失戀200天後,我遇上的女孩們: 第十七話
時間回帶到一年前既三月八日...
「你有無盡過男朋友既責任呀?」就因為呢句,我同Belle分手了。本來當晚行完街,便去佢屋企過夜,點知係送屋企途中嗌交,當佢拋出呢一句,我唔想同佢嘈所以走左,我認為當依個係最恰當既決定,但第二朝佢傳來訊息:「多謝你一直以來既照顧。」於是我地分手了。
本來,知道佢想搬出去打算當年同佢同居,本來打算搵份收入高啲既工,咁就可以養埋佢,本來打算放棄玩左三年既泰拳減少啲支出,本來...就係差一啲啲,一切都失去了。
「你今晚得唔得閒?我十一點收工去你度見你...」兩個月後,佢打電話俾我,本來我打算見過就正式結束依段關係,但...
「唔好分手好唔好?我好辛苦,我日日受良心責備,佢係好,但佢有老婆同仔...」佢攬實我講左呢段說話。我唔敢相信自己耳仔,呢個消息對我來講太震撼,震撼到我都唔知應該點做。失而複得既感覺令到我蒙蔽左自己,亦間接令我作出一個好蠢既決定--我接受返佢。
或者你地認為接受返一個人點會係個蠢決定,但係我就蠢在相信佢地無再見面,相信佢唔再搵個男人,相信...相信佢仲愛我...
跟落去既幾個月,可以話係我人生中最傻最蠢既時光。明知佢整蛋糕唔係俾我,我依然幫佢買生果買材料;明知佢唔開心係因為同個男人嗌交,我仲要陪佢飲酒扮醉,仲要呃佢話個男人會離婚娶佢;明知佢唔愛我,我仲要買介指同佢求婚...明知一切唔可以返轉頭,但我仲依然等佢回心轉意...
直到一次,佢電話壞左要買新,由於佢要返工唔方便去買,因此即使當時我扭親左隻腳,但我仍然堅持幫佢去買。當時佢同我講無搵個男人好耐,我好天真以為我地可以重新開始,而當我查看舊電話既資料係唔係過晒新電話度時,我睇到佢同個男人既合照,再睇返儲存日期...果一刻我知道破鏡係唔可以重圓,永遠都唔可以...
當晚係我地最後一次見面,送到佢返屋企樓下,攬左佢一陣,我知道係最後一次,果個感覺...跟住我搭車時傳左個訊息俾佢:「攬住一個唔鍾意我既人,比起攬住一個我唔鍾意既,仲辛苦...」而佢只係傳「sorry」俾我。
近三年既感情就以簡單既五個英文字母作終結,「S.O.R.R.Y」,三年感情就只有這五個英文字母,我不甘心...
三年感情竟敵唔過幾個月既花言巧語...
因為佢唔再愛我!
我竟然比不上一個四十幾歲有老婆同仔既阿叔...
因為佢唔愛我!
我為佢做咁多野付出咁多,佢都無動於衷...
因為佢從來都無愛過我!
當晚我成晚訓唔著,口裡不停咒罵佢地係姦夫淫婦狗男女,拳頭無一刻放鬆過,牙齦更因長時間緊咬而出血。更顛既係第二朝我不停打電話詛咒佢騷擾佢,佢cut我線就再重新打俾佢,甚至令佢熄埋電話...當自己冷靜過來之後,先發現自己係三個鐘內打左257次俾佢...
當日我連工都無返,癱係張床度,腦海不斷回憶同佢一齊既時光,睇返同佢影既相,眼淚就如缺堤一般湧出...
每當係街度見到情侶拖手時,就會諗起以前有時佢隻手捉得太緊整到我手好痛;見到情侶相擁時,就諗起以前鍾意從後抱住佢,佢既體溫令我感到溫暖,亦我覺得自己在保護緊佢。但而家那種感覺,那種溫暖,失去了消失了...
「喂...喂...阿郭...你係唔係度呀?」Belle焦急問,將我拉回現實。
「係...你做咩喊呀?你而家係邊呀?」我聽到佢果邊背景係室外。
「我係堅尼地城呀...嗦...我想問...嗦...whatsapp有上線呢,咁係唔係佢睇到嫁?」
「你唔好理啦,你返左屋企先啦,而家咁夜,又凍又落雨...」我望出窗,雨仲落得好大,而且我擔心佢安危。
「你唔過來呀?我想見你啊!你係邊呀?」
「吓?我而家唔係咁方便,而且我唔知點去你果邊...」其實我而家淨係著左條底褲,褸住件褸,縮左係廁所度...
「你真係唔過來呀?...咁樣我叫左的士先,陣間先再打俾你...」
佢收左線,此刻我心情無比複雜,心裡有埋積如山既問題問佢。大約兩三分鐘後,佢打電話返來...
「喂...」佢語氣有啲有口難言...
「個男人...拋低左你係佢樓下?」我語氣帶點忿怒。
「其實依個係第二個來...」吓?「係我做兼職識既...有老婆果個...啊!我架的士來喇,我上左車再同你講。」
「喂!」佢講完目的地俾司機,跟住同我講:「其實係我自己晚麻麻來搵佢,點知打電話又無人聽,係佢樓下又等唔到佢...」
「咩男人黎嫁?又凍又濕,就咁拋低你一個女人係出面?係唔係人呀?」我分唔清我既忿怒係源自對佢既愛定只係單純咁想保護佢,但我更不忿個男人咁對佢!
「我...嗦...嗦...」佢一時間唔知點講好...
「你到左屋企未呀?」
「就到,而家過左西隧,就到油麻地...」
「嗯...返到屋企,沖過熱水涼,訓個覺,訓醒就無野嘞...」
「嗯...我到喇...遲啲再搵你喇...拜拜!」
「嗯...咁就好喇,第時再傾,拜拜!」
我收線後,出左廁所,Tracy就坐左係梳化度...
「做咩咁夜仲傾電話既?」Tracy過來問我。
「唔係,頭先發惡夢責醒左,點知無啦啦電話響,唔想嘈醒你,於是走左入廁所講,點知原來係玩電話,又咁啱肚痛,咁就痾到而家囉。」費事解釋咁多同令佢誤會,就只有暫時瞞住佢先。
「你食錯野呀?你去左好耐喎,無事嘛?」原來已經差唔多五點...
「吓?無野,痾完舒服晒啦...嘩!好凍呀,快啲返房同我取暖啦!」
「凍就著衫啦!」
然而,我雖然係Tracy身邊,但我個心仲係掛住Belle...
我~留著你在身邊~心~仍然很遠~
我想雙手拉近點~竟捉不到那邊~
但這一點點~就這一點點~卻很遠~