《孤獨的島住了一個人》: 09 回歸孤島
09 回歸孤島
在KO便利店吃飽後，我回到住所，把電話卡安插在手機裡。
這樣手機就有了電話號碼，雖然我一個聯絡人也沒有。
站在大鏡子面前，我拿著牙刷，看著自己。
刷刷刷牙，灌水，吐——
用毛巾抹臉。
走進我的房間，落地玻璃外面是夜晚大海景。
我卸下外套，掛在牆勾，便撲到床上。
「好神奇既一日。」我蓋好被子，把被子拉上鼻頭的位置。
這時我發現自己多了一種奇妙的感覺。
我居然有點期待明天的來臨。
我很少會這樣想的，以前做學生的時候也不多，上班之後也很少，除了星期五。
流落到孤島之後，就完全沒有了。
「晚安。」我對天花板說，徐徐合上了眼。
在一片寧靜中安睡，很舒暢，呼出鬆弛的氣息，全身都放鬆了。
隨即，意識被一下子吸走。
耳邊聽見風聲，更感到涼意，張開眼睛——
我站立山上，拿著寫滿滿的神的練習簿。
在浩大星空之下，手上的練習簿記錄了我所有的行動和想法。
「返黎喇？」神明丁微笑地走來，取走我手上的練習簿。
「吓？完喇？」我才回過神來。
「個測試就咁？得一日時間咁短？」我追著神明丁問。
神明丁一邊散步，一邊翻閱，狀甚悠閒。
「一日咁短？比夠一年你好唔好？」祂反問，繼續閱讀。
「一年又……」我有點難堪。
「速戰速決OK？」神明丁要求，「如果多幾個人要你幫，個個都要N日先搞掂，咪要排好耐？」
聽了這話，我又有點不滿了，「我又唔係神，又唔識讀心，我點知啲人煩惱緊啲咩？」
「樣樣都要我自己查，係要啲時間架啦！」我繼續說。
「咁你又唔洗激動，我又冇話個測試完左。」神明丁瞇笑地說，「我係想你珍惜每一日啫，唔好以為測試係無限期，可能隨時完都唔定。」
「我好珍惜架喇已經！」我替自己辯護。
「咁我都睇得出……」神明丁繼續翻閱。
「咁目前為止，我表現點啊？分數高唔高？」我熱烈地追問。
「無可奉告。」祂說，再翻了一頁，便把練習簿合上。
祂直視著我，「係測試完結之前，我係唔會透露目前既成績。」
「不過，如果你有野唔明，又屬於我可以回答既範圍，我都會盡量答你既。」神明丁善意地說。
不明白的事情實在太多，我整理一下有什麼可以問。
「點解我會返左黎？」我問，「我明明想訓覺。」
「哩個我可以答。」神明丁說，「本測試既機制係，你一上『床』訓覺，就會被視為一題既終結，練習簿會暫停記錄，你就會返返黎。只要你再打開練習簿，翻到下一題既位置，測試就會繼續。」
「如果我冇上床訓覺呢？」我問。
「咁最盡係去到清晨六點，練習簿就會因為記錄已滿，而強制召你返黎。因為每一題既答題空間有限。」祂說。
原來如此。
我想了一想，「我想問個1404室，點解咁特別既，有一半以上同我以前屋企好似，幾乎一樣，係大小唔同，同埋廁所唔同，再多間房。」
這個問題，原本我只是隨口一問，沒想到神明丁的臉色十分凝重。
「哩個設計……唔關我事。」神明丁說，想回避我的眼神。
「咁關邊個事？」我站到祂的前方。
祂摸著下巴，思考了一會兒，才再次看著我。
「1404室係神明辛設計。」祂凝重地說，「應該話，係神明辛戰死前，所住既地方。」
神明「辛」就是最近在八大神之中，因戰死而出現空缺的神位，也就是我正在爭取的位置。
「吓？佢做咩要設計到好似我屋企咁？」我不解。
「因為佢都係孫正直。」神明丁說，慢慢回想當年，「大約五年前，前任神明辛離職後，我同依加一樣四圍去搵合適既人黎填補空缺。」
「當時，遇到另一個平行世界既你。」神明丁憶述，「佢好特別，有一種魅力，一種影響人既正向力量。」
「我第一眼就睇中左佢。」祂說，「然後如我所料，佢成功通過測試，得到我既提名。」
「係下一步遴選，雖然佢最後只係勉強險勝其他對手，好險咁當選神明『辛』，但係佢留比我地既印象好深。」
「作為神，我自問，有時都覺得神係好無情。」神明丁沉色地說。
「但……神明辛比我既印象係，一個好有情既神。」祂說，露出一絲感慨，「有時我都諗，如果其他神明都可以做到佢咁，世界或者……又會唔一樣。」
默默地聽著神明丁的自白，我理解的只有一部分。
就是戰死的神明辛也是叫孫正直，是另一個平行世界的我。
「佢同我有咩唔同？」我忍不住了。
「佢既人生同你好唔同。」神明丁回答。
「總有相同既野掛，例如讀同一間小學……」我嘗試舉例。
「佢同你既分歧點係，係中學。」神明丁說，想了一下，「你記唔記得……」
「你曾經為左，同你暗戀既陸同學慶祝生日，花心思安排左一日既行程，由朝早見面，下午去邊，至到夜晚去浪漫既地方表白。你又偷偷買禮物，打算比佢一個驚喜。為左買哩份禮物，你仲約左女仔出黎幫眼。」
「夠喇。唔好再講喇……」我的心受傷了。
「而最後，你係冇約佢出黎。」神明丁一針見血，「白費晒所有心機，禮物亦都一直收係櫃桶，冇送出去。」
「唔通……嗰一個我……」我瞳孔放大。
「冇錯，佢係咁多個平行世界之中，唯一一個係遇到『嗰件事』之後，仍然主動去約陸同學既孫正直。」神明丁說。
「咁……佢……約唔約到陸同學出黎？」我心痛將麻，還是爭取發問，「個行程點啊？計劃成唔成功？」
「你真係想知？諗清楚喎。」神明丁觀察著我，不知有何打算。
深深地吸一口氣，平靜一下。
「算啦都係。」我阻止了自己，「另一個世界既過去，冇必要再提。」
「對哩個世界既我黎講，錯過左就係錯過左，已經無法挽回。」我強逼自己說，再對祂問，「重點，係之後丫嘛係咪？」
神明丁沒有回答，只是露出了一絲微笑。
「講！點解要搵我黎做測試？」我問，「唔通你會以為，可以搵到第二個佢？」
「唔係，我冇咁諗。」祂說，整理思路再說：
「人唔知點下決定既時候，選擇去馬定退縮，有時好睇一時衝動。如果嗰刻黎既係一時勇猛，咪拍心口去馬囉。如果嗰刻黎既係怯懦，咪退縮囉。」
「只係哩個比例唔係一半一半，有啲人勇敢既瞬間比較多，少退縮，咁咪會出現唔同既人生囉。」神明丁說，「就好似之前既神明辛咁，係一個勇敢既神。」
「佢既戰死，救左數之不盡既人，雖然世人未必察覺，但所有神都一致對佢抱有最崇高既敬意。」祂敬重地說。
聽著，我還是不太高興。
「冇錯，我就係怯懦比較多，少勇敢既人，咁又點丫？」我挺起胸膛問。
「冇錯，哩個世界就係有類咁既人，多數情況之下都係啞忍、退縮、忍讓……」神明丁說。
慢慢地，祂把手搭在我的肩膀上。
「但關鍵時刻絕對會企出黎既人！」祂對我說。
「本神並唔係要搵另一個，好似上任神明辛咁既孫正直。」
「我係希望搵一個，經歷過諸多磨難同後悔，變得睿智而充滿慧根，最後超越上任神明辛既孫正直啊。」神明丁說，眼神滿是期望。
一時之間，我被打動得滿目含淚。
「我……我去餵雞先，我驚啲雞餓死。」我忍著淚水離去，「順便再瞓陣！」
「唔好去咁耐啊，係度等你啊。」祂叫喊。
回來之後，我要求馬上打開新一頁的練習簿。
日出即將到來，晨曦初現海面。
「準備好啦嘛？」神明丁問，把練習簿交給我。
「準備好。」我目光炯炯地說，把練習簿翻到空白的新一頁。
意識旋即被吸走，再度回去——
充滿試驗的世界。