[有沙入眼]是咁的，我覺得我住嗰度有啲唔妥: 205幸運
「如果有一日我都可以去潛水，喺海入面見到依啲魚就好喇。」
當時嘅我地，連海都未親眼見過。月曦對海有一種浪漫嘅憧憬，但係我對海洋就有一種莫名其妙嘅厭惡。依種厭惡嘅起源係喺邊度滋生嘅呢？已經唔記得咗。
我繼續鍾意恐怖故事，而月曦轉為鍾意海底世界。就算佢仍然會同我一齊睇鬼故事，但我知道佢個心真正諗緊嘅係海洋。不過年紀仲細嘅我，仲未肯咁快接受現實住。我抱住一絲希望，想令佢回心轉意。
唔係單純陪我睇，而係好似以前咁，大家都真心鍾意恐怖。
當時我仲未理解得到，依個世界，有啲野翻唔到轉頭就係翻唔到轉頭，只能夠接受。
幸運嘅係我地仲細，好多事物都未接觸過。有啲野，細個唔會睇得咁清楚，亦唔需要睇得咁清楚。