Lennon指住個靚女Sales手中條黑色露背長裙...

我就望住靚女Sales手上拎住條黑色露背長裙...

我用心D咁睇...細心D咁睇...仔細D咁睇…

真係呢條喎!!!

一模一樣!同今朝著嗰條一模一樣!





Lennon真係記得到...認得出...

「試試佢。」Lennon隨便咁講一句。

『哦...』我有D痴痴呆呆咁...

可能係坐得太過耐...

可能係仲諗緊點解Lennon真係記得到...認得出...





頭先我仲喺道諗Lennon係唔係鳩望鳩擰頭鳩話唔係亂鳩咁黎...

但事實證明左Lennon唔係鳩吹...

Lennon堅係一眼認得出架喎!

「請跟我黎呢邊~」個靚女Sales就拎住條黑色露背長裙帶住我行...

『唔...唔該…』我就跟住個靚女Sales身後行...





行多幾步,就行到黎Fitting。

「隨便慢慢試~」個靚女Sales幫我掛一掛好條黑色露背長裙喺Fitting入面。

『唔該。』我再唔該多一聲。

「唔使客氣~」個靚女Sales就行返出去,幫我閂一閂埋門。

“咔”我鎖一鎖道門之後...

個Fitting都幾大下架喎...

我望一望四周...望一望整間Fitting...

又高級...又闊落...





名店真係名店~個Fitting都有氣派過人~

講真一句,個Fitting咁正唔用黎扑野真係嘥晒~

喺道扑野分分鐘仲舒服過你屋企張床~

難怪呢幾年有咁多狗男女喺Fitting交配~仲要拍埋片~

不過我反而好奇點解男女一齊入Fitting架呢?

乜真係可以一齊入架咩?

其實係唔係無列明Fitting只可以一個人用架呢?





咁遲下有男朋友既話,去買衫既時候又係唔係可以叫埋佢入黎幫下眼呢?

即係好似H&M嗰D咁,入左去就唔可以著出黎俾男朋友睇下好唔好J架嘛~

唔通真係下下影張相俾佢睇又等佢覆咁麻煩咩?

叫埋佢入黎一齊研究研究咪方便快捷唔嘥時間囉~

咁我而家又係唔係應該叫埋Lennon入黎一齊研究研究呢?

痴咩線丫?又唔係同Lennon好熟!無啦啦叫佢入黎睇我試衫想嚇死人咩?!

唔好FF咁多喇~試試條裙先啦~

我拎起條黑色露背長裙望一望...





唔...

又要班靚女Sales幫我地搵晒成間舖既黑色露背長裙出黎...仲要逐條逐條拎住俾我地睇...

條氣一定好唔順...都唔知佢地會唔會喺條裙道落痕粉架...

仲要係嗰D上左身要過兩三個鐘先發作既痕粉!

出左去咁多個鐘,想返黎嘈佢都嘈唔到架啦...

到時都真係無仇報!

我都係Check Check好D...





我好仔細咁睇下條裙有無D奇怪既粉末...

裏裏外外都Check清楚...

再好小心咁揚一揚條裙...

就算真係有料喺裏面,都應該可以揚返D出黎掛...(其實只係令自己安心D...)

揚左幾下...

『好啦...都要試架喇...鬼叫我收左人地三十萬咩...今日我全個人都係佢架喇...』

我就將身上條米白腰間有Lace織花層次既雪紡連身短裙除出黎...掛好佢...

再好小心咁著條黑色露背長裙上身...

著左上身後,對住塊全身鏡拉一拉好位...簡單咁整理一下...

都真係好岩身喎!

係Fit到應晒嗰隻!

對小饅頭又唔會太鬆~

條腰又包到岩岩好~

長度又適中~

估唔到我都可以Carry到名牌既晚裝喎~

我仲以為名牌既晚裝就只有Model身材既Size~

定係其實我都有Model身材呢?

呵呵~話我自High都係咁話~

著得名牌上身就要打飛機架啦~

我就對住塊全身鏡打多陣飛機~

左照照~右照照~前照照~後照照…

我都好滿意~我都覺得自己著得條裙好靚~從來未試過著得咁靚~除左背後...

背後都仲係露左條白色Bra帶出黎...

不過唔緊要啦~一陣去買個NuBra就唔係問題~

我就覺得好滿意喇~之但係我覺得滿意係唔夠...因為今日既老闆唔係我...係Lennon...

唔...我都要俾佢過下目...睇下岩唔岩佢口味先得既...

好啦~

“咔”我就開一開門,行返出去。

我見到Lennon仲坐喺張梳化道...冥想緊咁...

係等到呆左?定係諗緊野呢?

唔...其實我唔覺得Lennon係發緊呆...

我係覺得佢喺道諗緊野...

Lennon既眼中...總係好似有好多野諗咁...

不時都諗緊野咁...

就係唔知有咩野諗…

或者有錢人就係多野諗架啦~

我行到去Lennon面前...

『點丫?好唔好睇丫?』擺下擺下個身~

條黑色露背長裙就飄下飄下咁~我就好似輕輕舞著舞著咁~

呢條裙既質地又輕又滑真心正~

名牌真係名牌~絕對唔可以搵H&M D幾十蚊大陸貨仔拉埋黎比~

Lennon回一回神,打量住我好一陣子...

「嗯。好靚...你著得好靚。」Lennon點下點下頭。

『你咁直接架~』我扮晒怕羞咁~

「直接D好~等你唔使再揀過另一條丫嘛~」Lennon帶住古天樂式既恥笑望住我對小饅頭...

『乜你咁架!』我谷一谷起塊面豬登!

即係話我著得唔好睇就算喇!最緊要都係唔好嘥時間揀過條!

「講笑姐~咁認真~」Lennon又帶住古天樂式既笑容望住我。

『唔好笑囉...』你唔好以為你似古天樂就可以亂咁講笑!

「好喇好喇~講真...你真係好靚。」Lennon就勁認真咁望實我...

聽到Lennon咁講...望住佢咁認真咁望實我...我個心...突然跳左一大下...

然後加速...跳得好快...

“卜卜!卜卜卜!卜卜卜卜!”聲咁跳!

點解...我會有呢種...心跳既感覺架呢?

望住古天樂個認真樣...

唔係唔係…

係望住Lennon個認真樣...

個心跳到“卜卜”聲咁...

呢種心跳既感覺...係...

『前面睇就靚~背後呢...』我轉一轉身,俾個背脊Lennon睇。

唔好諗咁多…唔好諗咁多…

幻覺黎架姐!呃我唔到既!

「你話要買嗰隻咩...咩咩...」Lennon諗下諗下。

『NuBra丫~』原來Lennon都有野係唔記得既~

咁都好D~都叫正常D~

如果真係乜都記得既話,就真係...太過嚇人喇~

「係咯係咯~NuBra丫嘛!喺邊道買架?」Lennon望住我背後條Bra帶諗下諗下。

『唔使心急~我知邊道有得賣既~而家最重要既都係...呢條裙岩唔岩你心水先?』我就確定一下。

「岩~梗係岩啦~你著得咁好睇...我怕我會襯你唔起添...」Lennon好認真咁打量住我,點點頭。

『講呢D~』呢種係Lennon既表達方式?

係覺得OK係覺得好睇係覺得靚既都要講到好似自己好鍾意...

唔係鍾意咁簡單...

直頭講到好似自己愛上咁既樣...

我唔知係錯覺定係幻覺...

被Lennon讚又好...話岩佢心水都好...都總係好似向我有所暗示咁...

我唔係自大又或者自戀...

我唔知你地會唔會有咁既感覺...

即係有D男仔讚你既時候總係好似向你暗示緊佢鍾意你...佢愛你...佢想追你咁...

而事實上佢真係想追你架喎!

當然...當有人問起”佢係唔係想追你丫?”既時候,我都會口不對心咁話“痴線啦!我都Feel唔到~”。

講得出Feel唔到其實就係Feel得到...

只係...有時你對個男仔無Feel所以佢唔明示就唔想煩惱點樣拒絕人。

又或者唔想自己開口先,係都要等人地兜口兜面同你表白。

不過好多時...到最後都無話邊個開口先...無話邊個同邊個表白...

好多時...都係拖下手仔攬攬錫錫糊裏糊塗就開始左...

『你話OK既話咁今晚就著呢條架喇~』我都係將個焦點放返喺今晚個場合道。

「OK丫。」Lennon一邊打量住我,一邊點下點下頭。

『嗯~咁我去換返條裙先~』我就行返入去Fitting。

將個焦點放返喺今晚個場合道...我今日既任務...

喺Fitting入面好快咁換返條裙,出返黎,等Lennon埋單~

「多謝你四萬八千六百八十蚊~收你American Express~」個靚女Sales接過Lennon手上張黑色信用卡。

呢張咪就係杜汶澤口中連飛機都碌得到既黑卡?!

其實我又唔覺得有乜咁出奇~

Lennon咁有錢,無黑卡就真係出奇喇~

更唔會白痴到話想拎黎大開眼界一下~

失禮人又失禮自己既野就唔好做喇~

不過你話一條露背長裙差唔多要成我三個月人工會唔會貴得離譜?

咁Burberry一件乾濕褸都要成十萬蚊啦~

Salvatore Ferragamo一條晚裝五萬有找算平啦下話?

等到個靚女Sales碌完Lennon張黑卡之後...

「多謝晒~一有新貨返,我地都會第一時間通知文生~」個靚女Sales將個載有價值四萬八千六百八十蚊既黑色露背長裙既大紙袋交俾Lennon。

「好丫。」Lennon就拎住個大紙袋。

我就跟住Lennon身邊行出Salvatore Ferragamo。

「咁而家係唔係去買NuBra?」一行出Salvatore Ferragamo門口,Lennon就問一問。

『做咩丫?好心急想睇我買Bra丫?』我恥笑一下Lennon~

係唔係頭先睇完我條白色Bra帶之後就把持不住喇?

嘿嘿嘿...我都知我既吸引力大架喇~

不過三十萬係唔包甜架~

「唔係~唔…」Lennon諗下諗下,「或者係我個人比較目標向掛...我咁講你明唔明?」

『目標向?』講真我又真係唔係幾明喎...

咩係目標向?

「即係...」Lennon一邊行,一邊諗,「唔...有左一個目標之後就向住個目標行...」

『有邊個唔係定左個目標之後就向住個目標行架?』你係唔係喺道講廢話丫?

個個人都係定左個目標之後就向住個目標行架啦~

又有邊個定左個目標之後會行左去另一邊架?

咁定個目標黎做乜丫?

「唔係…唔係...」Lennon再諗一諗,「即係...我定左個目標...淨係會望到個目標...咁講你明唔明丫?」

『嘩你咁講我實明啦~』講到成個畢加索咁...

「無野喇...」Lennon好似好無癮咁行快兩步...

『唔係丫~你可以再講解下架~』我就撩一撩Lennon~

「即係...」Lennon放慢腳步,皺一皺眉,諗一諗,「唔...淨係望住個目標咁行...咁講你明唔明丫?」

『嘩你咁講我實明啦~』真係師父明白了喇~

「好啦無野喇...」Lennon好似勁無癮咁行快兩步...

『唔係丫~你再講解下我可能真係會明~』我又撩一撩Lennon~

「即係呢...」Lennon又放慢腳步,眉緊皺,用力諗一諗,「唔...即係我諗到你話要買NuBra所以就問而家係唔係去買NuBra...咁講你明唔明丫?」

『嘩你咁講我實明啦~』明你就係想睇我買Bra咋嘛~

「得喇好啦無野喇...」Lennon好似無晒癮咁行快兩步...

『好啦好啦~見你咁心急...咁我地而家就去買NuBra啦~』男人個個都係咁心急架~

「咁係行呢邊定嗰邊?」Lennon指下左又指下右。

『喺蘭桂坊嗰邊~』

「下?喺蘭桂坊嗰邊架?呢道無架咩?」

『我唔知呢道有無丫~我淨係知蘭桂坊有咋~』

「咁我地要攞車先喎。」

『嗯~攞車先~』

同Lennon去攞返架法拉利...

“吼!吼!!吼~~~”向住蘭桂坊出發~

蘭桂坊...尋晚遇見Lennon既地方...

人地話蘭桂坊咩人都會俾你遇得到,淨係遇唔到好男人~

Lennon算唔算係一個好男人?

我唔知...

喺佢身上...除左話覺得佢好有錢之外(唔使講啦下話?!),就係一個特別既人...

“吼~~~吼!吼!!!”唔使幾耐就過到黎蘭桂坊。

等到Lennon停喺路邊...

『你喺道等我啦~』我就解一解開安全帶。

「唔使我陪你?」Lennon問一問。

『你真係想睇我揀Bra丫?』我就古古惑惑咁打量一下Lennon~

「唔係唔係~只係...」Lennon諗左一諗,「是旦啦~你鍾意~」

『嗯~咁你喺道等我啦~』我就揭一揭開車門,落一落車~

無Lennon扶住之下都真係幾難落...仲要擘大晒對髀...走晒光咁...

最慘既係勁多路人望住Lennon架法拉利,順個靚手𥄫埋我裙底丫嘛!

唉~真係坐得超跑就預左走光~

“咔”閂返埋車門之後,我都行快幾步上去買Bra~

其實買NuBra都無乜特別~

一上到去淨係話要買個肉色~岩我Size既3D NuBra就搞掂~

好快咁俾埋錢~好快咁就衝返落黎~

或者係因為怕抄牌掛~

D Ex車我去買野,泊喺路邊既話,都會叫我快D跑去買完快D跑返番黎!

抄一抄唔見四舊真係好甘架嘛!

試過有次我衝住去買M巾又衝住返黎都唔見左人!

話俾個阿Sir趕,要兜個圈先返黎接我喎...

我就拎住包M巾企路邊等囉...

幾咁無癮...

所以都習慣左一泊喺路邊就衝住去買又衝住返黎架喇~

而當我拎住盒NuBra衝到返黎之時...

我見到Lennon已經落左車,企埋左一邊...

而喺架紅色法拉利旁邊就有四五個人圍住黎影...

嗰四五個人都拎住部手機喪影Lennon架法拉利...

而企喺一旁既Lennon又好似無乜所謂咁...帶住古天樂式既微笑望住嗰四五個人喪影自己架法拉利...

我就慢慢咁行近Lennon...

Lennon望到我,就行一行近我,望一望我手上盒NuBra:「買左喇?咁快既?」

『係丫…好快咋嘛…怕你被人抄牌丫嘛…』我輕輕搖一搖手上盒NuBra....

「哈~你都幾搞笑架喎~」Lennon恥笑我一下,「喺香港,邊有超跑會被人抄牌架?」

『係咩…係咩...』乜超跑就唔會被人抄牌架咩?

原來超跑係免疫牛肉乾架?我而家先知添...

我就望一望住Lennon架法拉利...望住又多左兩個人走左過黎拎住部手機影...

「佢地想影下...」Lennon帶住古天樂式既微笑望住嗰六七個人喪影自己架法拉利...

『哦...』都唔係影下咁簡單喎...

我睇佢地個樣似係想影幾個鐘喎...

「係呢...你肚餓未丫?不如我地食D野先好嘛?」Lennon帶住古天樂式既微笑望住我問一問。

『哦...好丫...食D野先都好既...』話餓就唔餓既...不過食得落咁囉...

「咁就放左...D野上車先。」Lennon向我遞一遞手。

『哦...好...』我就將手上盒3D NuBra交到Lennon手中...

Lennon行去車頭,打一打開車頭箱(係唔係咁叫架?),放好盒3D NuBra…

閂返好個車頭箱之後,Lennon就行到黎我面前:「行得。」

『哦...好好...』我望住又多三條偽文青拎住部相機喪影Lennon架法拉利...

就咁就去食野?

Lennon好放心咁行...我就跟住Lennon身邊...

真係就咁就走去食野?

咁多人圍住自己架超級跑車黎影喎...

仲要係開篷架喎…

『喂…你放心架喇?』我問一問Lennon。

始終我都唔係幾放心咁...

「嗯?你係指D咩?」Lennon反問我一下。

『你架車囉...』仲使問既?!

Lennon真係好似唔覺得有D咩問題咁架喎...

「我架車?你係指泊喺街邊會被人抄牌?都話左無人會抄超跑架咯~」Lennon又恥笑一下我。

『一來啦...二來就咁泊喺街邊...唔怕俾人搞咩?』呢D超跑整一整花都唔知點算...

聽講就算係噴油都係要運返去意大利噴...

「怕咩姐?無啦啦邊有人搞姐?」Lennon仲係大安旨意咁。

『無啦啦夠有咁多人圍住你架車黎影啦!你架車仲要係開篷架喎!一陣俾人坐落去揸走埋咁點算?』係咯係咯!開篷架喎!真係一跳上車就偷得走!

「哈哈~就係多人圍住影先唔怕丫嘛~」Lennon又恥笑我一下。

『下?!』我又真係唔明喇...

「唔明丫?有咁多人圍住黎影,邊個搞都影到晒啦~更莫講話想偷。」Lennon又大安旨意咁。

『嘩!你呢D咩邏輯黎架?你當佢地係保安咩?!』佢地都只不過係一班花生友黎架咋!

「你又唔好理佢地係唔係花生友~有心做衰野既人見到有咁多人喺道,仲要個個都拎住部手機相機對住架車黎喪影,自自然然就會心虛唔敢做衰野。」Lennon點下點下頭咁。

望住Lennon一副盲腸都給他看穿了咁既樣...

『你真係好特別...』我又忍唔住要話Lennon特別...

「有乜咁特喇姐...」Lennon諗左一諗,「你試下喺人地個角度睇就明架喇。」

用人地既角度睇?

或者...都係既...

或者一直以黎...我都係用自己既角度睇野...

睇人又好...睇事又好...

所以...一直以黎都好主觀...

或者...試下喺人地既角度去睇...會睇到自己睇唔到既...細節...