完美.情人?: 第十四章:潛入

我約左April係公司附近等,為左唔被人注意我特登返屋企換衫同埋做左啲準備,大約八九點左右,April就出現。
「喂,做咩要潛入公司既?」
「今朝阿Roy本來約左睇Judy出左咩事,但佢淨係俾系統我睇,我覺得有唔妥,所以我要親眼睇下。事先聲明,因為要利用你既工作卡,假如令你有麻煩既,你可以唔參與,我自己再諗辦法。」
「無所謂喇,我今日都辭左職咯...」
「吓?」
「其實唔止我,其他人都辭左...唔講咁多,我可以點幫你?」
「首先,你係正門正常入去裡面,跟住去到地下果層後門有個緊急出口,你張工作卡應該可以開到道門,而就係果度入去...」
等左一陣,終於入到去。入夜後既公司對我來講並不陌生,終於過去十年我大部分時間都係度渡過,甚至住埋係度。我地首先去辦公室,我想確認之前睇到既野。如我所料,枱上既野已被攞走,但我仍有方法確定。
「佢地果然將13號檔攞返出來...」我用電腦翻查檔案記錄,發展13號檔處於使用狀態...
「咩係13號檔?」


「13號檔係我十年前既研究...唔講住,我地去工場睇!」
我地行樓梯落到工場果層(用電梯大張揚吧!),果然如我所料保安加強左好多,而且淨係睇制服同樣,已知佢地係軍方既。我地哩埋一邊仔細留意佢地既動作反應,我已經知道佢地係「服務員」,似乎佢地忽略左一樣最重要既野...「服務員」係我創造既...
「同我諗既一樣,啲守衛都係「服務員」...」我攞出平板準備侵入佢地既系統...
「嘻嘻...我已經搞掂左喇!」April露出俏皮既笑容。
於是我地將佢地個設定改左,變左我地可自由出入,但始終唔肯定所有守衛都係「服務員」,所以我地都唔敢太大動作引人注意,不過我既擔心係多餘既...
工場裡既機器大部都熄左,我地行左一陣,到左倉庫閘口面前...
「你做咩?行喇!」我成個人呆左一呆,若果唔係April係度,我諗我都無咩膽量再入去...
倉庫係儲放一啲未出市場「服務員」或未注入智能系統既身體,同埋一啲修理後回收既殘肢既地方,所以好少人會入來依度。一具具木無表情既身體赤裸咁擺左係度,就好似醫院殮房一樣,所以依度既溫度都比出面低好多,更顯得依度陰森恐怖。
「好凍呀,點解要入來依度既?」雖然April著緊件薄既長袖衫,但仍然靠雙臂互相摸擦取暖。
「因為呢少人,所以我估研究Judy一定係依度!」


雖然我把口係咁肯定,但我個心卻係度問:「究竟我想係度搵到啲咩呢?」
老實講,我唔希望我想像既野出現係我面前,但現實永遠係咁殘酷,而且仲要係超級你想像...
「呢...呢個...唔...」April阻止唔到佢心中噁心感覺,走到一邊嘔左出來,而我淨係呆呆企左係度,望住...望住...我唔知點形容,應該叫屍體,實驗對象,定係垃圾?
眼前既...「東西」身軀部分被剖開,心臟,肺部等器官都攞左出來放係一邊,四肢分離,頭蓋更被打開露出腦部,而眼球更少左一粒...
假如換作平時,我係會亳無反應,甚至開玩笑,但當個臉孔係認識既,而且更屬於我鍾意既人,忿怒哀傷等一湧而上,令我心墮入無底既深淵...