完美.情人?: 第十三章:心血

我將成箱野攞返間房,我明白到我唔可以再唗時間,箱裡面既野應該可以啟發到我既新研究。當我準備行上房時,阿爺禁啱返左來。
「幫我攞左個攪拌機嗱?」
「吓?」我真係無左回事,我以為佢講下或者借啲咦睇返爸爸拍啲野咋...
「咁即係無啦!我自己攞!啊,有人來探你...」
我睇下邊個來探我依個廢青,原來係April...
「咪咁好來探我呀?」我請左佢上房坐,「見到啦,無野俾你匯報喎!」
老實講,我無怪過佢地,每個人都有自己既苦衷,但唔知點解我比較在意佢。
「我...我...」佢雙眼已經通紅,「其實我一開始都唔知係咁。第一日返果時,阿Roy佢話盡量參與你既研究...一段時間要話俾佢知...我都諗唔到原來佢係咁...」
啲人話女人既眼淚可以媲美原子彈,依一刻我感受到個威力,本來我想等佢講完就破口大罵,但而家...
「對...對唔住呀...你鬧我丫,你鬧我...我會舒服啲...」唉...你咁既樣點鬧啊?


而家間房個氣氛非常尷尬,佢就係度喊,而我就唔知做咩好,見到個箱,就求其攞本筆記睇下,緩和下氣氛...
「咩來架?」佢對我手上本筆記感興趣,用手抺走眼淚行過我身邊。
「依啲係我爸爸既遺物,我想睇下會唔會啟發到我研發新既野...」
「咁你唔再研發Judy個智能系統呀?」
「唔...應該唔會,其實個系統都大致完成,同埋我想搞啲新既野。你地點呀?係唔係幫緊阿Roy研究Judy?」
「唔係,佢好似有自己團隊,但果啲我估係軍方派來既...」
提到軍方,我不禁想起果個姓周既女人,同時亦不敢想像我研究出來既成果會用係戰爭度,個女人果句「用完即棄」更令我無名火起。
「你估而家Judy點?」突然奇來既一問,令間房又變返寧靜...
「我諗應該...被人...研究緊...」我實在講唔出口,我怕又觸動佢神經...
「不如你俾啲意見我跟住應該整咩丫!」


「唔...啊!咁不如整...」
於是我地就開始討論我跟住既方向,開頭都好認真既,但之後就出現啲奇怪既主意,最後都係講笑完結。跟住佢係屋企食完飯,我就車佢返屋企。當我準備返屋企時,電話響,係Roy...
「喂,Henry,你係唔係鎖左Judy個系統?」
「吓?無啊,我無咁做。」我係有諗過依個方法,但因為無意義而先無咁做。
「而家佢無左反應,我指以前你俾我睇果時咁,而家就好似普通服務員咁,甚至仲差。我地用左好多方法,都搵唔到點解咁,我諗可能要你既幫忙...」
「你認為我仲會幫你咩?」
「至少你唔會睇住你既心血白費,或者你暫時下唔到氣,我俾你兩日時間考慮,因為我唔知佢地會用咩辦法達到目的,到時...我等你答覆,拜!」
佢欲言又止,但已經表達到佢想話俾我知既訊息...
「喂!你話改咩名好呀?」
「吓?改名?又唔係生仔,改咩名啫?」我一臉惘然咁望住阿June。


「咁佢都算係我地既結晶品丫!雖然而家暫時無實體...」
「咁叫阿龍或者阿虎囉,夠霸氣!」
「咁老套!不如叫Danny丫!」
「你諗好左就唔好問人喇!」
「咁而家叫你改個名啫,又唔係叫你去死...」
又夢見返以前既事,唔知係唔係我多心,總係覺得會發生一啲唔好既事...
我諗左成朝,決定應Roy要求去公司睇下Judy出左咩事。奇怪既係,阿Roy淨係俾Judy既系統記錄俾我,我問佢係唔係出左咩事,而佢話軍方好重視依次研究,所以唔可以俾太多野我知。由於無咩數據資料參考,我同佢講我要見到Judy先解決到問題,佢因而接受。臨走既時候,我偷望左佢書枱一眼,我望到一個不祥既數字,一個惡夢既數字...
「喂,April,你係邊呀?」
「我仲係公司未走得。」
「我有野想你幫忙,但可能會令你好危險。」
「咩事呀?犯法野我唔做嫁!」
「我想偷偷入去公司...」