[有沙入眼]是咁的，我覺得我住嗰度有啲唔妥: 32相見

我第一個反應係覺得自己都係鬼，正常人睇我唔到，但我唔想承認依個事實，所以繼續求救：「肥佬！我喺依度呀！救命呀！」

身體又畀怪手拉近屋內，而肥佬亦皺一皺眉，準備要翻入屋。

我用力想扯開怪手，但再次確定我無辦法憑一己之力甩身，所以一定要肥佬嚟幫我手。但係點先可以令佢睇到我呢？

大腦不停運轉，即刻記起句問候伯母嘅重要性，之前就係屌完佢先好似有啲反應唔再鑿牆。

搏一搏啦！我重複之前講過嘅句式，希望肥佬有反應：「屌你老母！過嚟幫我呀！」



粗口萬歲！

肥佬好似如夢初醒咁，突然發覺到我嘅存在，同埋捉住我隻腳嘅怪手。

「嘩？！咩事？」

「救咗我先講！」

肥佬「哦」一聲，就拎起個錐同鎚，即係佢鑿牆嘅工具，對住怪手一野揼落去。