【完】好多件令我好後悔嘅事 (20/4/2017修改): 38
好想佢真係可以好好咁考到個試，好想真係可以幫得到佢，好想佢可以過得開開心心。心裏面開始有咗依種諗法，我最後係點都好，好想佢可以過得幸福。
「你啊！做咩呆咗咁嘅喂！」
我微笑，搖搖頭，「好耐無幫人補過習。」我話，「有啲怕會害咗你。」
佢肯定咁同我講，「你幫到我好多，聽完你講，我都明你講咩。」
「係咩？」我覺得，我教得一啲都唔好，而且我成績應該未好到有資格教人——無論係教學業，抑或係其他嘅事上，我相信我都唔係一個稱職嘅人。「我真係會幫到你咩？」我不禁問。
「嗯。」
佢眼睛裏面黑色嘅嗰一點中，嗰個係我。但正因為咁，我先更加之驚，我都好難信得過自己。
佢唔識數學，我就教佢做數學，有啲咩嘢我都唔識嘅，我就上網搵，再喺腦海中將嗰一條公式、將嗰一條解法回憶過嚟。DSE對我嚟講已經係四年之前嘅事，回憶起嚟的確有啲辛苦，於我仿如斷片，但我無論如何都要將個答案諗到出嚟。仲有中文，我將我可以教到佢嘅都教晒佢，有啲耹聽卷嘅技巧啊、到底我以前點樣作文、點樣起稿、點樣審題.....
「你真係明嫁可？」我問。
佢對我點頭，「明啊。」
我將一份卷推到佢眼前，「咁你做一次畀我睇。」
佢拎起筆，開始做題目。佢聚精會神喺題目上面，我聚精會神於佢，佢耷低頭、前陰嘅頭髮垂落嚟，有想佢諗緊嘢嘅時候會伸一伸脷，馬尾安靜伏喺佢背後。然後，我對於我會咁樣望住一個小妹妹感到羞愧，好抱歉。
佢問我，「做咩望住我。」
「等你快啲做完吖嘛，」我答佢，「等緊你啊。」
佢揚起手，將我擋住，「唔好望住我，」佢話，「咁樣我會諗唔到嘢。」
「好啊。」我回答。
佢耷低頭繼續做。我繼續望住佢。佢一雙眼會反光一樣，好似某一個安靜嘅湖漑湖面，好似清澈到可以見到湖底嘅石頭，依種程度嘅清澈。
「你仲望！」佢鬧我。
「唔好意思囉。」我別開視線。
單單係望到佢，唔需要再做啲咩，已經足夠讓我自卑。中午時分尚靠住窗外嘅自然光照明，午後時分越嚟越暗，我企起身，行咗去開燈，兜到去佢嘅背後，陽光照到佢白色嘅T-恤上面，現出佢胸圍嘅輪廓。
覺得好可怕，擰轉頭，喺間屋到周圍咁望。伯母同以前一樣，喺午後時分坐咗喺廚房裏面瞓。輕鐵震動路軌嘅聲音、剎車聲、一班細路喺到追逐、窗外叫春嘅雀，中午過後時間過得好慢。張文靜好苦惱，遇到一條唔識嘅題目。
「唔識做啊！」佢突然大叫，「好辛苦啊！！」
噗一聲咁笑咗出嚟，忍唔住。「慢慢做就做到嫁啦。」我同佢講，壓沉語氣。
「點做啫！都唔係人做嘅！」佢拎起份卷，指住份卷嚟鬧，「連題目都唔知佢嗡緊乜！」
我走過去，細心望住佢份卷。「哈哈。」我笑，諗咗一陣，我終於答佢，「其實我都唔識。」
「咁咪係囉！」佢繼續鬧，「人做嘅咩？！」
我撓撓頭，「不過，」我慢慢咁講，補習嘅時候連一條中學生嘅數學都唔識，真係一件好醜嘅事，「數學應該係唔識先至有做嘅意義。」
佢呆咗咁望住我。
我解釋，「如果題題都識，咁人就變成機器，好似比唔識得做更加可憐。」
佢邊笑邊講，「真係咁咩？！」
「好似係。」本來想好好地講句型啲嘅說話，但畀佢一問，不禁膽怯咗一下，「我諗。」
係佢鬧返我轉頭，「歪理。」
鬧完，我哋兩個同時間靜落嚟，Deadair咗幾秒鐘，又一齊爆笑。畀佢鬧返轉頭，好好笑。「咁一齊諗吓點做囉。」我死死地氣向佢講，「一定會諗到嘅。」
打開電話，最後我都係揀咗問同學，問咗好多個人，連只係上堂見過兩面嘅嗰種人都問埋。有啲人答我唔識，有啲人藍剔咗我，最後答嘅人唔多，得嗰一個。
西牛佢Whatsapp咗張圖畀我，佢直接喺張紙到寫咗個解法出嚟，我直接將幅圖畀咗張文靜睇。張文靜「哦！」一聲，就不斷喺張紙上面寫，終於都解咗嗰題，對埋答案，佢計啱咗。
或者正確啲講，係西牛計啱咗。
張文靜佢好開心咁同我講，「你個朋友好勁啊！」
「哈哈，係啊，」我勉強拉出個笑容，「佢係好勁嫁。」
估唔到我連計數都輪埋，人生一次都無贏過佢。張文靜見到自己計到條數，佢好滿意，拎起寫咗算式嘅嗰張紙，拎到半空，睇完又睇。
「原來可以咁做啊...」好長一段時間，張文靜仲喺到為住一條數學題而驚嘆。
而我已經痛恨西牛，我對佢恨之入骨，恨不得佢死。下一次佢出現喺我面前我就殺死，用刀，喺佢瞓着嘅時候直插佢心臟。
「好勁啊。」張文靜不斷咁喺我面前稱讚西牛。
我瞇起眼，有咁開心扮到有咁開心。「殺人」嘅諗法同「我要去死」一樣，只不過係諗一諗就算，無膽做出嚟。
「佢係你咩朋友嚟嫁？」張文靜問我，「讀咩科啊？」
我盡可能寛容咁笑，「唔重要啦。」
避開咗佢嘅問題，佢無再追問落去。可悲、可悲，暗自感嘆，又無力逆轉，除咗笑咩都做唔到。
「你繼續做下題啦。」我叫佢。
***
張文靜打嗰個電話畀我嘅時候，係十二月中。嗰陣係中午嘅十二點半，我啱啱起身，中學生啱啱放飯。
「喂？」佢依舊溫柔嘅聲線，好似喺我耳邊同我講早晨一樣。
「咳。」起身嘅時候喉嚨好乾，對比起嚟，我有啲對唔住佢，「早晨。」
「Err呢...我今個禮拜六日都唔得閒。」佢先入正題，佢問我「轉第日搵你得唔得？」
瞓喺張床上面聽佢電話半睡半醒，我隨口就答應咗佢。「好啊。」
我問佢「你想邊日？」
我哋一連講咗幾個日子，佢得閒嘅日子就到我要去飲酒 ( 當然我係答佢我要做功課 )，而我得閒嘅時候就到佢有嘢做。好可惜。
本來想收線，叫佢今個禮拜就自己溫下書先。反正我早排借嚟嘅錢，尚夠我活多一個星期。
「咁唔緊要啦...」佢話。
拜拜講到嘴邊。
「不如我出去搵你？」然後佢提議。
我拒絕，「唔好啦，咁遠。」我坐起身，挨住床頭，聽到佢把聲，覺得好溫暖，安靜而輕細。雖然唔忍心拒絕佢，但為咗佢好，「你用多啲時間溫吓書仲好過啦。」我同佢講。
「我都想去你哋學校行吓。」
「吓...」膊頭夾住個電話，一時唔知點回答好。環視四周，衣衫散亂一地，薯片、蝦條、曾經裝過啤酒嘅空罐、一個個酒樽，成間房酒氣瀰漫，夾雜輕輕一陣不知名嘅味道，好怕佢見到此情此景。
「唔得啊？」佢反問。
「唔係。」我即刻答。
始終敵唔過反問句。
「咁得啦！」佢表現得好興奮，「成日都係屈喺到溫書好悶嫁！」
「係咩...？」有啲心虛。
「我聽日下晝過去得唔得？等我放埋學先...」
「唔會好夜咩？」我盡我最後嘅努力拒絕。
失敗。「唔會。」佢回答，「我聽日過去搵你！」
就喺咁，講多兩句再見，我哋就收咗線。
第二日，張文靜上咗嚟。
全日無事發生。我呃咗佢話我全日無堂，陪住佢溫書溫到十點半鐘，我就準備送佢返去搭車。
臨走之前，我叫佢喺間房到等我一陣，佢玩電腦又好，用下手機又好啦，慢慢抖下，我落去用埋大學啲Printing quota，印埋兩分Past Paper畀佢，佢應該點都有用嘅。
一心諗住張文靜收到嘅時候，一貫一副感恩嘅笑容。活下去，至少活到張文靜考完DSE，本來黑暗嘅路，好似見到不遠處有一點光，於是就用盡力繼續行。行返去房門口，一臉樂觀咁打開門。
當我返到去嘅時候，西牛已經返咗嚟。
「哦！原來上次嗰題就係你Roommate做嫁？」張文靜一路指住西牛，一路問我。
西牛兩隻眼直盯住我。「哦...係啊。」我好不情願咁答。
西牛視線無移動過，只係勉強運動嘴邊嘅肌肉生硬咁對住我笑，笑嘅時候佢嘴巴微微傾斜，莫名嘅歪側，眼裏閃過嘅嗰一道光，對校服同處女無限地渴望。
「你Roommate好好笑啊！哈哈！」張文靜側住頭，瞇起眼，然後佢好開心咁同我分享剛才西牛講過嘅兩個笑話。
「又邊係呢？哈哈。」西牛附和張文靜，兩個人喺我面前有傾有講。我置身其中，又彷彿被拒於外。
我對西牛由衷地驚怕，佢眼光直插我咽喉，教我膽顫心驚，前所未有地畏懼。「報應」，滿腦子我剩係諗到依兩隻字。