凌晨時分。
 
天色還有大約兩個小時才會亮起,這個時候,整個城市正處於熟睡的狀態,通常不會有死亡的出現。
 
我如常地趁著這段空檔,來到了海洋公園的摩天巨輪的頂部,等待著日出的來臨。這時公園早已關門,四周異常寂靜,往常的熱鬧人聲和機動遊戲的運作聲,此刻換上了隱隱約約的蟲鳥嗚叫聲和草葉蕭瑟的冉動聲。沒有了通明的燈火,樂園除了變得幽暗,更有點陰森,像是隨時會走出一隻駭人的猛鬼…
 
哈….想深一層,我不就是那隻猛鬼嘛。
 
我平躺著,雙手抱後腦,蹺著腿,一邊數著天上的星星,一邊在冥想…
 




想得入神之際,面前突然出現了一張倒轉了的臉。
 
「哇屌!」我被嚇至整個人彈起,差點便失足由幾百尺高空掉下去。
 
回過神來,發現那張臉的主人原來是阿飛。
 
「嘻…」奸計得逞的他得意地笑著。
 
心中早已感到莫名的氣燥,現在被他如此惡作劇一番,突然感到憤怒:「人嚇人無藥醫架!」
 




「咩事咁炆啊?」他照舊一副悠然自得的模樣。
 
「無…」事實上,連自己也說不出心情變得糟糕透頂的原因。
 
這時,我察見黑漆漆的天空中出現了些微異樣,一道白色的光柱由天空射落。
 
「咦!?嗰邊有道光喎!」我指向另一邊山頭。
 
「有人啱啱完成任務,可以升天嚕,真係恭喜哂。」阿飛輕輕拍掌。
 




「誒!?」
 
「出現呢道白色光柱既話,即代表某位燈靈已經集齊哂所有靈燈,神即將要召見佢,然後進行審判。」
 
「乜仲要審判?係點架?」
 
「鬼知咩!如果我知道係點既話,代表我已經投左胎,而唔係喺度同你吹水啦!」
 
白色光柱消失了,看來那位人兄經已順利抵達天國。
 
「我今日見到死神…」我說。
 
「係!?死神有幾隻架喎,你見到邊隻先?」
 
「好似係叫咩雙煞…係東哥話我知。」




 
「哦…勾魂雙煞係四大死神之一,佢地係一個組合黎,出左名鍾意亂咁殺人,至於其餘三位死神…相信你會比較少見到,因為佢地通常都會留喺地獄,好少出現喺人間。」
 
「關於死神既事…你係咪有野隱瞞緊我?」我問。
 
「哈…無啊,我自己既事黎者,都唔關你事既,所以唔算隱瞞。」
 
「洗耳恭聽。」
 
阿飛想了一會後,說:「幾年前,南丫島海難,記唔記得?」
 
「記得。」
 
「當日所有死難者頭上既靈燈都係我親手收,而重點係…我爸爸媽媽當日都係喺呢架船上面…」阿飛黯然道。
 




我不知道該說些什麼,只是拍了拍他的肩膀一下,以示安慰。
 
「呢場並唔係一場單純既意外…」阿飛握緊了雙拳,表現有點激動。
 
「你既意思係…呢場意外,係死神搞出黎?」
 
「無錯…當日係我第一次遇見勾魂雙煞,我仲親眼睇住船上所有乘客既魂魄通通被佢地兩個勾走,包括我爸爸媽媽…」
 
我能幻想得到那個駭人的場面,因為今天才親眼目睹過它們是如何勾魂,太可怕了…
 
「咁啲人既靈魂…會去左邊?」
 
「俾死神殺死既人,一般黎講都會落地獄,但如果靈魂係直接被吞噬,成為左死神既食物既話,亡魂會依附喺死神身上,成為死神邪惡力量既一部分,咁樣會仲慘過落地獄…」
 
那今天那個孕婦和肚內的嬰兒豈不是…




 
阿飛又說:「除非有方法令死亡降臨喺死神身上啦,咁呢班亡者就可以得到解救喇…但咁係無可能發生既事,因為死神就係掌控死亡既神,佢又點會死呢,哈!」
 
「……」
 
「而我爸爸媽媽既靈魂,當日就係分別俾呢兩個死神吞噬,而家應該都仲喺佢地個肚入面,相信以後都無機會可以出翻黎…唔怕講埋俾你知,你見我平時好似無所事事,但其實我一直密謀緊一個比收集靈燈更加重要既任務…」
 
「你唔係想同我講…想救翻你阿爸阿媽呀嘛!?」
 
「無錯!」
 
「點救!?」
 
「打低勾魂雙煞,打到佢地嘔翻我屋企人既靈魂出黎為止!」
 




「痴線!邊有可能啊?」
 
「咩無可能啊!?」阿飛指著自己的腦袋:「用念力,喺靈界入面,只要念力夠強,就乜都有可能發生,只不過我既念力始終未夠…」
 
簡直就是瘋狂!
 
阿飛又說,這幾年來他一直在留意勾魂雙煞的一舉一動,尢其當它們正在收割靈魂的時候,想要觀察一下能否從它們身上發現什麼弱點或者破綻,可惜,死神始終是神,而神便是完美,根本無懈可擊。加上燈靈和死神的級數實在相差太遠了,我們雖被稱為燈靈,某程度上卻只是一隻遊魂野鬼,阿飛自知與雙煞相鬥只是死路一條,壓根兒無法戰勝,向他們挑釁的話,隨時會被一擊殲滅,被打至魂飛魄散,到時候便不用再說什麼投胎了…
 
聽完一切的來龍去脈之後,我完全愣住了。
 
整件事突然變得相當熱血,心頭更產生了一股火熱,若然我不是還有醒過來的機會,說不定會豁出去,自動請纓說要助他一臂之力。
 
「你放心,件事唔關你事,我唔會連累你既,你聽完就當無聽過啦。」阿飛。
 
「你真係諗住要咁做?」
 
「當然啦!雖然係以卵擊石,但我一定會嘗試,就算最後真係俾佢地打到灰飛煙滅,我都一定要試…佢地實在太亂黎啦,其他死神都唔會好似佢地咁成日黎人間搗亂,所以呢件事並唔係純粹報仇咁簡單,而係替天行道!」阿飛不斷咻咻咻的擊出空拳,眼神堅定:「再者,死神雖然係神,但佢地有啲唔同,因為死神生前其實都係一個人黎,只不過佢地既罪孽太深同埋怨氣太重,所以先會逐漸走入魔道,最後成為左死神…」
 
他向我單了單眼:「只要唔係百分之一百既神,就一定會有弱點!」
 
「加油。」除此,我還可以對他說些什麼?
 
「但我無咁快郁手既,陪你收集哂啲靈燈先啦。」
 
「而家差幾多啊…睇過!?」阿飛打開了靈冊,說:「仲差一半左右者,好快就搞掂啦。」
 
我摸了摸空蕩蕩的褲袋,才意識到自己身上那本靈冊原來已被阿飛神不知鬼不覺扒去:「搞錯啊,偷人野!」
 
我們在月光下互相追逐,悶了便躺回到摩天輪上,有一搭沒一搭地聊著。
 
不經不覺間,太陽已慢慢升起。