失控性.行為: 第九節

圍觀的人群開始悄然散去。
 
黃生立即吩咐保安部同事抽調人手，並安排兒童遊樂場為「梗」位，亦即是說需要安排保安員二十四小時監視遊樂場，要求他們就狗主的行為隨時作出匯報。
 
說完後，我們和黃生便往遊樂場的方向行去。
 
「許生！」黃生向著遊樂場內的老人叫著。
 
「黃經理！」老人也揮手回應著。
 


「今次真係多得你肯即時落黎幫忙，如果唔係呢件事都唔知點收科。」黃生說。
 
「客咩氣呀，我都係帶個孫落黎玩暏，不過點解搞成咁呀？呢班狗主想將平台變成佢地既私人遊樂場呀？」
 
「一言難盡啦，你放心，我地會跟進架啦。」黃生握著老人的手說。
 
一番寒暄之後，我們便回到管理處。
 
沿途我在想，剛才黃生說「多謝老人肯即時落黎幫忙」，即代表黃生早在出來處理事件之前，已經聯絡其他業主到來幫忙？如果真的是的話，可以想像到黃生在處理危機的能力是多麼的強，倒不像我們「戇嶋嶋生勾勾」，站在遊樂場外看著狗主肆無忌憚的罷佔遊樂場。
 


可是，我還是很擔心黃生，因為我知道何小姐的性格絕不會就此罷休。
 
「開個urgent meeting 先，阿文，你叫埋BoBo同保安部阿頭入黎。」黃生說。
 
「好，我而家叫！」
 
忘了叫訴大家，36E的名稱叫做BoBo，一個極容易讓人混淆BallBall 與BoBo的名字。
 
我們在會議室內坐在一起，等待黃生給我們的指示。
 


「各位，大家今日會好忙，你地都知何小姐唔會咁易放棄遊樂場，一定會繼續用唔同既方法試圖名正言順咁踩入兒童遊樂場，我想知你地有咩睇法同埋有咩建議。」
 
「黃生，我建議我地先將今次既事以電郵形式通知其他委員打定底先，睇下佢地同唔同意兒童遊樂場響冇其他小朋友既時候開放俾狗主用，如果佢地同意，我地大可以將個波彈俾佢地，咁有客問或者投訴，我地都可以話係已經獲得業主委員會同意，而我地管理處就只係跟住指引做。」阿和說。
 
BoBo和保安主管也點頭同意阿和的建議，其實我們根本不用什麼也與業戶對著幹，對於如此影響業戶的決定，我們還是由委員會的人決定好了，我們根本不用背負什麼責任，這個屋苑變成什麼樣也好，對管理公司而言，「經理人酬金」袋袋平安，對管理處的職員而言，我們的薪金也袋袋平安。
 
「唔……….我同意阿和你既建議，不過有時候我地管理公司都要作出應有既建議同埋俾一啲專業既意見佢地，其實大家都知如果真係俾狗入左去遊樂場，就算冇人冇小朋友，但係狗都會隨處便溺，到時小朋友去遊樂場玩接觸到狗屎狗尿就唔好。」黃生說。
 
「但係何小姐話總經理應承左佢喎，黃生你頭先仲要當眾落何小姐面，佢一定會向總經理投訴你，到時分分鐘連工都冇得做呀。」我說。
 
「係囉，係囉，唔好同佢地硬碰啦！一於聽阿和咁講，交俾業主委員會決定啦！」BoBo說。
 
「唔………我知你地關心我，不過我都有自己既堅持……阿和，你而家幫我發電郵出去俾其他委員，睇下佢地既意見係點先，阿昇你就繼續跟我既指示，安排其他保安長駐在兒童遊樂場先，另外，阿和阿文BoBo，你地三個幫我睇下有冇熟客係有小朋友既，攞佢地既House File俾我！」
 
「係！知道！」


 
我們接到黃生的指示之後，便根據著黃生的吩咐跟進工作，由於同時間，早上有太多不同類型的單位投訴事件需要處理，我們忙得不可開交。
 
很快便去到中午，亦即是我們管理處的午飯時間，當預備食飯的時候，我們接到保安部的通知，大批記者聚集在屋苑門外，要求見屋苑經理黃生還有助理物業主任張卓文……..
 
張卓文，即是小弟。