［短篇］香港都市傳說: 傳說一：不能觸碰的四不像（十二）

「你地等我搵下先，Tracy……Tracy……咦……奇怪……」阿強拿著手機，露出難以理解的表情。
 
「喂，點呀你，做咩呆咗呀？搵唔到就算啦，尋日你都似係俾鬼迷架啦。」阿良見阿強在發呆，忍不住這樣說。
 
「唔……唔係呀。的確Tracy係無add我，但……我有一個新嘅friend request，個頭像仲要……仲要係……」阿強聲音開始顫抖，好像很害怕似的。
 
「你講咩呀？拎嚟俾我地睇啦！」阿良忍不住把手機搶了過來，三人看到時，也不禁嚇了一跳。
 
原來，那個奇怪的交友邀請，使用的頭像，竟然是一雙發出紅光的眼睛。
Tina和Keith被這奇怪的頭像嚇了一跳，但遠遠沒有阿良的反應來得強烈。




 
只見阿良在看到那頭像時，跟阿強一樣，身體不斷的顫抖著，而且臉色明顯變得蒼白，連握緊手機的力氣都沒有了。
 
「小心！吁，好彩接得到，你兩個無事呀？做咩突然間咁大反應。」Tina敏捷的從阿良手上接過手機，不解地問。
 
「係……係四不像……」兩人顫抖著說出這句話，Tina和Keith神色也變得凝重起來。
 
「唔……唔係啩？可能有人玩嘢，PS咗幅咁嘅相啫！呀，不如睇下呢個係咩人啦，可能係你啲朋友玩你呢。」Tina說了這個連自己也不接受的理由，強行按了那個人的頭像，希望從他的Profile可以找出一些線索。
 
但是，每當按了那個頭像後，出現的都是錯誤的訊息，完全得不到任何資訊。




而且，他們更嘗試刪除這個交友邀請，卻沒有成功，仿佛只餘下同意這個交友邀請的選項了。
 
「點會咁奇怪，刪又刪唔到，入去睇又係Error，玩嘢呀！」Tina在無數次嘗試後，也得不到任何收穫，便開始對著手機發脾氣。
 
「算啦，暫時唔好理佢住啦，再係咁浪費時間都唔係辨法！我地都係講返呢兩日大家搵到啲咩資料，儘快幫阿良同阿強擺脫呢個詛咒啦！Tina，尋日你話遇到啲麻煩，咁你今日搵到初代會長未？」Keith重新把焦點轉回他們的發現上，正式開始了第二日的討論。
 
眾人想想，也覺得有道理，便又開始著眼搜集得來的資料。
 
「為咗阿強都可以知道我地進度，我將尋日得到嘅資料簡單整理一下啦，反正都無咩特別發現。」Keith於是把昨天的資料整合，簡單告訴阿強。
 




原來經過了一整天的調查，阿良那邊除了找到一堆似是還非的新聞外，便沒有任何收穫。
 
Tina方面，她花了半天時間，總算找到了第二代的委員長和其他成員，但奇怪的是，第二代的所有委員，甚至包括委員長，竟然都沒有人知道初代成員的聯絡方法，能夠知道的，只有那些成員的名字而已。
 
而最有收穫的，應該算是Keith了。他再一次拜訪陳同學的家裏，一方面慰問那些家人，另一方面則是用了各種理由，讓他帶走了陳同學房中的一些資料，而且更得到了陳同學的社交網絡常用密碼。
 
「呢啲就係我地尋嘅收穫啦。」Keith解釋。
 
「吓？點解佢屋企人會咁信你，連啲咁私人嘅資料都俾你架？」阿強難以置信地說。
 
「好簡單，兩個字，坦白。我將四不像嘅呢個傳說交代咗一次俾佢地知，而且亦都同佢講咗喺你地身上出現嘅一啲怪現象。佢媽媽聽到之後，先講返佢個仔生前都有講過啲類似說話，不過當時純粹以為佢壓力大。我諗佢應該有啲內咎，無好好處理佢個仔嘅問題，所以好快就肯俾啲資料我。我今日上去佢屋企，都有啲新發現，不過我果邊比較複雜，都係等Tina同阿良講完先到我再講啦。」Keith看來還在整理那些資料，所以阿良便先行交代。
 
「我今日主力去搵一啲舊雜誌，結果俾我發現到一本已經執咗笠嘅雜誌，曾經係出事果年，報導過大學怪異傳聞。而入面都有提到城大嘅四不像，但入面全部嘅受訪者唔係遮住塊面就係無出真名，我都唔知點樣進行下一步。」阿良展示了一疊複印的資料，內裏記載著當年的一些報導。
 
「咦？呢本雜誌……我有印象，有無寫到邊個記者呀？鄭浩宏……鄭浩宏……個名好熟……」Tina把複印本搶了過來，仔細的觀察著。




 
「雜誌報紙果啲我諗我已經搵得七七八八，我諗過埋聽日都無新發現嘅話，我就可以……」阿良話說到一半，突然Tina驚叫一聲，打斷了他的說話。
 
「呀！我知啦，鄭浩宏，呢個記者我家姐識佢架！今次掂啦阿良，我叫家姐聯絡佢，你聽日試下去搵佢，睇下有無啲咩資料係佢無登出嚟嘅！我相信一定搵到啲新嘢架！」Tina興奮地說，其他人聽到這裏，也感到高興。
 
「太好啦，我都準備放棄搵呢啲舊新聞架啦，依家有個記者係度，掂晒！」阿良說。
 
「放咩棄呀？我呢邊頹到咁都未放棄啦。我呀，今日走去重新搵過晒啲委員，仲上埋去學生辨事處問，都查唔到初代委員長啲資料呀！不過我唔會放棄架，我聽日會再去搵，反轉間學校我都要搵出嚟！」Tina那不服輸的性格在此表露無遺。
 
「唔駛咁激動。Tina，你聽日同阿良佢地一齊去搵果個咩鄭浩宏啦。」Keith邊整理陳同學的資料邊說。
 
「吓？點解呀？」三人異口同聲地問。
 
「既然呢個記者做過咁嘅訪問，佢應該一定訪問過委員長班人，所以你地一齊去啦，希望可以搵到啲新嘢，最好捉埋初代委員長出嚟，解開埋日記簿最後被人撕走嘅秘密啦！」Keith說。
 




三人聽到後，便覺得充滿希望。
尤其是阿良和阿強，仿佛已經解開了詛咒一樣，高興的討論著應該要問那個記者甚麼問題。
 
就在三人熱烈討論之際，Keith總算停下了手上的工作，臉上卻露出不安的神色。
三人察覺到Keith的異樣，都不約而同的看著他。
 
「唉，希望你地聽日可以搵到啲新資料，盡快證實當年係有生還者啦，如果唔係……」Keith皺著眉搖了搖頭。
 
到底，Keith在整理好資料後，發現了甚麼，以致他如此不安呢？