香港都市傳說三：無法逃離的上環地鐵站: 第二十章：最後一問

「嘻嘻！點解你兩個突然之間咁認真嘅？」那小朋友用近乎恥笑的語氣詢問。
 
阿朗和阿達只能用憤怒的目光看著他，卻無法做出些甚麼來。
 
「你地唔好咁望我啦，當日我都係咁樣望住大佬全，但最尾俾佢封印咗！你地再咁望，我會好想即刻殺晒你地！」小朋友的聲線由恥笑變得十分激動，而且語帶威脅，嚇得兩人不自覺的發抖。
 
「嘻嘻！咁咪乖囉！呢個樣先襯你地架嘛！當日超哥佢地嗰個絕望嘅樣......就好似你地依家咁。哈！哈哈哈哈！」那小朋友前一秒才帶著憤怒，現在卻又變得十分高興。
 
這種捉摸不定的態度，使兩人心中產生了一個疑問，就是即使他們能夠答中問題，到底是否真的能夠獲救！
 




「你……你究竟……」阿朗忍不住想發問，那小朋友又對他怒道。
 
「你咩呀你！我有名架！我雖然係乞衣，我都有名架！係咪你都好似大佬全班人咁，以為我係乞衣，無人無物就睇我唔起呀！答我呀！」那小朋友突然抓著阿朗，把他扔向牆上，阿朗痛得從口內吐出了血絲。
 
「咳咳！咳咳！我……我都唔知你咩名……咳咳！」勉強站起來的阿朗，痛苦地說。
 
「唔知唔知！唔知你唔識問嘅！又係一句唔知，你同大佬全話唔知我未死有咩分別呀！」那小朋友怒吼了一聲，突然快速地衝向阿朗眼前，阿朗嚇得咬緊牙關和緊閉雙眼，準備承受另一次的攻擊。
 
然而，他並沒有感到自己受到任何傷害，他只是聽到那小朋友發出了數下冷笑。
 




「嘻嘻！做咩咁驚啫？你啱，我應該介紹下自己嘅！雖然我無老豆老母，又係一個乞衣，但我都有名架，我叫阿有，富有個有，我好希望自己可以有好多嘢，所以就叫呢個名啦，係咪好有意思呢？」阿有對著阿朗，露出詭異的笑容，實在猜不透他下一步會有甚麼行動。
 
「阿……阿有，幾好呀個名……」阿朗戰戰兢兢的說，他實在不希望說的話刺激到阿有。
 
「哈哈！係咩，真係咁好咩個名？哈哈哈哈！我覺得好蠢架個名！你竟然覺得好？哈哈哈哈！」阿有開懷地笑，但笑聲卻令二人都感到恐懼。
 
若世上最可怕的是痴線的人，那痴線的鬼，相信比痴線的人更加可怕！
 
「你！頭先想問乜嘢？我即管聽你講！」阿有停止了笑聲，認真地問。
 




「我……我淨係想知，我……我地答中你條問題……你係咪真係會放我地走？」阿朗大著膽子的問。
 
「你咁問咩意思呀？你當我咩人呀？我講嘢會唔算數咩？我話你地知，我講得出就一定算數！一定算數呀！」在說這世話時，阿有近距離地看著阿朗，那雙冒著血絲的眼睛，實在十分嚇人。
 
「咁……咁你……你問啦！」阿朗不敢再說些甚麼，只好把話題帶回原來的主題上。
 
「哼！你要我問我偏唔問！你兩個一啲都唔好玩！呀！我諗到啦，我放咗你地，之後再捉條片嘅人入嚟玩咪得囉！你地放心，之後我會俾你地睇返佢地條片，咁樣一定好精彩！哈哈！哈哈哈哈！」阿有真的像個小朋友般，想到一個新點子後，便立即高興地大笑，但內容卻是如此的凶殘！
 
「唔得！」阿朗和阿達聽到後，同時大叫出來，他們絕對要阻止這事情。
 
「唔得？你地覺得，你地有話事權咩？」阿有邊說邊冷眼看了看兩人，那冷漠的眼神使人心生寒意。
 
「你......你話你……講嘅嘢……會……會算數架嘛！」阿達鼓起勇氣地說，卻換來阿有凌厲的眼神。
 
「係……係囉！你……你話你一定算數架！」阿朗也鼓起勇氣附和。




 
只見阿有一輪沉默後，便冷冷地說：
「哼！好！我講嘢一定會算數！不過……」
 
阿有襯著兩人沒有留意，飛快的把兩人的右手拇指用力地扯了下來，大量的鮮血
伴隨著兩人的慘叫聲瘋湧而出！
 
「呢兩隻手指，就係你地令到我唔滿意嘅代價！」阿有把剛剛扯下來的手指，放進他的嘴裏，然後在他口腔內發出一種非常獨特，牙齒和骨頭互相碰撞時發出的聲音。
 
兩人看著眼前的阿有，知道現在只有服從的這個選項。
 
「睇嚟你地應該唔會再令我唔滿意！好！依家我就俾你地最後一條問題！」阿有話音剛落，空氣中又出現了一段血色的文字。
 
「最後一問：你地到底識唔識大佬全？」
 




看著這所謂的最後一問，兩人心裏都暗叫不妙，心裏同時想到：
「呢條問題……根本點答都死……」
 
「你地兩個慢慢諗，呢條問題唔會有限時，你地亦都可以問我問題！不過，小心啲，如果令我唔滿意，你地知有咩後果架啦！仲有，如果太耐都答唔到，一樣會令我唔滿意架！哈哈哈哈！」阿有冷酷地笑了出來，兩人心裏僅有的希望，已經全部消失了。