《精武．黑俠》: 第九章︰父親

翌日，我食過早飯便馬上出門往銀行飛馳去，一分一秒都不想浪費。
去到銀行，向接待員交待過後，他們便安排我進了安滿保險箱的房間裡。
接待員帶我走到父親的保險箱前，示意我交出鎖匙，讓他們替我把保險箱打開。
將鎖匙遞給接待員，他用熟練的手勢，一下就把鎖匙完全插入匙孔內，扭至咔一聲，保險箱便應該彈開至虛掩狀。
我閉上眼用力呼吸一下，做好準備面對保險箱內的所謂武功秘笈。
一手掀開保險箱，發現內裡只有一隻CD封套，裡面裝著一隻光碟。
我心想道，難道父親如此高科技，早於七年前已會把全套武功秘笈copy在光碟之中？
我拾起光碟，轉過身便離去，立即給振聲致過電，然後便上車到振聲家裡去繼續我的線索。
到了振聲家，我自行開過門，走入屋內便大叫：「振聲！振聲！」
「嚟緊！」振聲從書房跑出廳，說道：「我啱啱同緊師傅facetime緊呀，同佢講到話你搵緊乜嘢秘笈，咁啱你就嚟到啦。」




我往房子裡瞄一瞄，說：「仲傾緊？」
「無啦佢off咗啦。」振聲淡淡然說到。
我把光碟從衣袋裡拿出來說：「係喎，呢度有隻cd係喺呀爸留俾我個夾萬都搵到架，一齊睇？」
「方唔方便呀…話晒呢啲你呀爸淨係諗住留俾你咋喎，俾我睇埋會唔會唔係咁好呀？」振聲尷尬地問道。
我輕笑道：「有咩所謂呀兩兄弟，咪一齊學囉，到時大家功夫都有進步，對我地都係好事嚟架。」
振聲聽過後，便只好在梳化上除除坐下。
我把cd放入光碟機，拿著搖控走到梳化上坐下來準備播放。
按下搖控的play掣，畫面顯示著’Loading…’字樣，漸漸變黑。







畫面中，一幅米白色的牆面對著鏡頭，中間放置了一張木椅。
有個人從鏡頭後走出來，他拉了一拉自己的西裝外套，端正的坐在木椅上。
這個穿著整齊黑色西裝，配上一件黑色絨質長袍，蠟上一個復古all back頭，臉上露出唏噓鬚根的男人，正是我的父親。
我和振聲看得聚精會神，不約而同用力吞了一下口水。
父親臉向著鏡頭，慢慢開口說著：「如果你搵到呢隻碟…睇到呢段片嘅話，啫係代表我已經唔喺到。陳真，我嘅乖仔，呢段片我希望你有機會睇到。」
「見到我呢一身裝束，係咪好奇怪？我從來都無喺你地面前咁著過。但係其實著住呢套衫嘅我，先至係真正嘅我。」父親道：「我話我喺政府到做AO，係呃你地。我係一個殺手，一接到order，收到錢，無論件事有幾殘忍有幾污糟，我都要去做。」
「我係一個滿手鮮血嘅人。」
父親停了下來，哽咽了一下，接著說：「我仲記得你出世嗰晚…我接咗個order。嗰陣為咗要個議員喺法會投贊成票，佢地要我綁架位議員個仔。我仲記得，最後個議員無就範到，佢依然投咗反對票，令到班人組織咗好耐嘅一條水路就咁無咗。之後佢地要我殺咗個細路。個細路嗰陣得四五歲，我一手摙住佢條頸，我嗰陣合埋眼唔敢望個細路，聽住啲喊聲越嚟越弱到最後喊聲倒咗。我打返開眼，發現我摙到佢條頸都斷埋。」
「一搞掂個細路，我就即刻趕去醫院睇你。嗰陣時你媽咪手抱住你，我走埋嚟摸吓你塊面，我好記得…你捉住咗我隻手指，對住我笑嗰個畫面…」




振聲看到這裡，不禁以手掩口，露出難以接受的神情。事實上不只是振聲，我亦不敢相信父親竟然會有如此一面。
「我嗰陣…個心好痛…我啱啱先殺咗個細路仔咋！一路以嚟我做過嘅嘢，我殺過嘅人…我有咩資格去有一個咁可愛嘅BB，我有咩資格去有下一代呀…？」
父親眼角流出一行眼淚，嚎啕大哭：「我唔想再做落去啦，我只係想有一個好普通好普通嘅屋企…我只係想做一個普通人咋…」
父親眼神逐漸顯得無奈，擰一擰頭說：「但係已經返唔到轉頭啦…無可能返轉頭啦…」
「我好想睇到你地大個，我好想睇到你地畢業、出嚟做嘢、拍拖、結婚…每一樣嘢我都好想陪你地去做。我好想…真係好想去陪住你地長大…但係我無時間啦...對唔住呀...對唔住呀…」父親淚流滿面地說。
父親用手抹一抹眼淚，乾咳了兩聲，說道：「我以前為咗我自己，為咗名利，我做咗好多好多陰質嘢。香城嘅崩壞，我係有份造成架。乖仔，我求你，你可唔可以幫吓爸爸，幫我為呢個城市做返啲嘢，幫我救返呢個城市，可以嗎…？」
「聯合道墳場九號庫二樓32，去到你就會明架啦，所有嘢…你都會明。」
「永別啦…乖仔。」父親擺出一個熟悉而親切的笑容作結。
畫面仍然顯示著父親的微笑，而我眼眶中的淚水終於忍不下來，沿著眼窩邊不斷滴出來。
我手掩著雙眼，低下頭來，發出一絲絲痛苦的泣聲。
振聲得知這樣的真相之後，根本不知道應該怎樣做才好。
他走過來，手疊著我背脊輕拍，以溫柔的聲線說到：「It’s okay…It’s okay…」

屏幕上的失去了父親的聲音，只是停留在父親的笑容，大廳裡剩下我的哭聲，一直迴響著。