森林裏面遇見你: 六

我比之前更努力工作，因為個腦一得閒，就會不斷諗嘉欣唔再見我嘅原因。

嘉欣個名喺Whatsapp版面上面嘅位置越跌越低，好快就跌出第一版，但我不時摷返佢出嚟，睇下我地之前嘅對話，又睇下佢有冇在線。

佢嘅「上一次在線時間」停留喺我地最後一次通訊嗰日。我好擔心，唔知發生咗咩事。

行屍走肉嘅狀態維持咗兩個禮拜，直至一日，喺我查閱緊《政府部門常用詞彙中英對照表》嘅時候，電話震咗一下，我開嚟一睇，竟然係嘉欣嘅訊息。

「對唔住呀，咁耐冇搵你。我有啲唔舒服，一直留係屋企休息，唔方便見你。」嘉欣2:49PM。



我即刻回覆。

「冇乜嘢吖嘛？邊度唔舒服？😱」家俊2:49PM。

「係啲長期病。我都唔知點講。有機會見面再詳細講。」嘉欣2:51PM。

「Ok。」家俊2:51PM。「咁你而家有冇好返啲？方唔方便見面？我好掛住你！」家俊2:52PM。

「我而家都唔係咁想出嚟，遲啲啦。」嘉欣2:53PM。



「Ok，咁你多啲休息啦。」家俊2:54PM。「你悶唔悶呀？如果悶可以同我chat。」家俊2:54PM。

「咁會唔會阻住你做嘢？」嘉欣2:56PM。

「冇問題，我有一心二用嘅能力。😉」家俊2:56PM。

「👍」嘉欣2:57PM。「Btw，你今個星期日得唔得閒？我爸媽會去參加婚禮，你得閒可以嚟探我。」嘉欣2:59PM
      
「好呀！😃😃😃」家俊2:59PM。      





嘉欣叫我大約中午去到佢度。我十一點幾去到大圍站，再搭小巴去世界花園。

我用嘉欣畀我嘅密碼入去電梯大堂，然後搭𨋢上十一樓。

我企喺A單位前面撳鐘。開門嘅係一個菲傭，佢身形矮小，差唔多俾個鐵閘完全遮住。

入屋之後，我就見到嘉欣企喺離門口唔遠嘅鞋櫃前面。

嘉欣著住一套米白色鬆身長袖衫褲，直髮披肩。佢同我打招呼嘅時候淡淡然一笑，之後就木無表情。

我除鞋，然後著上菲傭遞畀我嘅拖鞋。

「你地傾下先，好快食得飯。」菲傭講完之後就返入廚房。



以香港嘅標準嚟講，嘉欣嘅屋企算係寛敞，裝修用咗近年好興嘅簡約風格，除咗灰色嘅梳化、黑色嘅鋼琴同淺木色嘅地板，所有嘢都係白色，傢俬嘅設計亦好簡單，絶無多餘細節。

嘉欣帶咗我去客廳，我地坐喺梳化上面傾偈。

「你個樣憔悴咗好多喎，係咪好唔舒服呀？。」我問。

「好咗好多㗎喇。先排我一日到黑都要瞓。呢幾日精神咗，做多咗好多嘢。」

「做啲乜？」

「執下嘢、 scan下相囉。」

「Scan相？」



「係呀，我諗住將以前用菲林影嗰啲相scan晒入電腦。其實呢樣嘢諗咗好耐㗎喇，個菲林掃描器都買咗成年，但呢幾日先開始做。」

「咩相呢㗎？」

「咪由細到大影嗰啲家庭相囉。Scan咗可以保存得耐啲。」嘉欣解釋。「你入嚟我房，我畀你睇下。」

嘉欣間房唔係好大，只係啱啱放得落單人床、衣櫃、書枱同一個窄身書架。粉牆、造舊木傢俬、藍底碎花床單、灰色條紋布簾……我覺得自己入咗一間樸實嘅鄉村小屋。

我見到書枱上面有一個好似紙巾盒咁大嘅膠盒，嘉欣話嗰個係菲林掃描器。書枱旁邊有一個一尺高尺半闊嘅膠箱，入面插滿菲林袋。

「嘩，偉大工程！」我驚嘆。

嘉欣示範點樣操作掃描器──佢打開一個好似間尺咁嘅形狀、上面有一排格仔框嘅扁盒，小心翼翼咁將一條菲林平放落去，冚埋個蓋，然後將個扁盒插入掃描器。當掃描器頂部嘅小熒幕出現一個彩色圖象，佢就撳一個圓掣將嗰格菲林掃描，然後再將扁盒推入些少，掃描下一格菲林。

正當我估算緊將膠箱入面嘅菲林全部掃描要用幾多時間，菲傭入嚟同我地講午餐已經準備好。



我同嘉欣由房行去飯廳。餐枱上面有一碟金針雲耳蒸雞、一碟炒菜芯，同兩碗白飯。

「好似好好食喎！」我話。

「係呀，Anna煮嘢唔錯㗎。」

嘉欣夾咗啲雞畀我。我細心品嚐。

「果然有酒樓嘅水準！」

「我地請Anna返嚟主要就係煮飯。以前我地一直都係出街食或者叫外賣，因為媽咪同我都唔識煮飯，但自從爹地有咗糖尿病之後，我地就唔想再食外面啲嘢，所以就請咗佢。」

食完飯之後， Anna清理枱上嘅碗碟，我同嘉欣就坐喺梳化上面傾偈。嘉欣嘅反應比食飯之前更慢，仲不停打喊露。



「係咪好攰呀？」我問。

「少少啦。可能飯氣攻心。」

「咁不如休息下啦。」

「咁又唔使。」講完又打咗個喊露。

我將嘉欣攬到身邊。佢個頭挨喺我心口上面，個口就嘗試繼續講嘢，東拉西扯，雜亂無章。

講講下，佢打咗個乞嚏。

「係咪凍呀？不如入房瞓一陣啦。」我提議。

「唔好，你一場嚟到。」

「唔緊要喎。你瞓一陣，精神啲再繼續同我傾偈啦。」

嘉欣最終都肯聽我講。佢瞓上床之後我幫佢冚被同拉埋啲窗簾。

嘉欣平瞓咗一陣，然後轉向窗嗰邊。見到佢嘅身體喺被下面緩慢而規律咁起伏，我就靜靜行出房。

嘉欣仲未講畀我聽佢有咩病，所以我個心仲係忐忑不安。我知道嘉欣唔係想隱瞞，只係比較慢熱，只要我同佢傾耐啲，佢自然會講。

我坐喺梳化上面玩《Kingdom Rush Origins》，過咗兩關之後，見到Anna攞住地拖同水桶喺廁所出嚟。

Anna見我一個人坐喺梳化上面就問：

「小姐瞓咗？」

「係呀。」

「佢平時瞓到一兩點先起身㗎，但今日好早就起身等你嚟，所以應該好攰。」

「哎呀，我只係想探下佢，冇諗過搞到佢咁攰。」

「呢幾日好咗啲㗎喇，先排佢由朝到晚都瞓喺床上面，食飯都唔出嚟。我將啲飯餸拎入去，太太就話唔好，怕佢就咁一直留喺床上面喎，但佢地叫極佢都唔出嚟，卒之都冇辦法，要拎入去畀佢食。幾日之後，佢終於肯出房，但都係坐喺梳化上面發吽哣，叫佢食飯佢冇反應，隔咗一陣先好似突然聽到我地講嘢咁，慢慢行去飯枱。」

「知唔知佢咩事？」

「應該係啲心裏面嘅病啦，先生太太話佢成日唔出聲，將啲嘢擺晒喺心入面，都唔知佢諗緊咩。」

Anna講講下坐咗喺梳化上面。我望清楚佢個樣，發覺佢五官嘅位置同比例都恰到好處，但黝黑嘅皮膚上面有好多暗瘡，亦有皺紋。

Anna喺褲袋攞個手機出嚟，撳咗幾下，然後遞到我面前。我見到屏幕上面有一個十七、八歲，笑到將一排潔白嘅牙齒露晒出嚟嘅少男。

「我個仔。啱啱入咗大學。」佢好自豪咁講。

「又靚仔又叻仔！」我豎起手指公。

跟住佢畀我睇佢個仔由細到大嘅相。

「我喺佢三歲嗰時就嚟咗香港做嘢。」佢回憶。「我都唔想㗎，不過冇辦法啦，我同老公離咗婚，要搵錢，唯有將佢交畀阿爸阿媽照顧。嚟到香港，咁啱老闆又有個仔，又係三歲，我每晚揞佢瞓嗰陣都會好掛住個仔，有時仲會喊咗出嚟。少爺仔就叫我唔好唔開心，又攬住我，又鍚我。我地感情好好。到佢十幾歲唔使我照顧嘅時候，老闆就叫我走。」

Anna跟住講佢之後嗰個老闆點樣無良。當講到個老闆半夜三點叫佢起身燙衫嘅時候，我地聽到有啲聲喺嘉欣間房傳出嚟。

入到房，我見到嘉欣擘大雙眼，但似乎仲未醒。佢定晒神咁望住我，令我覺得自己正喺佢個夢入面同佢相遇。

我走埋去，坐喺床邊，佢就一路望住我，一路將右手伸向我。當纖長嘅手指掂到我個下爬，佢就合埋雙眼，好似用心感受緊我啲鬚根嘅硬度同鬚根喺皮膚上面產生嘅觸感。佢摸咗成分鐘先放抵手，跟住擘大眼對我微笑。

我鍚咗佢額頭一啖。

「今朝唔記得剃鬚。」我話。

「我鐘意呢種感覺。」

「咁我以後見你都唔剃鬚。」

佢又笑咗一笑。

「細個嗰時，我好鍾意摸爹地啲鬚根。」嘉欣望住天花板，好似天花板上面播放緊回憶中嘅片段。「嗰時爹地媽咪都要做嘢，將我擺喺留下個姨姨嗰度，但冇幾耐個姨姨移民，於是就將我交畀大伯娘湊。大伯娘住得好遠，佢地星期六先會接我返屋企。返到屋企，媽咪會幫我沖涼，爹地會坐喺我床邊講故事，我就好似頭先咁摸佢啲鬚根。到咗星期日晚，佢地又送返我去大伯娘度……」

「……大伯娘有兩個女，一個大我五年，一個大我三年，佢地唔同我玩，仲成日整蠱我。佢地將我最鍾意嘅公仔收埋然後叫我去搵。我搵咗好耐都搵唔到，一日之後，佢地先話擺咗個公仔落垃圾桶。我打開垃圾桶係咁摷，但都係搵唔到，佢地就喺旁邊大笑，話個公仔已經去咗堆填區。我覺得好似冇咗個親人咁，好傷心，晚晚以淚洗面。佢地又成日推我去窗邊，話要掟我落街。佢地一個抱住我，一個用力將我個頭推出窗外面，我由廿幾樓望落去，覺得好驚，於是咪埋眼，但咩都睇唔到仲驚……」

「……有次媽咪嚟接我嗰時無意中見到佢地推我落地，於是辭職，自己湊返我，但冇幾耐之後又出返去做嘢。爹地份糧本來夠養我地一家三口，但佢地買咗太古城，媽咪要做埋嘢先夠錢供。佢地搵唔到其他人湊我，又送返我去大伯娘度。每次同佢地講拜拜，我都會摸爹地啲鬚根，嗰種拮拮地嘅感覺令我覺得實在一啲。見唔到佢地嘅時候，我將自己韞喺自己嘅世界入面，無論外面發生咩事，只要喺自己嘅世界入面，我就覺得安全……」

「……我無怪爹地媽咪，我知道佢地好鍚我，我知道我好幸福，人人都覺得我好幸福，如果唔係佢地努力搵錢，我點會食得好著得好，有得學琴，仲有咁多玩具玩？我而家點可以乜都唔做仲仍然有飯食有屋住？但你信我吖，我唔係想好似而家咁㗎，我想做嘢搵錢，養自己，養埋佢地，可惜我做唔到。我知道人人都唔鍾意返工但人人都咬緊牙關咁做，但我就係做唔到。唔知係我特別懶，定係我特別冇用。」

嘉欣從未試過喺我面前講咁多嘢，或者佢喺呢間昏暗嘅房間入面先可以放鬆落嚟，或者佢瞓喺自己張床上面先能夠舒舒服服咁盡訴心中情。佢一路講嘅時候，面上一路都冇表情，語調亦好平淡。我諗呢啲事佢已經諗過好多次，再激唔起咩情緒，又或者，講到某啲位嘅時候佢個心流緊眼淚，只係我見唔到佢個心。

「其實我以前都做過幾份工。第一份係management trainee。開頭我好似其他人有上進心嘅fresh grad咁，肯學肯做，任勞任怨，但過咗一兩年，我開始覺得好攰，由肉體到靈魂都好攰，而最大問題係，無論幾攰，夜晚都瞓唔著。然後，我覺得自己嘅工作表現好差，冇做錯嘢我都覺得自己做錯嘢，如果真係做錯嘢，就覺得自己犯咗彌天大罪……」

「……每日鬧鐘響嘅時候我都好痛苦，我唔想返公司，但我係個有責任感嘅人，所以都逼自己返去。有時做做下嘢我會衝入廁所，匿埋喺廁格度喊。我好憎間公司，好憎自己做緊嘅嘢，更加憎我自己。我諗過自殺，但又怕痛。我聽講燒炭冇咁辛苦，但間屋會變成凶宅，樓價起碼跌三成……」

「……有一日，我真係起唔到身，我覺得個身好似綁咗幾百個鉛球，好重，重到郁唔到。我攤喺床上面幾日，爹地媽咪問我咩事，我講唔出。後來佢地帶我去睇醫生，醫生話係情緒病，開咗啲藥畀我。我辭職休養，大半年之後，情況就穩定落嚟，我覺得自己嘅狀態比任何時候都要好，甚至唔覺得自己病過。我搵咗份新工，過返正常生活，但維持咗唔夠兩年，就舊病覆發，又要再食藥……」

「……後來我轉做鋼琴老師，以為壓力會細啲，但情況都係一樣。起初我覺得自己教得幾好，但教教下就覺得自己誤人子弟。每次諗起個琴房，或者諗起啲學生，心裏面就會有一種極度厭惡嘅感覺。我覺得自己好失敗，唔知點解細個俾人欺凌嗰時冇病發，反而大個咗先變成咁。可能細個成績好，琴彈得好，成功感撑起我成個人。出嚟做嘢之後，我冇咗成功感，連唯一嘅支柱都冇埋。」

嘉欣講到呢度停咗落嚟。

我仲消化緊佢講嘅嘢，唔知應該點樣回應。

「你拉我起身吖。」嘉欣伸直雙手。

我捉住佢對手，慢慢拉起佢。



出到客廳，Anna問我夜晚會唔會留喺度食飯，我諗咗一諗，然後同嘉欣講：

「不如我地出去食。」

「一於咁話啦。」Anna即刻搭口。「小姐，你出去行下，順便俾我偷下懶啦。」

嘉欣微笑點頭。
 
嘉欣話出去之前要準備下，我唔知要準備啲咩，淨係見佢一時走入廁所，一時走入睡房，來來回回，用咗成個鐘先準備好，而我認為佢同一個鐘之前嘅分別只係換上咗衞衣同牛仔褲。

我地慢慢行落斜路，再經斜坡上面嘅樓梯行去大圍鬧市。我地逛咗一陣，然後入咗一間舊式茶餐廳。

當伙記將嘉欣叫嘅肉餅飯同我叫嘅乾炒牛河擺上枱面，我地都嚇咗一跳。兩碟嘢都堆到山咁高，足夠三四個人食。嘉欣好努力咁食都食唔晒，我諗住幫佢食埋淨低嗰啲，但食完自己嗰碟就已經飽到上心口。

我地由原路折返，穿過鬧市，行上山坡，然後四周又再次變得寧靜。

「家俊。」嘉欣個口叫我個名，對眼就望住地下。「我而家嘅情況反反覆覆，可能暫時都唔可以同你再進一步。」

我沈默咗一陣，然後坦白咁講畀佢聽有關Vivian嘅事。

「你係咪覺得我好衰？」我問。

嘉欣拎頭。

「知道你都未準備好，我反而覺得輕鬆啲。」佢話。「我唔想你因為我嘅病而受苦。」

我喺心裏面話「我好想同你一齊」，但冇講出口，一來我覺得自己未有資格講，二來我唔知自己有冇能力令佢開心。

送咗嘉欣返屋企之後，我又行落斜路。

我後悔我冇講。