【完】好多件令我好後悔嘅事 (20/4/2017修改): 21
我認為喺幸福同痛苦之間來回係痛苦嘅事。
我跟住SY一直行到去麥當勞裏面。我食通粉，佢食熱香餅。當我哋都拎到個餐埋位坐底嘅時候，SY佢對我嘅薯餅虎視眈眈，於是我將嚿薯餅分咗畀佢。
SY佢撥撥佢銀紫色嘅頭髮，佢耷低頭，對住塊薯餅甜笑，「你好好人啊。」佢咁同我講。
有點無法理解。
然後佢分咗半塊熱香餅畀我。我問佢，「你唔食？」
「我食唔晒。」佢叫我「幫手食啲。」
我拎起匙羮，畢起佢嘅熱香餅，將佢成塊浸咗落個通粉湯到。
SY佢鬧我，「你晒曬嚿熱香餅喇！」
我話「咁樣好食啲。」
佢眼甘甘咁望住我，佢問我，「真係嫁？」
我點點頭，「係啊。」
佢好佩服咁一邊「哦」住答我，然後佢叉住另一嚿熱香餅，「畀我試吓。」佢話。
我拎開兜湯，背住佢，我話「唔得。」
SY佢嗌住我，「喂也！」
「唔畀。」我斬釘截鐵咁答。
我無同佢講其實咁樣好難食，因為豬骨湯無可能溝得埋蜜糖同牛油。
我有好多嘢都無同佢講過。
***
宿舍少咗返去，有時我會上SY屋企到瞓。一直抱住宿營嘅心態所以拎嘅嘢唔多。雖然寄人籬下，但當我知道佢竟然會需要我嘅存在，我反而覺得依到先係我應該返去嘅地方。我唔知道依種感覺幾時又會熄滅，但有一刻實在過，佢永遠都實在過，正如活過就係活過，死變得無關痛癢。
好似有啲離題。
大約幾個星期之後，天空吹起些少秋風，嗰啲一星期會好熱一個星期會好凍嘅日子。嗰個禮拜好凍，SY佢Facebook inbox我，佢叫我著多件衫。我喺SY屋企幫佢抺窗嘅時候打開咗嗰一扇滿佈灰塵嘅窗，然後我同意SY嘅說話，著多咗一件外套。
我喺佢屋企住嘅期間，買餸係佢嘅錢，煮飯係佢嘅時間，佢識煮嘅餸好多。佢有時會送件冷衫、送件外套畀我，佢話我咁樣著會好睇啲。我覺得佢對我太好，我叫過佢唔好，但佢無理到，佢話我奇怪，點解有人會唔鍾意人哋對自己好，我好似反駁唔到佢，佢有佢道理，於是我哋就繼續咁樣生活落去。只係，如果我唔做啲嘢，我就會覺得歉疚。
我唯一可以做嘅係抺窗，算係喺死亡邊緣服侍一個散佈住生命光輝嘅人。
佢日頭返工，我返夜晚，好似一首Kolor嘅歌，幸好我作為學生，日頭嘅時候我會走堂同佢去食晏，有時會扮成客人喺佢舖頭到行，佢放假嘅時候我哋去行街、去睇戲、去食糖水，嗰段時間佢帶住我幾乎食勻旺角每個角落。我之所以認得旺角複雜嘅路，唔再需要依靠地鐵都可以去到我想去嘅地方，完全歸功SY。
但係，嗰一日我無同佢出去。因為嗰日天氣轉涼，我返咗宿舍拎返我嘅外套。SY的確送過一件畀我，但我肯定，如果畀佢見到我剩係得一件，佢一定又會再買多件。為咗防止依種情況，我只得多走一趟。
***
下晝五點半，天色灰灰沉沉，純粹靠僅餘下來淡灰色嘅陽光照入房間。西牛佢依舊喺左邊嗰一張床到瞓緊覺。佢隔離有一個女人。嗰個女人似曾相識，我好似上堂見過佢，應該同系。
「喂，Roommate。」佢嗌我。
嗰個女仔瞓喺西牛手臂上面，佢跟住擰轉身，仰着睡，微微張開眼，望咗我一眼。
「Hi。」我回答。
「咁多日唔見你嘅！死咗去邊啊你！」佢鬧我。
「我屋企有啲事。」
「你呃阿叔咩？！都未撚聽過你有屋企嘅！」
「又好似係喎，哈哈。」我撓撓頭。
「講！成個月去咗邊到。」佢繼續鬧。
嗰個女仔轉多一個半身，終於跟住西牛嘅視線，向住我側住身瞓。佢望實我。好似一隻要守護一棵樹嘅貓。
「無邊到去啊，只係有啲嘢要處理。」我解釋。
而我解釋到「處理」依兩隻字嘅時候都覺得有啲難以置信。
「嘩，『處理』添喎。」佢對我奸笑一吓，「又去邊到食女啊？」
「無啊，真係有啲嘢要做。」我答。
「有嘢做？」佢斜眼望我，半信半疑。
「嗯。」我肯定一次我嘅說話。
西牛撐大佢大一雙眼，發現咗某啲不可句人嘅事一樣，「哦！我知喇！」
我故作氣定神閒咁問佢「做咩？」心裏害怕依個月嚟走喺旺角街頭嘅時候曾經被佢撞見。
「你寫返小說！」
「乜你睇到咩？」我問返佢。我無諗過會連佢知道我無再寫小說。「嗰段嘢。」我補充。
「睇到啦。」佢答。等咗一陣，佢先至繼續講落去，「做咩咁突然啫喂？！」
「都唔算突然嫁喇，一直都有咁樣諗。」
「你條友吖......同我講聲先吖嘛！」佢鬧鬼我，「話唔定有彎轉呢！」
「要返工。」我答。
「咁又好似真係無彎轉喎。」佢異常認直地沉吟。
然後我哋對望一眼，我哋又一齊大聲咁笑，互相鬧咗句「頂你個肺」，係一段被笑聲同互罵填充嘅時間。
「你寫小說嫁？」突然有一把女聲。
我唔記得咗西牛被窩裏面一直都係一個女仔喺到。
「依家唔係。」我答。
我同嗰個女仔嘅對話無再繼續落去。西牛鍚咗佢一啖，我極端討厭見到依種畫面，所以我擰轉頭，專心做返我要做嘅事。我走到我床底嘅櫃桶前面，打開，喺裏面拎咗幾件厚衫出嚟，又拎咗幾條長褲，順便拎咗盒髮泥，同埋一本書，細聽背後一對男女嬉戲。西牛移動身體牽動被窩嘅聲，少女踢腳磨擦床單嘅聲，壓住氣聲想我聽唔到佢氣聲嘅氣聲。直到有一刻中斷。
「嘩，你搬走啊你？」西牛問我。
「唔係。」我答。
「你拎咁多嘢返屋企？」佢轉而又陰陰嘴笑下我，「定你搬晒啲嘢去你女朋友仔間房啊！」我無答佢問題，西牛佢就繼續審犯咁審我：「你唔係溝女，但又成個月唔返嚟？！」
我話，「我突登留間房畀你哋玩家嘛。」
「吖你咁好死？！」佢笑咗笑，「唔洗介意喎，搵日我哋３Ｐ吖喂！」
啪！
少女一手打落西牛到，「喂也你講咩啊你！」
西牛細細聲好唔忿氣咁話，「我講吓笑啫。。。」
我擰轉背望到床上面依兩個人覺得依個畫面出奇喜感。
「老老實實喇，你去邊啫？」西牛問我。
「我去我朋友屋企到住一排。」我隨便答咗一個答案出嚟。
「死喇！格仔！係咪我做錯咗啲咩嘢事啊？！」佢瞇起雙眼扮到楚楚可憐咁講，「我做錯咗啲咩啊！我改吖！」
「無啊。」我話，「佢屋企有事，我過去陪吓佢。」
故事慢慢喺佢腦海裏面成形。佢意會到嘅似乎係啲更嚴重嘅家庭問題，可能係佢屋企離異、佢屋企有人死......佢諗到一切一切，跟住就無再追問，都唔敢再喺依件事上繼續玩我。
佢問我，「幾時返返嚟？」
成功扯離話題，不禁又鬆一口氣。
「唔知，不過應該快。」
至少以我個人嘅經驗判斷唔會好耐。
我將衣服統統塞到背囊裏面，顯得背囊有啲脹、有啲大。我又一次換好黑色嘅恤衫、黑色西褲，踢對皮鞋。喺全身鏡前上下打量一番。
我問西牛嘅女性朋友，「ＯＫ啊可？」
我唔敢講實嗰個一定係佢嘅女友。我亦都好少會嘗試記得西牛嘅女友，今日一個，第二日可能就唔同咗樣，免得嗌錯人名，唔記得人名反而無咁尷尬。
西牛嘅女性朋友對我肯定咁點一點頭，「ＯＫ。」
於是我揹好背囊就行出去，出發去上班。慢慢我習慣依身裝束，開始覺得自己平時著嘅先係制服。
***
開工嗰晚，電話突然響起，螢幕上面寫住「老豆」兩隻大字。
嗰時係星期五嘅夜晚十點、十一點鐘左右。