完美.情人?: 第七章:「人」

「呢度就係April住既地方?」
眼前呢個地方對於我同Judy來講都係新鮮事。依度係香港最窮最舊既市區,周圍都係舊樓,對Judy來講當然第一次見,而我雖然在新聞網上都睇過有關既相同新聞,但始終唔及親眼所見親身所聞。當我架車駛入呢區後,我覺得四周目光已投放係我架車上,好似我一落車就會有危險。
行左一段後,April係前方便利店等我地,而佢亦唔等我地落車走過來。
「唔該晒,聽日見,拜拜!」
「April,等等!」講既係Judy,「我想去你屋企坐下。」
「吓?唔好啦,我屋企好細好亂,無地方俾你坐...」
April未講完,Judy已經落左車,而我亦跟住落車打算說服佢走。
「Judy,而家咁夜唔好搞住人啦,聽朝April仲要返工!」
「係囉!就算你想上來都俾我執下間屋先啦,一係聽日,好唔好?」
「好!勾手指尾先!」


我不禁氾起不祥預感,到第二朝...
「April,今晚放工去你屋企喎!」果然...
「吓?」其實尋日聽April既語氣已經知佢順口開河,但佢今日直情無左件事咁,而佢亦估唔到Judy咁固執...
「你應承過我嫁,勾過手指尾嫁!」
「係...係,但係我真係唔記得左,而且我間屋真係無野值得參觀...」
「我唔理,總之我想去喇!」
就好似情侶嗌交咁,正確來講係Judy埋怨April講野唔算數。假如你係花生友,呢個情景確實比戲好睇,但當兩個你都認識既時候,你就會想盡快結束佢地佢爭嗌,回復返寧靜...
「我唔係想參觀你間屋,我想睇下你住既環境!」
若果係普通人講既,大概會得出想買April間屋或者同佢同居依啲想法,但我知道Judy唔係咁諗,佢想體驗「人」既生活。於是我拉走April,同佢係一邊傾...
「喂,你知唔知佢真正意思嫁?」


「吓?唔好啦...」佢應該明白...「雖然我一個人住,但仲未想搬,而且搵屋搬屋好麻煩,同埋間屋我租既,買賣都唔關我事。」...先奇...
「佢係想同你住埋一齊,佢...」我未講完...
「吓?我唔鍾意女人嫁,而且我個人好怪好麻煩,同人相處唔來...」
「你聽埋人講野得唔得?我話Judy係想體驗「人」既生活先想同你住,你當係加班咁,俾佢住幾日囉!」
「哦!有加班費個喎?」
「有,咁你應唔應承?」
「好,幾日咋?無問題!」其實我想問佢係唔係等錢洗,不過算喇...
就係咁,佢地既同居生活就開始左...
「你執晒啲野過來真係想同我同居呀?」
「你依度大把地方,仲有呀,我果度包租公話要加租呀,咁你依個又近公司咪慳埋車費囉!」


「我考左車牌,唔使車費添。」
「真架?咁你買左車未呀?」
「未呀,我都唔知買咩色好?有無意見呀?」
「黃色囉,襯晒你性格啊!」
我睜開眼,又係夢,總係夢見返以前啲野...