女神話我考試排名高過佢 就滿足我一個願望: 第二十五章

由細細個開始，我就覺得呀媽係一個好貪錢嘅人。

無論我想佢做乜，佢第一時間就問我攞錢。

可能係呀爸都覺得呀媽太貪錢，佢份遺囑完全無提過呀媽個名。

但係呀媽對呢樣野完全冇反應，只係接手呀爸間公司，變得更加貪錢。

「喂！做乜呆哂呀？啲餸凍啦！」雪彤説。



「哦。」我説。

「你究竟去咗邊呀？一返嚟就心不在焉。」雪彤説。

「冇呀......」我説。

「你又揾咗呀媽幫手呀？」雪彤問。

平時又唔見你咁醒目……



「冇呀冇呀……食飯啦！」我説。

食完之後，我就返上房攤喺張床到。

好攰呀……

陳桂方條仆街唔會唔認數掛……

「叮噹！」有人whatsapp我。



會唔會係曉琳呢？

我攞起手機，結果真係曉琳。

曉琳：雪雪

曉琳：聽日一唔一齊返學呀？

我：好呀

曉琳：yay

我：咁我地喺邊到等呀？

曉琳：七點九喺你屋企門口等



曉琳：反正我一定早過你起身

我：超……

曉琳：就咁話啦

之後曉琳就下咗綫。

好似俾曉琳睇小咗……

哼！聽日早啲起身串返佢先！








「喂……喂！起身啦！遲到啦！吖！」有人説。

嗯？

我睜開眼，見到曉琳伏喺我身上。

佢塊面即刻紅哂。

曉琳起返身，面紅耳赤地説：「我……我見你咁……咁耐都未出嚟，咁啱門又冇鎖，我一入去你間房就咁啱見到你仲瞓緊，咁啱嗌你嗰陣我又跌親，所……所以先……咁啱伏喺你身上咋，唔……唔好誤會呀！」

「一定有咁多『咁啱』啦！」我笑説。



「哼！正衰人！快啲起身啦，就嚟遲到啦！」曉琳説。

「係喎……」我即刻起身。

梳洗完，食埋早餐之後，我同曉琳就衝咗出門口。

嗄……嗄……點解每次都要跑返學校……

「再跑快啲啦！」曉琳催促。

曉琳跑步咁勁㗎咩？

「點解……你可以唔喘氣㗎？」我問。

「我話哂都係學校運動會千五米冠軍，呢啲路程嚇我唔到嘅。」曉琳説。



ok you win.

我同曉琳以全速跑返學校，好彩啱啱好冇遲到。

「呼……日日咁跑法，真係命仔都短幾年呀。」曉琳説。

「我錯囉……」我無奈地説。

「嘻嘻……」

林浩雪！講好嘅早啲起身呢？

班上面啲人知道我地復合之後，都冇太大反應，反而喺到譏笑我。

「咦？陳曉琳又換新仔呀？今次可以頂到幾耐呢？」

「嗰條仔係林浩雪喎，咁我賭一個月啦！」

「你太過高估佢地啦，我賭一日！」

「雪雪，佢地講緊咩呀？」曉琳焦慮地問。

「你呀爸冇同你講呢三個月發生過嘅事咩？」我問。

「冇呀，呀爸乜都冇同我講呀。」曉琳説。

我將呢三個月發生過嘅事一五一十同曉琳講，當然，我隱瞞咗救佢出嚟嘅經過。

「佢地……點可以咁對我㗎？我做錯啲咩喎？」曉琳眼眶泛紅。

「唔好喊啦，錯嘅都唔係你。」我説。

「嗯……」曉琳擦一擦眼。

跟住曉琳悶悶不樂咁伏喺張枱到，我就嘗試令佢笑返。

「唔好咁唔開心啦。」我説。

「……」

「笑返啦！」我説。

「……」

「笑返先靚女㗎！笑下啦！」我説。

屌，點解而家好似變成我先係令到曉琳傷心嘅元兇……

「即係話我而家唔靚女啦……」曉琳憂傷地説。

shit我好似講錯野……

「唔係呀唔係呀，你而家都好靚女呀，只不過笑咗嘅話會再靚女啲！」我説。

「口花花……」曉琳沒好氣地説。

「嗚……快啲笑返啦……」我説。

「雪雪呀？」曉琳説。

「嗯？」我問。

「我想呢……都係冇野啦。」曉琳説。

奇奇怪怪……

「你想我俾咩反應你……」我説。

「嘻嘻……」曉琳笑咗。

話説我好似唔記得咗啲野，係咩呢……

嗯……
----------------------------
好吧我已經十七日冇更文……
對唔住各位大佬！
我開咗一個fb帳同埋ig帳(唔好問我點解開ig帳)
大家可以嚟支持下
fb有幾篇文喺到，ig我未更新過。
fb:snow moon
ig:wild_flower_snow_moon