事隔一個星期,阿仔佢仲係對D工無咩回應,鬧佢又唔係哄佢又唔係,真係唔知點對付呢個仔,不過今日係一個特別嘅日子,因為今日係蔡老闆第一日返新工。

面對佢地兩個,心情真係一個天,一個地。

我同阿然今個朝早都特登去搵蔡老闆,好早就去到樓下等佢,而佢一見到我地兩個,就好驚訝咁問:「咁早你地兩個係度做咩野?」

「你今日第一日返工嘛。」我拎左買好左比佢嘅糯米雞,遞到佢嘅面前,「食飽D先有精神開工啊,唔係比老闆鬧就唔好啦。」

而阿賢,就係佢個銀包拎左封利是出黎,「雖然你人都咁大,不過開工利是呢D野唔少得嘅。」





蔡老闆見到我地兩個咁,都笑左出黎,「傻左咩你地,我咁大個人仲做埋呢D野。」

「拎個意頭姐。」我同阿然笑住話。

而蔡老闆接過左隻糯米雞,但無拎果封利是,「野食我就收啦,不過封利是就唔駛拿,你賺錢都辛苦,用係其他地方啦。」

「意頭野黎架WO?」阿然問。

「我都咁大年紀,意咩鬼野頭WO,我去返洗碗咋,你估會洗死我咩。」蔡老闆笑住咁講。





「咁又係。」我地兩個都跟住笑左出黎。

同蔡老闆行到佢將要做野嘅茶餐廳附近,仲有一個街口之隔,蔡老闆叫停左我地:「我唔係細佬仔啊,唔駛送到我門口啦。」

我地兩個聽到佢咁講後,笑左出黎話:「咁又係,你都咁大個人,整到好似送細路仔返學咁。」

「未係囉,你地快D走啦,唔駛你地送拿,我自己返工就得拿。」蔡老闆話。

「咁……我地就送到呢度拿。」阿然拍一拍蔡老闆嘅膀頭。





「得啦,未咁婆媽啦,今晚放工去你度飲酒啊。」蔡老闆話。

「好啊。」阿然答佢,然後望住我話:「你呢個死老野記住都黎啊。」

「當然啦,點可以少得我果份架。」我話。

三個人,好耐都無試過咁嘅心情,係一種為事業而開心嘅心情,我地老人家到左呢個年紀,好少何可以再為事業而開心。

「加油啊。」我同阿然最後同蔡老闆講。

而佢,好意重心長點一點頭話:「你地都知我性格,一係唔做,一做就會堅持到最後。」

係,蔡老闆就係一個咁嘅人。

望住佢轉身行左幾步後,我同阿然都好安心咁轉身,搭住我膀頭嘅阿然話:「買D咩野送酒好呢?」





「蔡老闆鐘意嘅野食囉。」我答佢。

然而,呢一種安心嘅感覺……

「碰!!!」

一下物件被另一個物件撞到嘅聲音……

「嗞……」

一陣好剌耳嘅剎車聲音……

我同阿然回頭一看,果一種安心嘅心情,頓時消失。
已有 0 人追稿