《港女FF妄誌》: [Day 12－港女佳人] PART 07
假如試下喺人地既角度去睇...可能我會早D發現到...
發現到一D我一直都無留意過既細節...
好似話...豪仔...
假如我有喺豪仔既角度去諗...我可能會早D察覺到豪仔鍾意嗰個...其實係我...
如果我早D知道既話...我又會點呢？
我諗...我唔會成日去挑逗豪仔...
你話唔係因為愛就可以玩下姐...有愛既話...就唔係講玩架喇...
愛…唔係用黎玩...
「想食D咩？」Lennon既聲線將我由思索中叫返醒。
『下？唔...你呢？你想食D咩呢？』諗野諗到入晒神咁，一時之間諗唔到食乜好架嘛…
「我丫？我咩都食架喎。」Lennon望住前路行。
『茶記你食唔食丫？』我本來想話“屎你食唔食丫？”，但好似太過粗魯...識左Lennon唔係咁耐，唔想俾個壞印象佢。
「茶記我OK架喎。」Lennon一邊望住前路行，一邊點點頭。
『咪玩啦～你呢D有錢人會食茶記架咩？』唔好話我話你連茶記係乜都唔知啦～
「你估我真係含住條金鎖匙出世，一出世就咁有錢架咩？」Lennon帶住古天樂式既恥笑擰擰頭。
『唔係架咩？』Lennon唔係含撚住條金鎖匙出世既二世祖黎架咩？
而家既香港唔含撚住條金鎖匙又邊可能發到達丫？
「咁係唔係食茶記丫？」Lennon好似大返我轉頭咁！
『梗係唔係啦～同得你呢D超級有錢人食野就梗係要食豪D啦～』你話我係死港女都要食好西～
「哈～你唔俾我要你AA架？」Lennon又恥笑下我。
『你要我AA既話，我咪又喺個黑洞手袋裏面摷銀包摷足幾個鐘囉～』港女既超必你唔係唔識丫化？
「你都幾…特別架喎...」Lennon打量一下我。
『你想講咩丫？特別港女丫？』做乜無啦啦跟我講特別丫？
「唔係唔係…如果你係特別港女既話，就唔會將港女既特徵講出黎啦。」Lennon繼續望住前路行。
『你唔俾我就係港女到盡頭就會講出口咩？』我又望住前路行。
「你唔係囉。」Lennon又打量一下我，擰一擰頭。
『講到好似好了解我咁～我地識左唔係好耐架咋～』唔好話你丫...我自己都唔了解自己...
「係丫…我地識左...十四個鐘左右...但個感覺...好熟悉...」Lennon又打量住我。
我望Lennon對眼...Lennon對眼之中...好似...好似...
「咁你有乜唔食架？」Lennon又望返前路邊行邊問一問。
『我丫？我咩都食架喎～』
「屎你食唔食丫？」
『乜你咁粗魯架？！靚女唔食屎架好唔好？！』
「乜唔係靚女唔屙屎架咋咩？」
『咁咩人先會又食屎又屙屎架？』
「舐共班走狗囉～」
『哦！你講正字！』
「呢D唔係正字，呢D係Common Sense。」
跟住Lennon身邊行...行下行下就行到黎一間...酒吧餐廳。
呢間位於角落頭，有兩三層高既...酒吧餐廳話係唔係超級高級？又唔算～不過都幾有格調就真既～
都幾好丫～
好似我呢D下等人一下子就去D高級餐廳食野真係會好唔慣～周身唔自在咁～食都食得唔安樂架～
而家呢道唔算太高級又幾有格調咁就最岩我～
我地上到黎二樓既窗邊位坐一坐低...望一望樓下既街景...
唔...都幾好景丫～
「想食D乜丫？」Lennon拎起份Menu睇一睇，問一問。
『唔...』我都拎起份Menu睇一睇...
有咩好野食呢？
烤美國豬肋骨...好似好熱氣喎...
小食拼盤...夠唔夠食架？
美國西冷牛扒…Lunch食西冷牛扒會唔會太Heavy呢？
招牌炸魚薯條...又炸魚又炸薯條仲熱氣過烤美國豬肋骨...
美國牛肉芝士漢堡包...擘到個嘴仔咁大好無儀態姐...
唔...食乜好呢...食乜好呢...
「有無咁難諗丫？」Lennon拎住份Menu打量住我咁問一問。
『唔...真係好難諗架...』我皺晒眉咁諗...成個諗樣出晒黎咁...
「得唔係好多野揀架咋喎...」Lennon又成副古天樂樣咁望實我。
『唔多都難揀架嘛…』其實我都真係幾怕揀野...
如果話食開就唔使揀姐...
唔係食開既話...又怕會揀錯...
「你有選擇困難症架？」Lennon仲係Keep住成副古天樂樣咁問一問我。
『你就當我係啦...』對住份Menu都頭痛...諗唔到點答Lennon好囉...
「叫份烤美國豬肋骨喇。」
『好似好熱氣喎...』
「咁丫...咁叫份小食拼盤喇。」
『夠唔夠食架？』
「叫份美國西冷牛扒喇。」
『Lunch食西冷牛扒會唔會太Heavy呢？』
「美國牛肉芝士漢堡包。」
『擘到個嘴仔咁大好無儀態姐...』
「咁就叫份美國西冷牛扒加份小食拼盤Share黎食喇。」
『咁...唔...』好唔好呢？
「唔使咁喇，就咁決定啦。唔該～」Lennon叫一叫個靚女侍應過黎。
真係唔使咁？真係就咁決定？
「係～文生想要D咩呢？」靚女侍應就帶住微笑咁行過黎。
「我想要一份美國西冷牛扒同埋一份小食拼盤。唔該。」Lennon好果斷咁講。
「好既～一份美國西冷牛扒同埋一份小食拼盤～請兩位等一等～大約十五至二十分鐘～」靚女侍應落完單之後，就收一收起我地份Menu。
等到個靚女侍應行左去之後...
「做咩丫？仲諗緊？」Lennon問一問我。
『唔...嗯...』我諗下諗下...點點頭...
「哈～都決定左囉...仲有乜好諗呢？」Lennon帶住古天樂式既微笑擰擰頭後，望一望出去街外既景色。
都決定左…仲有乜好諗？
Lennon望下望下出面既街景...點下點下頭...
我就望住Lennon...望住佢點下點下頭...
「有時真係...唔使諗得咁多既...」Lennon一邊望下出面既街景，一邊講。
有時真係...唔使諗得咁多？
「諗咁多會錯失好多架...」Lennon Keep住望住出面既街景點下點下頭。
諗咁多會...錯失好多...
「想做咪去做囉...」Lennon點下點下頭...點下點下頭...
想做咪去做...
『阿叔～你老喇～』我忍唔住要恥笑一下Lennon～
講咁多道理～成個阿叔咁～
「我？哈～老喇老喇...我都真係老喇～」Lennon帶住古天樂式既微笑擰擰頭。
『你幾多歲丫？』我打量一下Lennon。
我橫睇掂睇你都唔過五十架啦～
「我丫？我...」Lennon諗左一諗，「四十五喇...不知不覺又過左十年...」
『咁都唔係好老姐～』果然同我既估計一樣～四十幾歲～
「老啦～四十幾歲人俾人叫阿叔架喇～」Lennon帶住無奈既微笑擰擰頭。
『我講笑姐～你個樣一D都唔似阿叔～仲Keep到好好～仲要又型又Man添～』我再打量住Lennon。
四十五歲既男人，正正就係最黃金既時期～
充滿男人味之餘仲係最搵錢既時期～
呢D時期既男人真係唔憂無女埋身～
講開又係喎...點解Lennon又會無女朋友？
你話Lennon係隻無雀既腳仔唔想結婚都應該有大把女朋友先係架～
使乜搵個喺老蘭識左唔夠一日既女仔...又使乜送三十萬俾我使呢？
唔通佢D女朋友唔見得人...
唔通佢D女朋友唔係女？
唔通古天樂真係Gay既？！
「咁你呢？我都未知你幾歲添。」Lennon問一問。
『我？年齡係女人既秘密黎架～』呢個Lennon咁大個男人，又會咁直接問個女仔幾多歲既～
「過左三十歲就話係女人既秘密姐...我點睇你都唔過三十架啦！」Lennon用上古天樂既口吻。
『唔過都差唔多架喇...』唉...提起我D傷心事...
「嗯？差唔多？九一一既時候你出左世未？」Lennon一頭問號咁。
『九一一丫…』我諗一諗…嗰時好似…『我好似岩岩讀幼稚園…』
「仲讀緊幼稚園？！即係你而家廿幾？」Lennon有好愕然咁！
『嗯...正確黎講今年都廿五架喇...』再過多五年就三十喇...
「廿五？！真係睇唔出喎！我仲諗緊你過唔過廿歲！」Lennon仲係好愕然咁望住我。
『咁你而家知我成廿五歲係唔係好失望？係唔係諗緊今晚仲使唔使我去？嗱！講明丫！唔使我去既話，三十萬無得退架喇！』食左落肚我係唔會嘔返出黎架！
「傻啦～我覺得咁樣仲好添～」Lennon帶住微笑點點頭。
『仲好？有乜咁好？』到我一頭問號。
「成熟既年齡，年輕既外表唔係好好咩？」Lennon打量住我，點點頭。
『係丫係丫係丫～又嫩口～又容易入口～仲要好易甩身～唔似得D真𡃁妹仔咁又要生又要死又要用刀仔拮大髀丫嘛～知你地D男人啦...』個個都係咁...
「嗱...我無咁講過丫...」Lennon再打量一下我，「睇黎你對男人好有偏見喎...」
『唔係偏見囉...』係睇清睇楚囉...
「照咁睇...」Lennon諗下諗下，點下點下頭，「我既估計都唔會有錯...」
『嗯？』估計D乜？
「你今朝一早諗起既係要返工...呢段時間又無人打俾你...你又無打俾人...而家仲要對男人咁有偏見...你唔係岩岩甩拖就係無拖拍。」Lennon成個華生咁既樣。
『華生！你突破盲腸了！岩岩甩拖同無拖拍唔係同一樣野黎架咩？』咪又係單身狗！
「哈哈～咩都好啦～總之就唔使擔心要點樣同你男朋友交代係啦～」Lennon又帶住古天樂式微笑點下點下頭。
『如果我有男朋友既話，我都唔會應承你啦～』你估真係唔使諗架咩？！
「哦？點解呢？」Lennon仲好似唔係好明咁。
『唔想煩囉～你知你地D男人架啦～個女朋友同第二個男人一齊行都可以FF到好多野架嘛！』正一FF撚！
「睇黎你對男人真係好有偏見～」Lennon又恥笑我一下。
『唔係偏見囉...』係睇清睇楚囉...
「咁又唔一定全世界既男人都係咁既...」Lennon又望下出面既街景。
『唔一定係全世界既男人都係咁既...我都成廿五歲喇...再遇唔到一個唔係咁既男人我就真係唔使遇喇...』我又跟住Lennon望下出面既街景。
其實又唔係話無遇過既...
只可惜...
「話唔定...你好快會遇到呢...」Lennon又望住出面既街景點下點下頭。
話唔定...我好快會遇到？
「話唔定...過多一兩年你會結埋婚...」Lennon一邊望住出面既街景諗下諗下，一邊點下點下頭。
話唔定...過多一兩年你會結埋婚？
「話唔定...話唔想生...唔想生...突然又生左兩件出黎...」Lennon望住出面既街景諗下諗下...諗下諗下...
話唔定...話唔想生...唔想生...突然又生左兩件出黎？
真係有咁多話唔定咩？
話唔定...話唔定...
『話唔定...咁就過左幾年...過左十年...到時仲係自己一個...一個人咁白白過左十幾年...』話唔定...話唔定...
話唔定呢個先係最有可能發生...亦有好多人已經發生左...
Lennon眼定定咁望實我...
我又眼定定咁望實Lennon...
成個世界都好似寂靜左咁...
就連時間都停頓埋咁...
我同Lennon喺呢個靜止個既空間裏面互相對望好一陣子...
直至到...
「一份美國西冷牛扒同埋一份小食拼盤～兩位請慢用～」靚女侍應將兩份野食放喺我地面前...
「食野先～」Lennon幫我抹一下D刀刀叉叉。
『唔該～』頭先嗰種感覺係...
係錯覺？定係幻覺？
我總係好似...好似見到我既未來...
喺Lennon既眼中...望到我既...未來...
同Lennon Share份美國西冷牛扒同埋小食拼盤...
「俾舊心你食喇。」
我都無再諗先前係錯覺...
『嘩！仲有血架喎！』
定係幻覺...
「呢D係肉汁黎架～五成熟有少少肉汁先好食架嘛。」
有D野係點諗都諗唔明...
『你都無話要五成～』
至少而家...
「你覺得我有需要講咩？」
或者遲D會明...但唔會係而家...
遲D...有機會既話...
同Lennon開心Share完個Lunch之後...
『等我摷摷銀包先～』我就扮晒喺個手袋仔道摷個銀包～
「你扮乜鬼野丫～」Lennon就好爽快咁遞張黑卡俾個靚女侍應，「唔該。」
『扮下野都要既～丫？我個銀包喺邊呢？摷唔到既？摷唔到既？』我就繼續扮晒摷～
「唔見左銀包丫？使唔使幫你報驚丫？」Lennon拎部電話出黎！
『你都唔幽默既...』我冷眼咁望住Lennon...
「我唔幽默？唔幽默嗰個好似係你喎...」Lennon帶住古天樂式既恥笑望住我。
『我點唔幽默丫？摷晒錢包喎～』我就係咁喺個手袋仔裏面摷下摷下～
「報驚都出埋仲唔幽默？」Lennon拎住部電話搖下搖下～
『係喇係喇係喇～你最幽默喇～』我唔鬼摷喇～
「你地D女人真係～」Lennon帶住古天樂式既恥笑擰擰頭～
『真係麻煩呢？』女人係咁麻煩架啦～
「唔係～唔係～」Lennon諗左一諗，「係...可愛～」
『你把口咁鬼甜真係唔信你無女囉！』我忍唔住要直接話Lennon！
Lennon成日都帶住D冧死女既口吻，好難會無女被佢冧死架喎！
「無丫…真係無...」Lennon望住自己對手，擰下擰下頭。
『唔信囉～』你話無就真係無咩？！
「咁真係無丫嘛～」Lennon無奈咁笑笑口。
『你又Man又型又有錢，把口仲要咁花添！點會無女埋身丫？』黐到成身都係添啦！
「我把口有幾花丫？」Lennon諗下諗下，「仲有我話無女朋友姐，無話無女埋身喎。」
『咁即係即飛俠啦！』有錢人都係仆街黎架喇～
「咩即飛俠丫？」Lennon皺住眉咁笑笑口，「係有好多女埋身...但我唔理佢地架...仲覺得佢地好鬼煩添...」
『哦～仲要吊高黎賣添～』仲仆街過即飛俠！
「梗係唔係啦！只係...」Lennon諗左一諗，「拖唔係亂拍既...」
『哦～即係你眼角高啦～』食得招積玩得出色嗰隻啦！
呢個時候，個靚女侍應拎返張單同張黑卡返黎...
「你就當係啦～」Lennon簽完名就拎返張單同張黑卡，「唔該。」
『揀飲擇食～』
「係喇係喇…行得喇嘛？」
『行得啦～』
「唔使去個Restroom先咩？」
『去Restroom呢個Set應該係喺你話埋單嗰陣時做既～而家過左架喇～』
「有關係架咩？」
『梗係有關係架啦～』
「埋單既時候急D架咩？」
『唔關急唔急事架囉好唔好～』
同Lennon落返黎...
『死啦...食到咁飽都唔知會唔會著唔落條裙添架...』我摸下摸下自己個肚仔...
「唔會咁誇張丫嘛？」Lennon又恥笑下我。
『你D男人真係有所不知...D晚裝好貼身架！多少少肉既話，唔係迫爆，就係凸晒出黎！』總之就唔會好睇啦！
「唔會既～你咁瘦～行兩步都唔見左啦。」Lennon又帶住微笑咁講。
『希望真係行兩步個肚仔會細返啦～』有咁易就好啦...
同Lennon邊吹邊行，大家都行得有D慢。
可能大家都有D飽～
行下行下，慢慢咁行返去Lennon架法拉利...
都仲係有唔少人圍住黎影...
仲要有唔少成個專業攝影師咁拎住部單反長鏡喪影...
乜真係咁好影咩？
唔知～
不過就咁睇佢地...只係圍住黎影咁...仲同Lennon架法拉利保持一定距離咁...唔會行得太近...又唔會走埋去挨住影合照...好似驚死自己會整花小小都賠唔起咁...
我都開始覺得...Lennon講得岩...
有班人免費幫自己睇住部車...仲有乜好驚？
“BI！BI！”兩下響亮既“BiBi”聲...
「唔該。唔該。」Lennon就好有禮貌咁叫一叫D法拉利Fans讓一讓，送我上車。
『唔該～』我都好小心咁撳住自己條短裙...好小心咁上車...
咁多人睇住...影住...走光就真係好蝕...
我開始感受到D女明星既不便...
“啪...”Lennon幫我閂一閂好門，自己都上埋車之後...
「咁我地而家返去先？」Lennon扣一扣好安全帶，問一問。
『梗係唔係啦～』我都扣一扣好安全帶，『而家係要去做下Facial做下Spa～』
「做下Facial做下Spa？」Lennon一頭問號咁望住我。
『係丫～仲要去Salon Set頭添～』我點下點下頭。
「仲要去Salon Set頭添？」Lennon望一望我把秀髮。
『梗係啦～你唔係諗住我就咁著條晚裝就見得人丫化？』我冷眼咁望住Lennon。
「下？有問題咩？我覺得你而家已經好見得人架喇喎...」Lennon再打量一下我。
『梗係唔得啦～D皮膚唔搞搞佢唔夠白唔夠滑架！仲有個頭呢～唔去Salon Set返個頭唔得大體架！最起碼都卷下髮尾丫～』有機會使有錢人既錢仲唔洗盡D丫？
「唔...」Lennon認真咁打量住我，「睇黎...我真係無搵錯人...」
『下？唔係搵錯人先岩咩？』我又打量住Lennon。
「點會丫？」Lennon皺一皺眉。
『我要你使多左錢喎～』我又皺一皺眉。
「使得幾多～最重要既係...你知道D...你識一D...我無考慮過既野...幫左我...」Lennon點下點下頭。
竟然係咁...
竟然唔係覺得我趁機使佢錢...反而係覺得我...幫左佢？
『你呢個人真係...』我帶住微笑擰下擰下頭，『D Facial丫～Spa丫～Salon丫要Book架喎...唔知而家仲Book唔Book到添架...』
「呢層...應該無問題既。」
『真係無問題？』
「嗯～我有幾個客...係做呢D生意。」
『幾個客？』
「嗯～D熟客黎既。我諗打個電話去講聲就OK架喇。」
『間野得唔得架？』
「應該得既。」
『唔係D高級野搞唔掂我D皮膚架喎～』
「你D皮膚好粗糙架嘛？」
『係我D皮膚太幼嫩囉好唔好？！』