相信每個毒男心中都有一團火,當然唔係指燃燒自己照亮別人果類高尚情操啦,而係想燒到班囡囡「啪啪」聲(嗱!咪諗衰野啊!我地呢班毒仔好純情架)。


  而毒男往往都係成功令囡囡上火嘅,同埋會出現「啪啪」聲的,不過係嬲到噴火同埋想昇佢兩巴-「啪啪」咁囉。


  既然喺現實世界屈屈不得志,毒男們唯有另闢途徑-手機交友apps。可惜失敗者永遠係失敗者,無論現實定網上,佢地始終係溝唔到女嘅垃圾……啊!!!啊!!!啊……


  至於我最初點解會墜落,好簡單,因為另一個毒男teddyteddy係我一個識左好耐嘅朋友,以前真係毒到冇朋友,不過後來慢慢開始改變,仲溝到女添!不過好快又散左,哈哈。因為毒男始終係毒男,雖則佢唔認為自己係,但身邊嘅人,包括我,都將佢歸類為毒男。




  正正因為呢名「毒友」用apps上左幾個女,令我彷彿見到我人生嘅曙光,就好似流鼻涕時有女神借紙巾俾你、仲要加埋一個燦爛到爆嘅笑容一樣。


  媽啊!原來我仲有希望架。
  (teddy仲有好多正野可以分享,遲下有機會再打)


  雖然知左方法,但我都冇立即行動。點解?因為我係毒男囉,又怕癢又要試,又驚死又冇決心。所以毒男如我一直都係得個諗字。




  結果,我係有一次喺playstore咁啱見到skout,之後先一次過down埋其他,最後wechat、遇見、陌陌等我咩都有。


  但其實我咩都冇……



  Apps我係有,但係囡囡都係冇。




  初頭千篇一律整個hi過去,之後當然千篇一律咁石沉大海。


  偶爾靈感女神黎左,就會有個特別少少(自覺)嘅開場白,如果女神再眷戀少少就可以傾到兩句。


  然後?冇然後喇……


  然後咪@@@@囉!


  現實世界同女仔零溝通,點可能網上變男神?你用個腦諗下都知唔work啦!




  所以初頭我都冇咩心機玩,都係入廁所先開下,然後抱著等中六合彩一樣的心理等人覆。咩話?你話溝女易過借火,點同六合彩比?頂你!你唔係毒男緊係唔知有幾難啦,我話你知,溝女喺毒男角度黎講,比中六彩難一百倍。


  係‧難‧一‧百‧倍!


  直至……


  直至果個女仔出現,先令我有返少少信心。


  姑且叫佢Z,喺Z出現之前,我已經唔知sd左幾多個hi,然後喺漫長嘅等待之後同自己講左幾多次bye。唔好問我有幾多次,因為大雄永遠只會知自己有幾多次測驗考試合格,唔會記得亦冇可能數到有幾多次唔合格。




  總之,好好人嘅Z一次又一次打破左我喺交友apps上面嘅對話紀錄。當然,其實同打破學校運動會紀錄一樣,都係咁冇意思,都係咁easy,都係咁冇人留意。



  Anyway,呢次成功嘅經驗令我有返動力,覺得原來溝女都唔係咁難啫。


  我努力咁講廢話同爛gag,啫係果啲我喺現實生活一定唔會講,而且聽到邊個男性生物講都會投以鄙視目光嘅說話。


  我覺得廢話同爛gag就同M記食物一樣,一樣咁冇營養,但問題係其實我都會食……




  不過多數只會喺一個人果時偷偷地食,所以我亦都只係喺網上用apps溝通,不知對方身份情況下講。


  或者係太耐冇講,又或者係我功力未夠,我竟然……


  無聊到OK幸運星紙巾都講一餐……


  我諗返轉頭都唔明自己係點樣做到。


  但其實又係開心架喎,或者我真係太耐冇輕鬆過。




  又或者其實我唔係歧視人講白痴野,我係怕自己連白痴野都講唔到,所以先扮高深唔同佢地講野。


  原來,我們內心都唔介意白痴,只係睇你有冇機會去白痴。
已有 0 人追稿