【完】好多件令我好後悔嘅事 (20/4/2017修改): 15 (修改)
「因為無聊。」我簡單地答。
「甘嫁乍？」佢反而好好奇點解我會答得咁簡單。
「係啊。」我理所當然地答，「唔係你以為有啲咩特別？」
「我以為應該會有D好特別既原因Tim。」
「點解你會有依種錯覺呢？」
「吾知牙。」佢諗咗陣，巴士經過咗幾個站，抱住收工後疲倦嘅身軀喺巴士上回覆一個讀者嘅Message.「我覺得你應該系D好特別既人。係因為遇到D好特別既事先會令一個人變成作家？」
「我好怕有人叫我作家。」因為自卑，我修正咗佢嘅講法。佢無即時回覆我於是我又繼續佢嘅話接落去講，「同埋，我哋...至少我啦，我現實只係一個好普通嘅人。」
「一D特別既原因都無咩？」
「無。」我重覆咁話，「無特別原因。」
佢聽到無特別原因之後，顯得有啲失望。「乜系甘牙...」佢咁樣回覆。而我為咗令佢唔好失望，我作咗一個原因畀佢。
「如果真係要講一個嘅話，可能都有嘅。」我話。
「？？」
「記得我中學嗰時有個師妹。佢係個好可愛嘅女仔，戴眼鏡，返學嘅時候紥住條馬尾，佢嬲嘅時候會鼓起泡腮，所以，我係真心覺得佢好可愛。」
「佢細你幾多？」
「四年。」
「中學嚟講，都差幾遠。」
「係啊，係一段會畀人當係怪叔叔嘅年紀，哈哈。」
佢回覆咗我兩個大笑嘅Emoji，「55...」跟住佢接住話，「原來係因為愛情...」
佢聽到我講起中學一個師妹嘅時候好似好興奮咁，我諗佢應該預期緊一個好浪漫嘅愛情故事。
所以我話，「不過個故事一啲都唔浪漫。」
「系點嫁？」佢追問我。
「我中五嗰時就好鍾意佢嫁喇，哈哈，我諗應該算係初戀啩。」
「跟住呢？」
「我就追佢啦。不過，嗰時都有另一個男仔追緊佢。」
「好似似曾相識。」
「唔好回憶係我邊個故喇，哈哈，」我叫住佢，我叫佢唔好諗依啲橋段喺我邊個故事裏面用過，說穿了係我怕佢會將我嘅謊言拆破，「由佢啦。」我話。
佢「嗯」咁應咗我一下。
「總之，嗰時佢揀咗嗰個男仔。」
「之後呢？！」
「之後？我好唔開心啊，於是我就寫咗嗰個故事。」
「甘你好鍾意佢吖...」佢仲同我講，「你都吾系甘冷血姐！」
「係咩？」我問。
「係啊！」佢斬釘截鐵咁答，「你吾系個D唔會鍾意人既人牙！」
依句睇得我有少少辛苦。
「吓？」
「我意思系...你仲會中意人牙，你系未遇到姐。」
「我諗未必。」
「起碼你曾經好中意依個中學既師妹牙！」
好怕有人會太鍾意自己，鍾意到一個地步，一直都好開心咁笑住活着嘅我突然死咗佢一定會傷心到死，所以去到一定時間我會自動遠離佢哋。
「嗯，的確係嘅。」
「之後仲有無連絡？」佢問我。
為咗我哋大家都好，好似我咁樣嘅人，總有一刻好想有人喺身邊好想有人愛我，但長久嚟講我都係唔好拖累其他人嘅人生比較好。
「無喇。」我答。
「點解牙？」
「因為我無未來。」
「中學姐！邊會甘快諗到未來嫁！」
「我的確係個無未來嘅人。」
「你諗太多。」
當然會試過好鍾意好鍾意一個人，唔係無遇過，只係越鍾意嗰個人我越唔敢行前，我好怕佢會知道我嘅一切。慢慢，同我一齊嘅人，竟然多數都係我無所謂嘅人，有人陪我當然開心但佢唔鍾意我又未至於傷心欲絕，一直我都將所謂嘅鍾意放喺依個程度，凡超出嘅我都會避開。
「你依家呢？仲鍾唔鍾意人嫁！」佢繼續問。
「都隔咗咁耐啦。」我加多咗兩個大笑Emoji，我話：「四年喇喎大佬！」
強顏歡笑，懦弱到可悲。
「佢依家點啊？」
「幾個月後佢同嗰個男仔分咗手。」
「幾個月咋？！」
「係啊。」
「點解之後你吾追返人姐！」
「由佢啦，都咁耐。」
佢鬧我，「由咩佢姐！咩野都由得佢既你！」
「不如，」我話，「不如你問我其他嘢。」
佢無理我，佢直接接住中學師妹嘅話題順落去問，「你第一個故事，就係因為依個女仔而寫？」
我答咗佢「係。」
「真係？」
「嗯。」
而我會永遠咁將我真實嘅故事瞞住。
「咁你呢...係咪真係你小說入面嘅嗰間學校嫁？」
「唔好問我個人資料。」
「對吾住。」佢向我道歉。
就好似我會永遠將我隱藏。
「唔洗。」我話。
佢同我講，「我好想識你真人。」
「大叔你都有興趣？哈哈。」
我呆眼凝望巴士車窗，車將要到站，我就嚟落車。落車之後仲要行好長一段路，咁我先至可以返到宿舍。一諗到依段路我不禁嘆一口氣。
「我覺得你好特別。」
我求其回覆咗一句「我少一隻手或者多一隻眼可能先會特別啲。」
「我吾系講依D牙...」佢話，「我係真係覺得你好特別。」
我打斷佢，「我好快會消失，你有無其他嘢想問？」
「唔好住啦！」
落車之後，夜晚有少少風。巴士喺我背後走我一個人喺條無人嘅街上面行，我一個人望住部電話。滿身酒氣。
「我仲好想同你傾計。」
「如果無其他問題，我就Del Page嫁喇。」我盡可能將語氣壓得輕鬆一啲，好似其他人講「早抖」或者「再見」咁。
「我有啊！」佢話。
「嗯？」我等佢講。
「係咪唔問你個人資料就可以？」
「你可以咁講。」
「至少，你可唔可以唔好Del Page住...」
「我唔會再寫小說，依個Page留嚟都無用。」
「我真系真系好鍾意你D故事嫁！我唔想你好似突然消失左甘牙...」
「消失本身就係突然嫁喎。」我話，「好難有人可以慢慢咁消失。」
「起碼留返個Page吖...」
「比我好睇嘅故事多的是，比我作色嘅作家大有人在啦，我又唔識扭橋，又唔會寫到咩扣人心弦嘅嘢。哈哈。」我安慰佢，「你唔洗咁喎。」
「可能我好少睇其他書...但我真系覺得你寫野好特別嫁。」
「我可以介紹多啲其他書你睇啊。哈哈。」
「吾系咩都可以代替嫁！」佢鬧我。
「我可以。」
「。。。」
「我真係唔會再寫嫁喇。我哋講到依到啦。拜拜。」
「我知牙...我知你唔會寫喇！我知喇！」SY輸入中...SY輸入中...對話框反反覆覆出現咁樣嘅句子，「你可吾可以...吾好再比一個甘樣既打擊我牙？」
我無覆佢，我望住佢一直咁講落去。
「佢又系甘...你又系甘...」佢一直咁鬧。
「系咪男人都系甘既呢？」
「點解個個都要粒聲吾出就走晒去喎！」
「做咩啫！」
「系咪我做錯D左咩野姐！」
「一個二個都係甘！」
我話「我同你男朋友唔同嫁...」至少我唔係佢，「我哋係兩件事嚟。」
「點解我要為依D野搞到喊喎...」
再行多兩步，顎高頭就可以見到宿舍嘅輪廓。四點幾鐘，對上一次依種時間仲眼光光無瞓到嘅，係我同阿怡做愛嘅時候。黑夜嘅天空白雲都變到灰色。再過一陣就要日出。
「我好想死啊...」
我停低腳步。
我話「我都係。」
SY：「。。。」
「可能你只係隨口講吓，」我回覆佢，「不過，你唔好死。」
「我唔系有心甘同你講嫁...唔好誤會...我吾系想迫你...」佢話。
雖然由我嚟講，好似無咩說服力。
「總之，你唔好死。」我話。
就算佢最後可能只係隨口一個玩笑。
「我衷心希望你唔好死。」
死可能係肉體意義上嘅死，又可能係靈魂上...如果終有日對未來絕望，就要喺懸岸邊緣活着，喺生死之間痛苦掙扎。
***
我唔知道琴晚我做嘅決定有無錯。
我無刪到嗰個叫做「羊格」嘅Page，我將佢留咗喺到，變成咗一個我同SY嘅信箱。