我發現左我呀哥成日對住部電話講一種我聽唔明既語言: 6 血債血償

「你想做d咩？」呀樂聽到我叫呀峰帶「呀哥」上天台，瞓係病床到好凝重咁問我。
「唔好意思，比我係呢到落一落一車，麻煩你地照顧佢。」我冇理到呀樂既問題，同救護人員講。
架車停低左，呀樂捉實我隻手，講：「呀言！唔好！唔好做傻事。」
我好似下定決心咁，對佢講左聲「對唔住」，就落左車。
我係路邊截左架的士，衝返屋企大廈。去到樓下，已經見到好多警察守住各個門口，唔比人出入。岩岩個大粒野比左個電話我，叫我地係醫院治療完打比佢，佢搵人黎落口供。我即刻打比佢。
「喂！呀sir, 我係岩岩先個個，你地係咪搵唔到個男人？我返左屋企大廈，但d警察唔比我入。你可唔可以同佢地講聲，比我入去幫你地手搵。我本身綁左佢係我屋企。」
「遞個電話比d伙計。」
佢地傾左陣，就好快咁放左我入去。我搭笠上到自己屋企，見到「呀哥」唔係到。
扮到好驚訝咁講：「點會咁架？明明我綁左佢係到。我再周圍睇下。」
D警察見我冇用，都冇理到我。我扮行去後樓梯搵，去左後樓梯見冇人，就衝左上天台。去到天台門口，我見到呀峰，呀聰同「呀哥」。




我係天台門口叫：「呀峰，呀聰，出黎呀！」
佢地見到我即刻衝出黎睇下我有冇事。我即刻拎左佢地兩個枝槍，大力撞左佢地兩個落地下，之後就衝入天台度門，關埋度門，將度門鎖埋。
呀峰，呀聰都反應唔切，企返起身之後，佢地係咁拍度天台門。
「呀言！呀言！你攪咩呀？你想點呀？」呀聰係出面大嗌。
「呀樂呢？呀樂去左邊呀？」呀峰問。

我係天台對住門口大叫：「你地走啦！唔好理我，我唔想連累你地。你地就當今日咩到冇發生過，咩都唔關你地事。」
「砰！砰！砰！砰！砰！呀言！你想點呀？冷靜d！唔好亂黎呀！」佢地聽到我咁講就更加大力同更快咁拍門。
「走呀！我叫你地走呀！」我對住門口大嗌！
講完之後我冇再理佢地，行左去「呀哥」到。而「呀哥」既表情十分驚訝，佢估唔到佢等緊既竟然係我。




我冷笑，然後對佢講：「你以為你d同黨會黎救你？哈哈⋯哈哈哈⋯佢地已經比警察押走曬啦！」
佢聽完好驚訝咁望住我講：「你想點？」
「你放心，我唔會交你比警察住，（我捉住佢衫領）我要你還返塊面比我呀哥。」我咬牙切齒咁對住佢講。
佢聽左之後，個樣變到好驚咁，又扮曬冷靜咁講：「你咁做犯法架！要坐監架！」
「我已經唔在乎啦！你殺左我呀哥同家姐，我要你血⋯債⋯血⋯償。」我兇狠咁望住佢。
我將兩支槍放左落地下，一腳踢到好遠。之後係附近執左支鐵通。我一面大力揮兩揮支鐵通，一面同佢講：「我唔會一槍打死你咁益你！我要你死得比我家姐呀哥更痛苦。」
我舉起支鐵通一野野毆落去佢到，我腦海不停浮現呀姐呀哥條屍比勾住吊起個樣，我就越嬲，我就打得越用力。但我避開佢塊面，因為塊面係呀哥既。
「呀！呀！⋯呀！」『呀哥』痛苦咁叫喊，但無奈佢比我綁住左，完全反抗唔到。
我一下一下咁舉起支鐵通，一下一下咁毆落去。一面大嗌：「痛？（啪）係咪好痛呀？（啪）你知唔知我家姐呀哥都好痛呀？（啪）呀⋯⋯⋯（啪）點解你要咁對佢地？（啪）點解呀？（啪）」
我癲左咁不停毆「呀哥」。




突然「呀哥」講左一句：「細佬！細佬！」
聽到之後我停低左手上既動作，佢繼續講：「細佬！你記唔記得上個月我地先好開心咁同媽咪慶祝生日？細佬！我地重新黎過啦！」
我聽完之後腳步不穩咁向後退。
心諗，點解？點解？眼前呢個明明唔係我呀哥，但佢個樣同把聲同佢一模一樣。點解？本來⋯本來我地可以好開心咁生活架！本來我地可以架！

待續

#有興趣歡迎讚黑柴Facebook
https://www.facebook.com/%E9%BB%91%E6%9F%B4-879053098899020/