「冒險」「生存」《香城之夢》: 玩家
「請與NPC對話」呢句野又一次打沉左我既希望。
甚至將我打到更深。
點解我阿媽會變左NPC架！？
明明佢個樣無起格，仲係同平時一樣，點解會話佢係NPC架？佢係我阿媽呀！
咪住先，如果阿媽變左NPC的話…咁阿妹會唔會都…
我：「阿妹呢…」
媽：「你阿妹？係廚房呀。」
「請移動至廚房。」
又係個把聲。
我一邊係心入面話唔好，一邊行去廚房。
我一行入廚房，就見到阿妹佢企左係雪櫃前面。
可能因為我腳步太急，行得太大聲，我一行到入去就比佢發現左，佢仲即刻啤住我。
無錯，佢每朝起身心情都唔好，都會啤住我。
亦因為咁，我個心都放鬆左一秒，因為覺得佢仍然係平時既佢，唔係咩NPC。
可惜，放鬆都只係放鬆得一陣，事情總係不如人意。
「請與NPC對話。」
連我阿妹…都係NPC?
可唔可以搵人話我知呢D全部都係幻覺呀！？
係喎！我直接問佢係咪NPC咪得囉？
我：「阿妹…你係NPC？」
雖然我知道自己咁問係好白癡，但我而家真係諗唔到其他好d既問法。
妹：「吓？你尋晚打通宵機打到傻左呀？一朝起身就問埋哂D白癡問題，去刷牙洗臉啦要返學啦。」
我連消化佢呢句說話既時間都無。
我之所以會咁講，係因為阿妹講完野之後我突然feel到有D唔妥。
種感覺就好似你打機㩒左Menu，Pause掣咁，成個世界都靜止左咁。
阿妹既表情，微波爐既倒數，全部都凍結左咁。
「到底又發生咩事」呢個諗法一係我個腦浮現，之前個種彈出式視窗又返返黎。
「完成任務：與NPC對話」
「獲得獎勵：一百港元。」
搞咩啊…
個視窗下面仲有一個剔掣，係咪想叫我㩒落去？試下先。
「嘟。」
㩒落去發出嘟既一聲，D視窗就自己消失哂。
唉，我係咪都應該開始接受現實，唔係，係接受我已經唔再生活係現實呢個事實。
咪住先，既然呢個係game，咁應該會係online版，應該會有其他玩家架？
斷估呢隻都唔會係單機game掛？
「《香城之夢》是一款多人遊戲，目標是構建一個虛擬現實給眾多玩家，讓眾多玩家可以在這個虛擬現實中隨心所欲，構建出無限的可能性。」
啊，又係個把聲。
「現在，你可以在你的左下角見到你的HP計，當HP計歸零，你將進入「死亡」狀態。」
啊，真係有條HP計走左出黎。
「HP計將會因以下因素而扣減：受傷，疾病，長期飢餓。」
「HP計並不會自動回復，你必須透過治療，進食，休息等方式才能回復HP計。」
「而地圖，時間，銀行存款等資訊你則可以透過電話查閱。」
「電話將會有其他功能，請密切留意。」
「新手導航將到此為止，如你有任何疑問，請利用電話查閱，祝你有愉快的遊戲體驗。」
所有野都隨著把聲消失而恢復原狀，時間再一次轉動，阿妹終於眨眼。
不過都唔係所有野都係回原狀，我多左條HP計，手上亦多左部電話。
放過我啦好嘛…
係喎，頭先把聲話我有問題可以用部電話查，咁一於用佢查下點解阿媽阿妹會係NPC先。
我㩒㩒電話，發現入面多左幾個Apps，唔係我裝既Apps。
其中一個就係「幫助」，我即時就㩒左入去。
呢個App入面全部都係有關呢個咩《香城之夢》既野，例如設定呀，點樣可以賺錢之類。
偏偏我就係搵唔到有關NPC既野，仲有有關登出既事。
妹：「喂阿哥，行得未呀？再唔行就會遲到架啦。」
我：「哦哦…而家黎。」
死，佢語氣實在太似阿妹，一時無為意就俾左反應佢添。
不過都係既，反正而家都唔知可以點做先好，就返學出去睇下咩環境先啦。
就係咁，我換好校服，同左呢個NPC阿妹返學。
係返學既途中，我好留意身邊既所有野。
所有野都同平時一樣，港鐵仍然存在，仍然九萬幾人搭，好多人仍然卡住係拍卡入閘呢下。
暫時我發現到唯一唔同既係每當我聚精會神去望D車個陣，架車既資訊好似馬力，剎車各方面既野就會彈出黎。
無錯，就好似GTA你睇車咁。
估唔到到你親自去感受個陣，種感覺會係咁得意。
就係我好似一個三歲細路去睇呢個世界個陣，我已經返到學校。
學校都唔例外，同現實既一樣。
我無記錯的話，GTA入面好似無學校？點解呢隻game會有？
如果所有野都同現實既一樣的話…
啊，果然係咁，佢地全部都係度。
就連係game入面都係咁完美啊你？
不過都正常既，如果呢隻game真係完全按照現實黎做的話。
咪住先，點解…
「早晨呀阿賢，尋晚做乜唔on RC？」
又係一把熟悉既聲音，係黑仔把聲。
我擰轉身，果然見到佢。
黑仔係我同班同學，同時亦都係我其中一個比較friend既朋友。
至於點解叫黑仔，因為佢皮膚好黑…
我：「eh…有少少事要做所以無on囉。」
黑仔：「有野做？去溝女吖你？」
我：「邊有女吖…」
屌明明d對答好似平時咁，但我居然覺得好唔舒服，感覺真係好怪。
明明佢同黑仔真係一模一樣，但自己個心總係提住佢唔係真正既黑仔，好辛苦。
咦？個D係咩黎？
就係我望住黑仔既時候，我發現係離佢身後不遠既地方有一個綠色圓形浮係半空。
我：「喂，黑仔，你見唔見到個個綠圓？」
黑仔：「綠圓？睇過，咩呀邊有呀。」
我：「喂唔係喎，你睇清楚，個度喎！」
黑仔：「屌我睇得好清楚呀，邊有咩綠圓啫，你係咪打得飛機多有幻覺呀？」
佢睇唔到？但我到而家都仲見到個綠圓喎。
黑仔：「喂係喎你知唔知尋日Form5個個女神Che…」
我：「Sorry我失陪一陣先。」
我無等到黑仔講哂，應該話我根本無聽佢講野。
我始終都被個個綠圓吸引住。
我望住個綠圓，係操場上穿過重重既人羣，最後我終於走到去個綠圓個度。
綠圓既正下方，企左一個人。
而呢個人亦做緊同我類似既事，我地都係度望住對方既頭頂。
呢個畫面直至到彈出式視窗出現先告一段落。
「發現玩家。」
佢係玩家…？
唔記得講，我眼前呢個人係一個女仔，名我唔知，但我記得係隔離班既。
「你…都係無啦啦入左黎呢隻game？」
我都未黎得切反應，佢就搶先我一步開口。
我：「啊…係…你係？」
「我叫葉傲雪，你可以叫我Elaine。」
呢次就係我第一次同佢講野。