《亡命者》「選擇」「領袖」: 第五章 護送

騎電單車嘅我開始格外留神，對會經過嘅路都做一啲記號，一啲轉角位就搬單車阻塞，以防轉移時學生被綠眼人咬，又花左啲時間係車個到搵物資，最後一堆垃圾當中我只係搵到望遠鏡，原本15分鐘嘅路程我用左成個鐘去整障礙物，奇怪嘅係一隻綠眼人都見唔到。

整完嘅時候我上返電單車，去確定防線。

我係遠處用望遠鏡觀察商場，發現的確係有障礙物塞住主要出入口，又有幾個警察係大門附近監視，入面有啲市民係到。

確認到後我快速離開，返學校前再檢查多次路線，最後用左兩個鐘先返到學校。

返到學校已經有好多學生慰問，又問我係咪真係有防線，有啲就問路上有無綠眼人。





我如實解答佢地嘅問題，學生都充滿希望，但係有啲都係唔信，依然留係學校。

最後，只有百幾人願意跟隨我地，其餘都想留係學校等。

到於學生嘅武器各有特色，肥巫就用雜誌同膠紙包手臂同拳頭，飛宏就繼續用菜刀，不過左手都包左雜誌，而其他學生就係體育室拎標槍，棒球棍，木棍，重有幾個拎掃把。

而樂兒就拒絕我比嘅萬用刀同胡椒噴霧。

『你留返嚟自己用啦，你比我都唔識用，你用嚟保護我咪得』樂兒一邊甜笑一邊拎棒球棍





『好啦咁，有咩事叫我，知唔知？』我提醒樂兒

『知啦長氣，去指揮佢地啦領袖』樂兒推住我說

『係嘅小丑女』講完我就去飛宏同肥巫講解路線同隊形安排 老實講，樂兒化埋妝真係似小丑女。

『路線有無問題？』我講解完問

『無，但係隊形個方面你去左邊？』由於隊形入面冇左我既部分所以肥巫忍唔住問





『我會係外圍騎電單車巡邏，而個條路線右邊都係建築物，咁樣你地就只係需要防左邊，男仔就係出面用長棍防守，宜女仔就係入面支援，拖延時間到我過嚟解決』我解釋自己嘅崗位

『聽到都覺得你辛苦』佢地兩個苦笑地說

『有能力就要做嫁啦』我都不禁苦笑

之後又解釋比學生知隊形嘅運作同路線，重有對付綠眼人嘅方法，大部分男生都願意防守拖延時間，重有啲想跟我巡邏，但係佢哋嘅好意我心領，因為我知道，佢哋重未有勇氣殺人。

所有嘢都準備妥當，學生嘅心情都開始沉重。

學校大門再次打開，百幾人組成隊形出發，我就騎愛匹係前面巡邏同偵察，飛宏係最頭帶領隊伍前進，肥巫係中間支援，樂兒，心姐同南南都係中間安全啲嘅地方。

一開頭幾分鐘都風平浪靜，進展都幾順利，係轉角位都無綠眼人嘅存在。

十五分鐘嘅路程，我地巳經行左十分鐘，去到轉角位，呢個時候有七隻綠眼人出現左，綠眼人平均分散進攻，全隊停止移動反擊，我就係飛宏個到返轉頭。





好快就見到兩隻綠眼人，啲學生用掃把，標槍維持雙方嘅距離，等我嚟支援，見到我嚟緊嘅學生就用力將綠眼人推開，兩隻綠眼人雙雙倒地，而我就煞車抆槍係四米距離開火

「砰」

「砰」

『第七隻，你地做得好好』我自數後對學生説
但係學生們都未見過人死，望住兩條屍體發呆，其中一個重係頭先自告奮勇跟我巡邏，但係我無時間安慰佢地，馬上踩油前進。

下一隻就係轉角位，我同班學生用同樣嘅戰術解決，我連換彈夾嘅時間都無就要出發，得返三發係彈夾，但係面對四隻，到左中間肥巫呢邊，都係得一隻，但係肥巫用拳擊對付綠眼人，方法同我教嘅一樣，不斷打佢個頭，令佢咬唔到人，見到我嘅時候都係用同樣嘅戰術。

「砰」短距離爆頭

『第八隻，唔該你肥巫』我向肥巫説





但肥巫嘅反應同其他學生一樣，而我可以做嘅就係盡快消滅所有敵人。

到下站又有兩隻，有一隻突破左防線攻擊學生，我先開槍打死未突破個隻，落車左手拎伸縮警棍應戰，對付綠眼人嘅學生都退縮，害怕綠眼人。

綠眼人不斷揮爪，有一個學生手臂不小心被爪傷，退跌落地，慘叫一聲。

綠眼人隨即閉眼咬下去，但咬下去的感覺卻沒有肉感，綠眼人開眼才發現自己咬緊枝警棍，眼前嘅男人右手係自己額頭前。

「砰」

『第十隻』綠眼人臨死前聽到的一句話

我殺死眼前嘅綠眼人之後就放下急救包，騎上愛匹前往殺最後一隻。





我加大油門，去到隊形最後，最後嘅學生盡全力推開綠眼人，我係十米前停車，落車同拎一名學生手上的標槍，用擲標槍的技術擲向綠眼人的頭，但太耐無擲結果打中綠眼人條腰，佢隨即望過嚟，見我無拎武器就衝過黎想咬我。

有個學生拋多枝標槍比我，我雙手接實，半蹲，等到綠眼人到三米範圍時由下而上直刺人體最脆弱嘅地方
。
。
。
眼球

幸運嘅係一次就刺中左邊眼球，我加強力度直插入腦，綠眼人慘叫倒地，左眼流出眼球液體混合血液，有幾個學生忍唔住嘔返今朝啲早餐出嚟。