 

「你起碼成熟咗好多啦，以前成日玩玩吓咁，成個細佬仔」 

「乜女仔中意成熟嘅男仔架咩？」 

「睇年紀啦，細個啲嘅女仔可能就中意以前嘅你囉」 

「咁…以前嘅你點解唔中意我呀？」 

這一個問題讓她說不出話來 

「其實我以前都中意你」她突然開口說出這樣令人震驚的說話「只不過係我最好嘅朋友都中意你」 

好朋友？誰？怎麼我從沒聽說過？ 

「以前欣欣好中意你，不過佢冇講出口，但佢以為你會feel到」 

她口中說的欣欣，應該是班花麥欣欣吧 

當時幾乎全級的女生都是恐龍，只有阿晴和麥欣欣兩人是正常的而且德頌十分喜歡她 

聽說麥欣欣畢業後移民到英國，但在兩年前出車禍去世了 

「就係因為佢係我好朋友我先拒絕你，而且我都從來冇同其他人提起你追過我，因為唔想佢唔開心」說到這裡她開始流起眼淚 

我急忙抽了幾張衛生紙給她擦拭淚水 

她原來沒和別人提過我喜歡她，我一直被她拒絕還以為她身邊有著一群「軍師」 

「你真係唔覺得佢對你有感覺咩嗰陣？」她問我 

「完全唔覺」

但她這樣一說，好像也有這樣一回事，每當吃飯時大家都在班房 

正好我和麥欣欣，阿晴，德頌四人是坐在附近的 

所以大家都一起吃飯，麥欣欣每次都把她的飯一半給我吃，而德頌則會搶來吃， 

當時我還常常以為她小鳥胃吃不了太多；上課時如果要四人一組活動，她也會拉阿晴進來，某程度上她是我喜歡上阿晴的主因吧 

「可能係我嗰陣太遲鈍掛…」我說 

「算啦，佢都走咗咁耐，講太多都冇乜意思」阿晴好像還是很想念她 

這一頓飯吃的時候，我們都沒有再說話 

而吃過飯後，阿晴說她不舒服，所以我便送她回家 

但電影票就沒用了，我嘗試把它們送給別人，但其他人都以為我騙他們而不敢收下 

「啲人真係傻，有好嘢喺身邊都懞然不知」我笑說著把電影票扔到垃圾桶 

雖然這句好像在說別人，但也是我在諷刺自己 

回到家中我也只是躺在床上，睡到晚上七時左右 

肚子餓的我因為家中其他三人一起去旅行了，所以自己到樓下的茶記吃了餐蛋麵 

接著我便打電話叫德頌出來老地方喝酒，所說的老地方是長沙灣那邊的酒吧 

每逄德頌「比女飛」的時侯都會把我叫到那邊喝酒 

而我叫他出來則是第一次 

「做咩呀？比女飛呀？」德頌剛來到便搭著我膊頭說 

「你就比女飛」我反駁

「冇呀，我同Mimi過得好開心喎」 

Mimi應該是說他那個新秘書吧 

我把整件事情由重新見面那天到喝酒之前的事都講給他聽 

「Hi，欣欣中意你我一早就知啦」德頌說 

「唔係掛？你又唔同我講？」我問 

「點講呀？講比個friend聽之後眼白白睇住自己女神比個friend溝走佢呀？更何況你嗰陣追緊李韻晴，講比你聽我有錢賺呀？」 

「Hi」我只說了一個字 

「不過其實欣欣而家都走咗啦，大家又畢咗業咁耐，點解李韻晴仲咁介意嘅」 

「你問我，我問邊個喎」 

「唉，咁難得返到嚟，又發生咁嘅事，睇嚟你都係冇機會架喇」 

我沒有說話，接著之後只有德頌一直對我說他那個新秘書身材怎樣好，床上功夫怎樣了得 

我有在聽，而平時的我應該早就調侃他了，但今天卻沒這樣的心情去做 

酒吧裡越夜越熱鬧，一些常常碰到的人也來到，所以他們叫我和德頌一起玩 

他們在猜枚，射飛標，而我還在沉醉於酒精的世界 

而且當中有幾個女生走了過來搭訕，但我只喝酒，一話都不說，她們也感到沒趣走開了 

到了十一點左右，我還尚算清醒，但卻開始胡言亂語，德頌以為我醉了便跟我先行告退 

我在他的車子上睡了一會兒，醒來時已經到了家樓下

德頌把我扶下車，這時酒精和睏意一起湧上我的腦袋 

迷迷糊糊中我看到德頌正和一個女生在聊天 

臭小子，剛剛在酒吧才說女朋友怎樣好，怎樣正，現在又和別的女生搭訕 

我睜大一點眼睛看看，才發現那女生是阿寧 

我再次閉上眼睛，然後德頌便將我移交給阿寧扶著 

打開門後上次那看更也急忙過來扶著我 

乘過升降機，到了我家門口 

「有冇鎖匙呀你？」阿寧問 

我下意識的拿出鎖匙給她，她一邊打開門一邊扶著我感覺好像很吃力 

畢竟她個子小，而且還要同時兼顧兩樣東西，吃力也是正常的 

她扶我進了房間，但卻是我哥的房間 

我雖然知道，但醉得說不出話來 

我身上穿的牛仔褲很緊，所以想把它脫下來 

阿寧見狀只丟下一句「我走先喇」就走了 

而我沒力氣把褲子全脫掉，所以脫到褲腳就放棄了，直接昏睡在床上 

當我再次醒過來時，已經是翌日下午一時 

糟糕，忘記了今天是星期一，沒有上班 

當我打電話回公司時，Mary姐則說德頌已經向她說了我會請一天假 

而我再看一下手機時，原來阿寧whatsapp過我