十年,我仲以為已經消失左,原來只係我刻意唔諗唔掂佢,當日既記憶完完整整仲係度...
「Henry,你係度就啱嘞,我有野好想問你...」
我被兩個本來無智能系統但被Danny控制既「服務員」捉住,而Danny就係我同阿June研發出來既人工智能...
「你地人類所講既「靈魂」,係放左係身體邊個部分?係腦定心臟?」
跟住Danny係屍體度攞左個腦出來,個屍體係其中一個陪阿June落來查發生咩事既人之一。Danny徒手將個腦撕開,粉碎,雙手及身體沾滿粉紅色既腦漿...
「無呀,唔係腦部...」木無表情既Danny霎時間攞起擺左係身邊既手術刀,行到同樣被兩個「服務員」捉住既阿June身前,跟住發出冰冷既機械聲,「咁一定係心臟!」
「唔好呀!」我無失聲大嗌,因為我想嗌時,刀已經插左入身體。純白既裇衫漸漸染紅,刀再向下伸延,血不斷湧出,由身上流到腳上。我唔敢再望June身上發生咩事,我淨盯著佢腳上既一對紫色高踭鞋...
「嗱!送俾你嫁,睇下鍾唔鍾意?」
「咩來嫁?嘩!高踭鞋,仲要紫色咁姣?」
「唔鍾意?咁我退左佢嘞!」


「唔係...多謝!」
「我聽晚訂左枱喎!記得著靚啲喎!」
「聽晚?咩日子呀?又唔係你我生日?」
「總之係大日子喇!」
「神神秘秘...」
「先生,入來睇下,想買啲咩嫁?」
「我想買對介子,求婚用既...」
當我由回憶返回現實時,刀已經插左係我身上,淚水已經糢糊左我既視線,果一刻,我睇唔到聽唔到,連痛都感覺唔到,就好似身處係另一個空間咁...
「喂,醒啊,Henry!醒啊!有人來啊!喂!」
April把我由回憶中返到現實,然而當我地正想走時,守衛已經欄住我地去路,而阿Roy同龍哥亦隨後到來,仲有個女軍人。


「韋生!如我所料,你果然來左,鎖機依一著我地都無預計到,不過而家我地唔再須要你喇!帶佢走!」
「你地係唔係攞左Danny出來?」我望住阿Roy講。
女軍人無理我行開左,跟住阿Roy行過來。
「Henry,我都係無辦法先咁做,係佢地迫我...或者對你來講可能係種傷害,但點解唔可以調整下佢,又或者我會比你做得更好呢!」
雖然短短一句,但我從阿Roy既說話中聽得出佢既不忿。一直以來,我同佢一齊為公司奮鬥,但外界總係把光環加係我身上而忽略左佢,我開始體諒佢點解吞左公司...
「我唔理你會唔會做得比我好,總之依個程式有好大既漏洞,好危險,你快啲結束你地個研究...」
「太遲嘞!」女軍人打斷我既說話,「你太遲嘞!我既人已經係上面進行緊測試。」
「你...」阿Roy好驚訝咁望住佢,「你唔係話須要同我既咩?」
「無錯丫,我係須要你...攞佢間公司,本來係想同你一齊合作既,但可惜你人太猶豫不決,我唔鍾意啲人係度晒我時間!」
女軍人講出呢番說話我唔感意外,望住阿Roy,佢除左忿怒之外,就只有無奈...


「好喇!唔好係度晒時間喇,係時候睇下個成果嘞!你地假如有興趣既,可以跟我上去。」女軍人好傲慢咁同我地講,呢一刻我有啲想用粗口鬧佢...
突然全公司響起警報,我心不禁氾起不祥之感...