天啊！點解我係毒男: 毒男「玩」交友　2

　　自從同Ｚ傾左兩次後，我就好似重新入學咁。學咩？咪就係學點同女仔溝通囉。

　　如果溝女都好似讀書咁可以分階段，我諗我自己最多係小學程度，即係停留喺諗辦法掂下女仔手臂咁。當然我冇付諸行動啦，因為我一唔係有型MK，二唔係可愛小學雞，如果勉強去做，我諗下場只會俾人當做一種動物－色狼。

　　而且……
　　你地唔好唔記得我係喺Apps識女，試問又可以點抽水呢？

　　約出黎點玩法都得？唔好玩啦，約出黎喺我眼中，同送死兩個字根本就冇分別。

　　雖然我講到自己同Ｚ好似好好傾咁，但其實我內心明白，呢種關係喺今時今日黎講只係好普通。





　　普通到如果各位巴打絲打睇完對話內容，可能只會俾我一個中文字：唓，又或者係一個英文字：Fxxk。

　　又或者如果Ｚ知道我咁樣形容我同佢嘅交流，我諗佢都會送我一個字：毒；又或者兩個字：毒拎；甚至三個字：死毒拎！

　　其實喺世俗眼光中，我同佢充其量都只係可以「有兩句」嘅網友，即係人地求其出手都可以做到的嘅地步。而我，就因為咁而開心左一段時間，仲覺得世界有返希望。

　　所以，如果各位巴絲打身邊有毒男腐女，請不忘在得閒時同佢傾兩句咁多偈。呢幾分鐘對你黎講可能係無聊攝時間，但對一班毒仔毒女黎講卻係一個窩心到爆嘅鼓勵。　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　　
　　如果毒係一種病，咁毒男如我，就好似一個癌症病人一樣，唔係話一定醫唔好，但你唔好諗住係一件簡單嘅事，又或者係喺短時間內就可以K.O.。





　　事實上，如果毒男可以短時間內改變，只有兩個可能。

　　一、佢唔係真正毒男，只係打扮老土。所以佢汁一下個look，就好容易溝到女。

　　二、佢經歷左翻天覆地嘅變故，令佢拋棄以往一直相信嘅價值，呢個過程學術啲講係「壓力催人成長」，簡單黎講就兩個字：「開竅」。

　　可惜我兩樣都唔係，所以……

　　我都仲係一個毒男。





　　我仲係一個喺度打故同你地分享「毒海浮生」嘅毒男。

　　講返Ｚ啦。如果頭幾日我地叫做「普通網友」，咁幾日之後我地應該就係「hi bye」網友，都係返工果陣斷斷續續對話答幾句，係加埋幾句，唔係每次幾句！放工之後的時間？我地就好似完全冇識過一樣，再冇喺對方個世界出現。

　　我，彷彿由時光機坐回幾日前，繼續同Apps上嘅女仔有一句沒一句咁對答，不過Ｚ成為左當中嘅一份子，而佢地同時出現喺我心入面個list度。

　　「等88」list！喺Ｚ出現之前，我一直都將回覆自己嘅人放喺呢個list度。因為雖然對方有回應我，但我從大家簡單幾個對答中知道，我根本冇可能成功打開話題，88只係時間嘅問題。

　　當然，呢個list嘅人一直都增增減減。增加係因為想改變，所以不斷搵新人，但結果往往一樣；減少係因為即使我想維持每日幾句，人地都可能嫌我悶，講多句都冇興趣。

　　期間，我有嘗試努力開拓話題，包括學人影下相再sd過去，但結果都係講唔到十句。

　　慢慢，Ｚ已經成為「等88」list中的元老，但情況都係冇咩大變化。我雖然心裡不是味兒，但仍然keep住得閒就搵下佢，直至……

　　直至出現另一個她。我就將全副心力放喺那個她身上，冇再花精力去維持我果個「等88」list，包括曾經令我感受到溫暖嘅Ｚ。





　　原來，毒男都是男人，在未出現更好前，都會選擇維持現狀，即使他有多不滿。