男校生活史･回到起點: 第四章 好朋友2

我再望多個女仔一眼, 就發現佢好熟面口, 但係我又真係唔記得喺邊度見過佢。

我一直諗, 諗諗下就已經行到佢面前。
 
「Hi...你使唔使幫手呀?」喺我完全唔知道有咩講嘅情況, 我就講咗一句廢話出嚟。但作為一個細心嘅男人, 當然都要有包紙巾喺背後。我毫不猶豫咁攞咗張紙巾畀佢。
 
「唔該你。」個女仔細細聲咁講。
 
佢坐低咗一邊, 跟住我就畀咗一系列嘅Suggestion佢, 即係你要頭向前傾, 緊壓鼻子內側, 最好暫時改以用口呼吸......
 




其實我真係唔係好想講呢啲嘢, 因為一個正常人應該都識得點做, 但既然我都行到過去, 就只能照我學到嘅嘢去幫佢。
 
無可否認佢真係幾靚女, 雖然佢矮我大約一個頭位左右, 但係都幾可愛, 而且個樣都幾純, 應該都唔係啲爛口嘅女仔。
 
我個心唔知幾時係咁喺度估。
 
「Er......我學校就打鐘......我返去先啦。」唔知點解我嘅心跳真係跳得好快, 搞到仲出咗啲汗。
 
我將成包紙巾畀咗佢, 之後就走開咗, 而佢亦都冇同我講啲乜嘢。
 




話說......同女仔講嘢真係好唔慣。雖然小學都係讀緊男女校, 但畢竟都係男校醞釀咗我五年, 同女仔講嘢嗰種感覺真係好似好陌生, 仲有啲驚添。
 
我一路行返去同班同學會合之際, 佢哋就喺度拍曬手掌。係呢一刻, 我真係感到好尷尬, 點解當初唔係你哋去幫佢呢。
 
我諗返轉頭, 佢哋幾個都有曬女, 而只有我, 係毒L。古語有云, 中學生不應談戀愛。老土, 而家咩時代呀, 不如你繼續盲婚啞嫁呀。其實我都唔知, 愛情真係唔可以亂嚟, 因為一鍾意就要鐘意一世。
 
喺我呢十多年嘅經歷入面, 我經過多次朋友之間嘅友情破裂, 我明白自己係一個好難經得起考驗嘅人。雖然我會克服, 但我亦唔希望再會發生。我對友情睇得好重要, 所以我明白自己對愛情會睇得更加重要。
 
「喂!」
 




「喂! 喂!」佢哋一直講嘢我都聽唔到, 直到佢哋呼喚番我嘅靈魂返嚟。
 
「你哋頭先講緊乜嘢呀......」
 
「見到人流緊鼻血又無助之際, 你竟然問人哋使唔使幫手, 你係咪傻咗呀。」Scanner裝作愛情專家, 同我分析。
 
「咁我有啲怕醜同驚嘛, 我都唔知有咩講......」
 
「其實好簡單, 當我哋預到一啲新事物或者新嘗試嘅時候, 可能都會有種緊張嘅感覺, 呢一種感覺同我頭先所做出嘅行為呢, 正正就係一模......」今次到我裝作心理學專家, 同佢分析。可惜, 我未分析完, 已經叫我收皮。
 
「有條女咪幾好, 唔好成日走去溝仔仔啦! 」Johnny又一副正經樣咁同我講。
 
「那那那......玩同溝係兩樣嘢嚟嘅。講嚟講去都唔明, 我講咗三年啦。」我喺語氣上, 加咗少少火藥。
 
「唔好嬲啦......」Johnny扮可憐喺我面前。




 
「你激嬲娘娘, 娘娘唔派軍糧啦。」估唔到呢一刻傑仔都加入戰團。
 
<故事待續......>

.......................................................................................................................
呢篇好多心理描寫.....
如果大家覺得好睇就留個言啦! 支持一下小弟~
22/12/2016: 第五章.