紙言

〔100%FF〕我愛上樓下個女仔: 十四



然後我便走進她的房間坐在她旁邊 

「駛唔駛放對鞋放咁耐呀...」她一邊轉筆一邊說 

「擺返整齊啲啫...」 

「求其放咪得囉，一陣你走咪又係著返」 

「咁又係，不過你平時好似頭先咁大聲講嘢你屋企人都唔鬧你嘅？」 



「你知我阿媽係咩都冇所謂架啦，而且佢又喺房帶耳機煲劇，點會聽到喎」 

「咁你阿爸呢？」 

「又返咗大陸啦，做嘢吖嘛」 

「哦...」 

「做咩對我屋企人咁有興趣嘅？」 



「好奇啫...」 

「唔見你對我好奇...」她很小聲在說 

「你講咩話？」其實我聽到，但我假裝聽不到 

「冇嘢喇，我地開始啦」 

「哦...」 



這天她不知為何十分的專心，少了跟我說閒話 

可能是她終於感受到文憑試迫近的可怕吧 

「呼，又到十二點半」我看一下手機的時間 

「駛唔駛呼呀？好辛苦咩？」

「緊係啦，對住你，唔比你激死仲唔鬆返一口氣呀？」我捏著她的鼻子說 

「係你教得差我先聽唔明咋」她也捏點我我鼻子 

「唔同你玩喇，聽日返工，返去訓教」我鬆開手 

她看到我鬆手後也把手鬆開 



「記得...」 

「溫書吖嘛」她說了我想說的話 

然後我又站了起來走到外面 

當我穿回拖鞋時，順道想偷看一下她的鞋號 

「係喎，聽晚同後晚我唔得閒喎...」她走了出來說 

我便嚇得把她的鞋掉在地上 

「你做咩呀...」她問 



「啱啱唔小心撞跌你對鞋啫」我找一個藉口 

「係咩？應該係對鞋放得太出掛...」她居然相信了... 

她走了過來把鞋放回原位並幫我開門 

「係呢，你頭先話咩唔得話？」 

「我聽晚同後晚唔得閒囉」 

「點解呀？」 

「我聽日考中文說話呀」 

「乜唔係月中開始考架咩？」 



「係呀，聽日咪最後一日囉」 

「哦...咁後日呢？」

「約咗班同學食飯，即係我出賣你電話比佢地嗰班呀」 

「你仲好意思提...」 

「嘻嘻，不過佢地都冇搵你啦」 

「可能係我hea覆，所以佢地覺得冇癮掛」 

「乜你對佢地咁衰架...」 



「哈哈，同對你差唔多啦」 

「哼，早啲返去訓啦」她把我推出門外，然後便把門關上 

我笑著搖頭地走向後樓梯的方向 


早一陣子簽多了幾張單，所以貨物的進出變多了 

辦公室比平日更要忙上十倍，難為了那幾個送貨的司機 

所以也跟中環那邊多要了幾輛車和多些司機 

好不容易的忙了一整天，終於有時間坐下來喝杯茶 

這時阿寧打電話給我 

「喂？又想點呀大小姐...」 

「陪我傾吓計吖」她說 

「點解呀？我做緊嘢喎...」Mary姐又拿了幾份文件給我 

我作手勢跟她說放下便好 

「我而家喺嗰間學校喇，我好緊張呀...」我聽出來她在打冷顫 

Mary把文件放下來後便離開了 

「哈哈，咁你打比我都冇用架喎」我說

「所以我先叫你陪我傾吓計咋嘛...」 

「哦，一係你講嘢，我應你啦」我拿起最頂層那份文件 

「你會唔會hea答我架...」 

「應該唔會掛，但係我盡量唔cut你線啦」 

「仲講笑，我緊張到笑唔出喇...」 

「咁好喇，一係我問你答喇」 

「都得嘅...」 

「你中意咩顏色呀？」 

「啲問題咁無聊架...」 

「咁你答唔答吖？」 

「答囉...粉紅色」 

我隨手拿了一張便利貼記下來 

「咁...你中意雪糕定雪條呀？」 

接下來問了一連串不相關的問題，這樣她便不易察覺到我想送她禮物 

「咁你著幾多號鞋呀？」我打算用這一句作給尾 

「唔好講呢啲住喇，啲人開始上去要點名喇，點算呀...」 

「我都唔知點算...」最關鍵的問題沒被回答令我真心的說出這句話 

「唔好咁啦，有冇咩臨場小tips 呀？」 

「唔好轉筆囉，你咁中意轉筆...大聲啲囉，好似個人好有自信咁...同埋有樣嘢好緊要，就係好似平日你窒我咁窒死哂其他對手」 

「哈哈，好似最後嗰句最有用喎」 

「當然」

「要上去喇，唔同你傾喇」她說 

「哦，咁等你好消息啦」 

「就咁一句就算喇？」 

「吓？」 

「起碼都講句加油啦」 

「哦…加油…」 

「咁行(行貨)架…唔同你講喇，bye」 

她掛了電話後我看一看便利貼上的字 

現在起碼知道了她和我想的一樣喜歡粉紅色 

也知道了平日她比較喜歡吃甚麼 

但昨晚偷鞋和剛才問問題都雙雙失敗 

接下來要過兩天後才可以到她家 

所以這兩天都買不了鞋 

算了，反正她也不知道，我也不急著買 


好不容易才到下班時間 

阿寧還未打過來，所以這次便由我打過去 

但是還是無人接聽，可能是還在考試所以沒開機吧 

那我繼續打給她也沒用，便收拾東西回家了 

這天剛好又想買模型，所以便把電單車放在公司步行回家

走了大約一個站的距離到了長沙灣 

「考完就whatsapp我啦」我傳了一則訊息給阿寧 

這樣她開手機時一定能知道我找過她了吧 

然後訊息傳了出去不到十秒便變了藍剔 

接著她便打了過來 

「做咩要whatsapp我叫我打比你呀？」我還未說話她便搶了發言權 

剛才考試時要是這樣的話我相信她可以拿五了… 

「就係打比你唔通先叫你打比我啫…」 

「有咩？我手機聽唔到響嘅？」 

「你關機又點聽到呀小姐…」 

「哦…咁你搵我做咩呀？」 

「諗住問吓你考成點啫」 

「正常發揮囉，好似平時窒你咁反駁其他人囉」 

「咁即係坐五望星啦」 

「係咁易就好喇，係呢，你收工喇？」 

「嗯，係呀，你想嚟搵我？」 

這時我看到一個孕婦正和一個男人一起過馬路 

「都得嘅，你喺邊先？」 

「長沙灣」我一邊說一邊加快腳步追上前

「咁啱嘅？我都喺…」 

「我一陣再打返比你吖」我說完便掛掉電話 

正好到了馬路口時，轉了紅燈 

我本來想衝到對面，但車子有太多而且開得太快 

我看著那兩個人的身影從轉角不見了 

當轉回綠燈時，我就像跑一百米起跑地衝了過去 

還不小心撞到好幾個人 

但是到了轉角時，那兩個人已經不見了 

我轉過身準備回去，接著拿起電話，打給阿寧 

「阿域！」我的後方傳來熟悉的聲音 

一轉過身便看到阿貴對著我揮手 

我看到他搭著一個孕婦，沒認錯的話應該是他的妻子 

「阿貴！」我一邊說一邊走過去 

「好耐冇見喇」他摟著我拍拍我的背說 

「係呀，畢業到而家，你仲要次次打比你都冇人聽」我鬆開手說 

「轉咗電話咁多年，緊係冇人聽啦」 

「哦…唔怪得知啦」 

「同你介紹，我老婆」 

「我認得，以前喺隔離班你個女朋友吖嘛」

「好嘢喎，咁都認得」 

「阿嫂」我伸手出來跟她握手 

「點解你叫佢阿貴唔係阿南嘅？」他老婆問 

「何季南吖嘛，中間個字諧音啫」 

「哦…」她說 

「老婆呢到凍呀，你上返去先啦」阿貴說 

「好啦，咁我走先喇」嫂子說 

我們看著嫂子進了大廈 

「喂，死仔，而家做邊行呀？」我問 

「健身教練囉」 

「係喎，唔怪得好似大隻咗啦」 

「我已經唔係當年嘅潺仔貴喇」 

「哈哈，係呢，做咩搬返嚟呢邊住嘅？」 

「唉，一匹布咁長」 

「唔得閒就下次見到面先講囉」 

「唔緊要，而家講都得啦，你冇嘢做吖嘛」 

「冇呀」 

我們後來到了一間麵店 

他和我各自點了東西後便開始說起大學時和嫂子成為未婚爸媽的經過

「嗰陣我讀緊大學，唔小心搞大咗佢，諗住屋企人會好講道理啦，點知就Hi到我痴肺」阿貴說 

「呢個我知呀，你同佢地嘈咗好多次吖嘛」 

「你又知？」 

「我都係聽人講咋，你嗰陣又冇聯絡我」 

「sor囉」 

「不過後尾你都決定生啦，唔係咩？」 

「緊係啦，人命喎，雖然話嗰陣得兩至三個月，不過都算係生命吖」 

「咁後尾呢？」 

「咁我咪同佢離家出走囉，反正兩家人都唔同，唔通聽佢地講呀？」 

「不過你嗰陣唔係讀緊大學咩？」 

「嗰陣year3，拎住學貸勉強繼續讀囉」 

「不過你離家出走邊嚟錢呀？」 

「自己賺囉，返工做朝早一份夜晚一份，算係叫夠食夠交劏房啲租囉，咁自己辛苦啫，冇理由要大肚婆返工架...」 

「咁你又話自己做緊健身教練嘅？」 

「後尾啫，大約過咗半年左右，生咗個女，老豆老母唔知點樣知道，又喊苦喊忽咁叫我返去住又盛，咁咪變成而家咁囉，健身教練係畢業先做啫，朋友介紹」 

「哦...咁你屋企人都幾搞笑喎，咁你老婆屋企嗰邊呢」 

「佢老豆上年生cancer，話想見個女同孫女，我老婆一見兩老就三個攬住一齊喊」 

「你地屋企啲長輩都幾麻煩喎」 

「算啦，都過咗去」 

「係呢，你老婆好似生得咁喇喎」 

「聽日住院囉，預產期好似係下個月月尾」 

「咁到時擺滿月酒記叫我地三個老死呀」我舉起那枝裝可樂 

「一定啦，上次miss咗個中同聚會」他跟我乾了一下杯
一邊吃著東西一邊和他聊起最近的生活來 

而且我和他分別前還互相留了電話 

在輸入他的電話前把手機開鎖時才發現阿寧打了好幾通電話給我 

「哇，嗰個打咁多次比你嘅？你女朋友定爭佢錢呀？」 

「朋友啫」我一邊開鎖一邊說 

「阿寧喎，女人名喎，打得比你咁多劑，唔似咁簡單喎」 

「咪諗咁多啦，個女仔得十七歲」 

「咁你今年同我一樣廿五，咪同人地差八年」 

「我十二月，廿四咋嘛，佢六月一就十八，六年左右啫」 

「咁都好嘅，冇乜年紀差，見啱咪上囉」 

「我覺得好似差好多咁...六年差唔多係我識打飛機佢都未知咩係生殖器官嘅年紀差」 

「怕咩喎，就算你溝呀，你屋企人都唔會點反對啦，佢地咁開通」 

其實我也不知道自己在擔心甚麼 

或多或少是我不知道自己怎樣釐定和她的關係 

可能是兄妹的感覺，但有時則把她當作普通女生的看待 

我陪阿貴回到他家樓下，道別後便自己繼續走路回家 

我滑著手機看新聞時，阿寧又打過來 

「喂？」我接了電話 

「頭先又話打返比我嘅？」 

「咁你都唔駛奪命追魂call架...」

「唔打多幾次又點知你聽唔聽到喎」她說 

「哦…咁我而家走喇，你仲喺長沙灣？」 

「走咗好耐啦，你又話打返比我」 

「撞到個老朋友，聚聚舊啫」 

「女呀？」 

「邊嚟咁多女呀…係呢，咁今日唔駛幫你補？」 

「唔駛啦，考完好攰」 

「哦，咁今日休息一日啦」 

「嘻嘻」 

「嘻嘻喎，你就爽啦，溫少日書」 

「我怕你返工攰咋」 

「咁有咩事再打比我啦」 

「我諗應該唔會有咩事會需要搵你」 

「唓，唔同你講喇，係咁啦」 

接著她便掛了電話 

我沒有忘記此行的目的 

結果還是去了看模型 

本來打算再去一趟旺角看一下有沒有甚麼其他粉紅色的鞋好看 

但是不知道她鞋號，所以又打消這個念頭
過了兩天來到星期五的晚上 

「咁早呀今日，我地啱啱先食完飯咋喎，枱都未執」阿寧一邊開門一邊說 

「咁一係我一陣再嚟囉...」我說 

「咁又唔駛，你入我間房坐陣先囉」 

我走進她家，姨姨正在洗碗碟 

我路過跟她打了個招呼便走進阿寧的房間 

我坐下來把手機拿出來按了幾下阿寧便進來了 

「咁快嘅？」我把手機收起來 

「係呀，我去洗個手咋嘛」 

「我仲以為你幫手執枱添」 

「唔駛啦，我阿媽執咪得囉」 

「成日都靠屋企人，邊個娶著你就慘喇」 

「唓，而家又唔係你娶我..」 

「你又知我唔會？」我跟她開個玩笑 

我看著她說，她靜了好幾秒 

「講咁多，快啲開始啦」她面紅耳赤的 

雖然我知道跟她開這種玩笑會令她誤會 

但是我更期待看到是她各種不知所措的反應 

然後便開始了這天的教學

我在一邊教她的時候趁她認真地看著問題 

便打算用自的腳去量度一下她的腳長 

結果則不小心踩到她了 

「做咩呀你？」她嚇了一跳並看著地板上的腳 

「拗痕啫」我隨便找個藉口 

「拗痕搵我隻腳嚟拗架咩...」 

「唔好意思囉...」 

結果行動又再一次失敗了 

於是我便決定直接問她算了，不想繞一圈 

「係呢，你著幾多號鞋架？」我問 

「35囉，做咩呀？」 

「冇嘢...」 

「唔通...你想送對鞋比我？」 

這時直接問她的壞處出現了 

就是被她洞悉整個計劃 

「唔係呀，我見你隻腳咁細先好奇咪吓你啫」我說 

「唓，我仲以為你送對鞋比我著咁豪爽，咁大方添」 

「哈哈，咁真係唔好意思喇，你誤會哂」