《港女FF妄誌》: [Day 07－港女軍師] PART 04

我行到去豪仔個衣櫃前...

打一打開...

『你個衣櫃都幾整齊下喎～你自己摺架？』我望一望個衣櫃...

裏面D衫丫～褲丫～孖煙囪丫都分開晒放～

仲要摺到整整齊齊四四正正咁～



「係丫...自己摺...OK咁啦...哈哈...」豪仔怕怕羞羞咁笑笑口～摸摸頭～望住堆孖煙囪～

『男仔摺得咁整齊已經好難得架喇～』我就開始幫豪仔揀衫～

拎件藍色Tee出黎睇一睇...唔...隻色唔係咁好喎...

再拎拎條咖啡色五分褲...唔...個款唔係咁好喎...

「係咩係咩…哈哈...」豪仔又怕怕羞羞咁笑笑口～摸摸頭～望住我幫佢揀衫～



我就繼續幫豪仔揀～

拎下件綠色Tee出黎望兩望～

又拎下條深藍色長褲出黎睇一睇～

拎下呢件～又拎下嗰條～

拎件黃色Tee放喺豪仔身上襯一襯…



『唔...麻麻地...』

再拎條牛仔褲出黎放喺豪仔下身襯一襯…

豪仔怕怕羞羞咁向後縮一縮...

『企好！唔...唔得…唔得...』

豪仔D衫都唔算少...仲有好多顏色揀...之但係就好似唔係好襯咁...

顏色鮮豔唔係話唔好...

之但係呢...太過鮮豔太多色彩就好似...無咁穩重囉...

尤其好似豪仔呢D青少年～



本身就已經唔多穩重架啦～仲要著到咁鮮豔～成個花𡃁仔咁～

你話真係喺街撩下女仔丫～落老蘭食下女丫就話姐～

之但係而家係約女神出街，唔可以咁輕挑既～

唔可以咁輕挑...點先會睇落無咁輕挑呢...

唔...我諗最好就係...白色既...恤衫？

恤衫又好似太過老成...

都係白色Tee好...



白色Tee既話...又唔可以有D九唔搭八既MK圖案喺上面喎...

最好就係有個袋仔喺心口...

唔...呢件有個藍藍地色既袋仔喺心口道既白色Tee都好似唔錯咁喎～

我就拎起件有個藍藍地色既袋仔喺心口道既白色Tee放到喺豪仔身上襯一襯：『嗯嗯～幾好幾好～』

隻色又岩～個款又岩～仲好岩豪仔個身形添～

好～衫就揀好～就要揀埋褲～

白色Tee襯咩色褲最好？

咁就梗係黑色啦～



黑白色係Perfect Match黎架嘛～

黑色既褲...黑色既褲...

我又喺堆褲道揀下揀下...揀下揀下...

長褲...咁熱既天氣著長褲...一陣焗到成陣袋味咁...俾女神聞到就大件事～

所以呢...

我揀下揀下...就揀左條黑色既七分褲出黎～

仲可以摺褲腳添既～



我又拎一拎起條黑色七分褲～放一放到去豪仔下身襯一襯…

豪仔怕怕羞羞咁向後縮一縮...

『都話企好咯！唔...有修身既～幾好～幾好～你就著呢件衫同呢條褲俾我睇睇先～』我就將件有個藍藍地色既袋仔喺心口道既白色Tee同條黑色既七分褲放到去豪仔手上～

「哦哦...」豪仔就拎住件衫同條褲行去廁所嗰邊～

『喂～』我叫一叫停豪仔～『使咁入廁所換咁麻煩丫？喺道換咪得囉～』

「下？喺呢道換？唔好既唔好既...」豪仔就急急腳咁行左入廁所...

『喂！喂…唉...』使乜咁麻煩架？換件衫換條褲姐～

又要走入廁所換～

一陣換左出黎發覺唔係咁好，又要走入廁所再換過？

唉～男仔黎架嘛～使唔使咁怕羞丫？

你話小妹妹喺個大哥哥面前換衫就怕羞姐～

唉～都唔知豪仔平時係點同佢家姐相處～

咁多年，有乜野未睇過丫？

應該乜都睇過晒架啦～

仲有乜好怕羞呢？

我就等下豪仔換衫～又幫佢摺返好D衫～

一邊幫豪仔摺衫～一邊等下豪仔～

以前幫男朋友摺衫就摺得多～幫人地個細佬摺衫就真係第一次～

呢種感覺都...幾特別～

好似有一種責任...但又唔係情侶之間既責任...

好似係一種...愛...但又唔係愛情既愛...

呢種感覺...究竟係乜野感覺呢？

呢種感覺...呢種感覺會唔會就係...家姐對細佬既愛護？

或者...真係...

或者就好似ManYan同豪仔咁...一種姐弟情...

或者相處再耐D既話...話唔定豪仔真係覺得我仲親過佢親家姐添呢～

相處再耐D...

同豪仔相處得再...耐D...

係既…或者係既...

或者係相處得未夠耐...

或者相處得耐D...又真係會...當正我係佢家姐咁呢...

好用心咁幫豪仔摺返好D衫～又等左豪仔一陣～

“咔”豪仔就由廁所行返出黎～

『咁耐架～喺裏面做咩黎丫你～』我就古古惑惑咁打量一下豪仔～

「無無無！我乜都無做丫！純粹換衫！純粹換衫！」豪仔又面紅紅咁揮揮手～擰擰頭咁～

『係咩係咩係咩～男仔換衫都成個女仔咁換咁耐架咩～等我睇睇～』我認真咁打量一下豪仔～

豪仔高高瘦瘦既身形～又白白淨淨咁既皮膚～襯上有少少修身既白色Tee同條勁修身既黑色七分褲都真係唔錯～

顯得豪仔更加高～

『唔錯唔錯～我都幾鍾意～不過條褲呢...』我跪到喺豪仔面前...『可以摺一摺～』

我就幫豪仔摺一摺起褲腳～

『搞掂～就咁著就岩喇～』我再打量一下豪仔～對自己既光眼都真係幾滿意～

睇黎我唔做Sales既話都可以轉做時裝設計師～

「哦...哦...」豪仔塊面勁紅咁～又唔知佢怕咩羞喇～

『衫褲襯好就要幫你Set埋個頭～』我向豪仔打左個眼色～

「幫...幫我Set頭？」豪仔面紅紅咁問一問～

『係丫係丫～梗係要Set返好個頭先出得去架啦～』你唔係想成個柒頭咁走去見女神丫化？！

「咁...咁...」豪仔仲係面紅紅咁諗下諗下...

『仲咁乜鬼野丫？你估你而家仲有好多時間丫？行啦！』我就雙手搭住豪仔膊頭推住佢入廁所！

我推到豪仔入廁所～

“咔”閂埋道門～（其實點解要閂埋道門呢？）

我同豪仔都望住塊鏡裏面既我地～

唔...唔講真係唔覺我地之間既年紀係相差差唔多十年～

就咁睇...我同豪仔真係差唔多咁上下年紀～最多都係大佢一兩年咁上下～

我呢D係唔係就係叫做不老傳說呢？呵呵呵～

都係唔好自High咁耐～睇下應該點搞先～

首先係要...

『泥呢泥呢？』我喺檯面望下搵下～只係望到D女性既護膚品同化妝品～

好明顯全部都係ManYan D野～

「呃...呢道呢道...」豪仔打一打開塊鏡，喺櫃裏面拎左盒髮泥俾我～

『嗯～』我接過豪仔盒髮泥之後，再認真咁打量一下鏡裏面既豪仔，『你企到個人咁直我點幫你搞丫～踎低D～』

豪仔高我成個頭，你叫我點幫佢摷呢？

真係蹬起對腳仔都唔掂啦～

「哦哦...」豪仔又好聽聽話話咁踎一踎低～

『再踎低D～』我拍一拍豪仔膊頭～

「哦哦哦...」豪仔又好聽聽話話咁再踎低D～

『再踎低D～再踎低D～』我再拍多兩拍豪仔膊頭～

「哦哦哦哦...」豪仔好似坐緊無影凳咁～

『嗯～好～等我睇睇先～』我就一邊挖D髮泥上手～一邊打量一下塊鏡裏面既豪仔～諗諗點幫佢搞好～

呢個年代既男仔都係興柏豪All Back架喇～

係柏豪All Back喎～千萬唔好整個GD All Back出黎喎～

GD All Back係型～仲型到飛起添～

唔係係人都Carry到架～

Carry唔到既話，就真係型到盡頭便是柒～

你自己柒就事小，影衰女神就事大喇～

你要知道女神帶你出街，除左話有3Lunch食有免費戲睇有人幫自己俾錢買衫增值埋八達通之外，仲有就係要夠威～

有個又高又型又靚仔著衫又有品味既兵喺身邊，俾街上其他女神見到妒忌下都不知幾咁爽～

再唔係拎隻兵出黎互相比拼下又可以Show俾人睇自己幾咁有吸引力～

萬一你個Look唔掂，失禮女神既話，你呢世都唔使旨意再有機會得到女神寵幸～

一世都被打入冷宮～

所以呢～喺香港做兵真係唔易架～

我就好用心咁幫豪仔摷下摷下～慢慢咁摷下摷下～

一路摷下摷下～望住塊鏡裏面既豪仔摷下摷下～

豪仔又震下震下咁...

『唔好郁！』我好認真咁望住鏡裏面既豪仔！

「哦哦...」豪仔又眼甘甘咁望住鏡裏面既我～

我又好用心咁慢慢幫豪仔摷下摷下～

唔夠一陣...豪仔又震下震下咁...

『都話唔好郁咯！』我谷一谷起塊面豬登！望住鏡裏面既豪仔！

「唔郁...唔郁...」豪仔又面紅紅咁望住鏡裏面既我～

我又慢慢咁擸下摷下～好用心咁幫豪仔摷下摷～

摷到豪仔個頭成個周柏豪咁之後...

“吱..吱...吱～”噴埋Spray...

『搞掂！』我望住鏡裏面既周柏豪～

周柏豪又望住鏡裏面既我～

『企返直個人先啦～』我又拍一拍豪仔個膊頭～

「哦哦...」豪仔企一企直返個人～

我搭住豪仔膊頭...貼埋佢身邊...望一望...望一望鏡中既我倆...

幾好幾好...唔錯唔錯...

就咁睇...豪仔都唔失禮我～

仲令我幾…自豪添～

睇黎我除左話可以轉行做時裝設計師之外，仲可以做髮型師添～

VS X PH～～～

哈哈哈～呢個OK丫～

好過VS X G-DRAGON咁浮誇～

望住鏡中既豪仔好似有D痴痴迷迷咁...靈魂都唔知飛左去邊咁...

係唔係未見過自己可以咁型咁靚仔？

或者係啦～

或者豪仔平日真係好少打扮一下啦～

或者就係要打扮一下，先發現自己原來係咁有吸引力～

原來...係咁有吸引力...

『好！Set好個頭喇！』我就拉住豪仔行返出廳～

豪仔一直俾我拉住黎行～拉住黎行到豪仔張床邊～

『黎～拎部電話黎～』我攤大手板～

「哦哦...」豪仔又傻下傻下咁喺床頭拎起部電話，解一解鎖，放到我手上～

『呢個時候呢...就要上網買定戲飛既...』我就撳一撳開個百老匯戲院App...

「下？上網買飛？點解唔出到去先買呢？」豪仔仲係傻下傻下咁望住我...

『上網買定既話...女神咪會覺得你體貼D～又醒目D囉...』女仔就係要你乜都安排好晒架嘛～

「哦哦...」豪仔仲係傻下傻下咁望住我撳撳撳...

『唔...四點半有場...就睇四點半啦～』仲要有勁多位～

「下？睇咁晏？」豪仔仲係傻下傻下咁望住我撳撳撳...

『差唔多架喇～等陣你仲要同佢食Lunch架嘛～仲未計佢會遲到呢？』我又一邊撳下撳下～一邊答豪仔～

「遲到？」豪仔仲係傻下傻下咁望住我撳撳撳...

『係丫～你有無信用卡丫？』我又一邊撳下撳下～一邊問一問豪仔～

「無丫…」豪仔仲係傻下傻下咁望住我撳撳撳...

『唔緊要～用住我嗰張先～』我都估到ManYan無咁好死會出張附屬卡俾豪仔架喇～

「用...用住你嗰張先...」豪仔仲係傻下傻下咁望住我撳撳撳...

『嗯嗯～』我就行去拎返張卡出黎，撳撳撳撳撳...

豪仔就行到我身邊...傻下傻下咁望住我撳撳撳...

『搞掂～嗱～拎住呢張卡～到時就帶埋Kawaii去拎飛～咁佢就覺得你好型架喇～』我就交返部電話同隊埋我張卡俾豪仔～

「哦...哦...」豪仔仲係傻下傻下咁點點頭...

『跟住呢...我仲要買多一張俾自己既...』我又拎起自己部電話，再拎另一張信用卡出黎...

「下？仲要買多一張俾你自己？」豪仔又傻下傻下咁望住我撳撳撳...

『係丫～我會跟住你架～』我又一邊撳下撳下～一邊答豪仔～

「下？你會跟住我？」豪仔又傻下傻下咁望住我撳撳撳...

『係丫～我要做你背後既軍師丫嘛～』我向豪仔打左個眼色～

老老實實，你咁鬼毒丫～我又點放心俾你一個去同女神約會丫～

豪仔聽完我咁講...

又望住我同佢打左個眼色之後...

成個人呆晒咁...

好似唔係好Get到我講乜咁...

成個木頭人咁...

我就唔理得佢咁多～繼續拎住部電話撳撳撳撳撳～

揀左一個坐喺豪仔佢地後面既位～

入埋信用卡～買好飛～搞掂晒～

『OK～你等等我丫下～』我就放低部電話，喺個衣櫃裏面拎件白色緊身Tee同條黑色熱褲仔仲有個白色Bra同條白色底褲衝入廁所換衫～

要快D～要快D～

如果話係我約男仔出街就話可以遲姐～

但而家係豪仔約女神丫嘛～係唔可以要女神等架～

雖然話女神一定會遲到...

就算明知女神一定會遲到咁又點丫？你咪又係一定要準時去到佢屋企樓下戇鳩鳩咁企定定咁等佢落黎～

差在睇下要等幾耐咋嘛～

係咁架喇～係好唔公平架喇～男女之間又幾時有公平過丫～

咁耐以黎你都仲未習慣咩？

唔習慣既話...你又敢唔敢出聲？

我就快快手手換好套衫～

又快快手手咁梳一梳把秀髮～紮一紮條高馬尾～

喺塊鏡前照下照下～

雖然今日唔係我去見男神～但出得街都要靚靚女女～

照多兩照，托多兩托對小饅頭（雖然胸無幾両肉，但都要托得正D～挺D～），確保四四正正～整整齊齊咁～

“咔”出一出返廳～豪仔仲係企定定咁～眼甘甘咁望住我咁～

『做咩眼甘甘咁望住我丫～』我恥笑一下豪仔～

呢個豪仔真係丫～叫佢等等我姐，佢就真係企定定咁等～

會唔會太過聽話呢～

「呃...係呢...我唔係好明你所指既...做我背後既軍師...係咩意思呢...」豪仔仲係傻下傻下咁眼甘甘咁望住我～

『丫～係！』我就喺個床頭拎一拎起隻Apple Watch，『拎你部電話俾我～』

「哦哦...」豪仔就好聽話咁行去拎部電話過黎，交到我手中～

『嗯嗯～咁呢...我就將我隻Apple Watch同你部電話連埋一齊先...』我就拎住豪仔部電話撳下撳下～

「哦哦...」豪仔又傻下傻下咁望住我撳下撳下...

『好～搞掂～』我就捉一捉住豪仔隻手～幫佢帶一帶起隻Apple Watch，『嗱～等陣呢～我就會跟住你地既～有野提你呢～就會Message你～但你同女神出街係唔可以成日睇手機架喎～成日睇手機係好無禮貌架～』

「哦哦...」豪仔又傻下傻下咁望住我～點點頭～

『所以呢～你就睇下隻手錶～睇下我Send乜野俾你～』我就繼續好似教導緊小朋友咁～

「哦哦...」豪仔又傻下傻下咁望住我～點點頭～

『咁如果你真係有野唔明想問我架呢，千萬唔好喺女神面前Send Message喎！咁樣都係好無禮貌架～』我又繼續好似教導緊小朋友咁～

「哦哦...」豪仔又傻下傻下咁望住我～點點頭～

『呢D時候呢～你就話想去洗手間～入去先Send Message俾我～』我又繼續好似教導緊小朋友咁～

「哦哦...」豪仔又傻下傻下咁望住我～點點頭～

『不過千萬唔好成日去喎～唔係既話女神會以為你係腎虧架喇～』又繼續好似教導緊小朋友咁～

「哦哦...」豪仔又傻下傻下咁望住我～點點頭～

『又或者你可以襯住女神去洗手間既時候Message我都得～總之就記住千萬唔好喺女神面前Send Message俾其他人！你要俾佢覺得同佢一齊既時候，無論喺心裏定眼裏，都只有佢一個～知唔知丫？』又繼續好似教導緊小朋友咁～

「只有...佢一個...」豪仔又傻下傻下咁望住我～諗下諗下咁～

『係丫～只有女神一個～只有一個女神～』咁就無死錯人～

兵，可以有千千萬萬隻～

但女神，就只可以得一個～

當然，唔係有咁多兵真係咁忠心，心中就只有一位女神～

可能都有唔少兵係同一時間入左幾個兵營～

收幾位女神既軍糧～

又睇下邊個女神會俾機會自己升職～由步兵升做騎兵～

有得騎下都唔錯～

但呢D野你自己知好喇～

千萬唔好俾女神發現～

唔係既話就一定俾女神一腳踢去大西洋～

從此再無機會收軍糧～

之不過女神就唔同喇～越俾D兵知個兵營有幾多隻兵就越好～

等D兵仔知道有幾大競爭都好丫嘛～

雄性生物就係咁～就係唔知點解特別鍾意同人爭～

尤其係爭女～

總係好似越多人爭就越香咁～

無計啦～天性係咁～無得改～亦都唔知幾時會變～

「嗯嗯...」豪仔望到我實一實咁～好認真咁點一點頭～

『嗯～』真係明？

豪仔真係明我既意思？

希望啦～

我亦都唔可以奢求得咁多～

無奈豪仔都係一條小毒毒～

無乜點樣男女攻防既經驗，總要碰下釘～撞下板先得既～

經驗丫嘛～經歷丫嘛～我地就係從呢D經驗經歷之中成長～

最怕既係經驗過...經歷過...都總要重複同樣的錯誤...

『呀！差D唔記得！天文台話會落雨丫！要帶返把遮！要帶返把遮！』我就搵一搵把Man D既黑色長遮～

「但出面好似好好天咁喎...」豪仔望一望出面～

『就係而家唔似會落但一陣真係落起雨黎你有帶遮既話就更顯得你體貼！會加分架！嗱！拎住！』我隊一隊把黑色長遮到豪仔手～

「哦哦...」豪仔又傻下傻下咁接過我手上把黑色長遮～

『準備好啦嘛？』我打量一下豪仔～

「嗯嗯...準備好...」豪仔又傻下傻下咁點點頭～

『咁我地就...』我就握實個拳頭～向天一舉～成個路飛咁～『出發！』

追求可愛女神大作戰正式開始！