香港都市傳說三：無法逃離的上環地鐵站: 第二十四章：阿有的決定

阿朗在感到眼前的高溫慢慢褪去後，他緩慢的張開雙眼，想弄清楚到底發生了甚麼事情。
 
睜開雙眼後，只見阿有剛剛那種瘋狂的殺意消失了。
 
現在的阿有，沒有了剛剛那種令人感到害怕的壓力，他那帶著悲傷的眼神，反而令人有點感觸。
 
「點解……點解你要道歉？」阿有盯著阿朗。
 
「我……我都唔知……我只係覺得，呢句對唔住，係我欠佢地嘅。」阿朗低下頭來。
 




「你欠佢地嘅？咁……我呢……大佬全以外嘅人，都俾我殺晒，佢地死嗰一刻，都只係口講對唔住，但心入面，根本完全唔覺得有歉意……」阿有不忿地說。
 
「其實……要承認自己做錯，真係好難……我都係因為接近死亡邊緣，先會諗返起佢地。我……我雖然唔知佢地聽唔聽到，但係……我唔想帶住遺憾咁離開呢世界……」
 
「唔想帶住遺憾……我都唔想有遺憾……但係，我已經死咗，而且係含恨而死！點解，點解得我要承受呢種痛苦？」阿有說到這裡，本已消失不見的壓力再次湧現，只是這次帶給阿朗的，不是恐懼，而是哀傷。
 
「我明白你嘅痛苦，我自己都曾經痛苦過，甚麼原來我產生咗另一個人格自己都唔知，過往選擇逃避嘅我，只係不斷咁增加我嘅痛苦……不過，就係啱啱，當我記返起自己做過嘅嘢，誠心承認自己嘅錯誤，我感覺到一種好耐無感受過嘅輕鬆同舒服。」
 
「你道咗歉，覺得後悔，就可以放低件事。咁我呢？我……我又點先可以唔再痛苦呀？」
 




「如果……大佬全同你道歉呢？隔咗咁多年，我諗佢應該有所改變架。」
 
「無可能……」阿有搖了搖頭。
 
「你唔試下又點知呢？」阿朗勸道。
 
「無可能……因為……大佬全已經死咗！」阿有的表情變得更加灰暗。
 
「死咗？」阿朗一臉難以置信的表情。
 




「無錯，其實我嘅封印被人解開嗰一刻，我已經感應到大佬全死咗！之後我亦都用我嘅方法打聽過，原來喺我解開封印嘅一年前，佢已經因為癌症死咗……」
 
阿朗一臉錯愕，因他原以為阿有的出現，純粹是因為想找大佬全報仇。
但大佬全已經不在人世，那阿有為甚麼還要抓人進來呢？
 
阿有接下來的說話，已隱隱解釋了阿朗的疑問。
 
「我知道佢死咗之後，我唔止無開心過，反而更加嬲！點解個天連報仇嘅機會都唔俾我？我愈諗就愈嬲，愈諗就愈覺得所有似大佬全嘅人都係賤人，都係應該死！所以我先會捉你地入嚟！但我見到你真心後悔......我就喺度諗……我做嘅嘢……真係有意思咩？」阿有開始迷網。
 
「其實，每個人都總會犯錯。知錯能改嘅人雖然唔多，但我相信，佢地只係未明白自己嘅錯，又或者未有勇氣去承認自己嘅錯。如果俾多啲時間佢地，佢地一定會真心咁為自己做過嘅錯事而後悔。」
 
「後悔……你可能講得啱……但係，我連聽佢地後悔嘅機會都無……你話我知，我點先會無咁痛苦……」阿有眼裡流露出複雜的眼神，既悲傷，也懊悔，但佔據他大部份的情感，仍是以憤怒為主。
 
「阿有……咁你殺人嗰陣，有咩感覺，開唔開心？」
 




只見阿有臉上露出了一絲詭異的笑容，應該只有半秒不到，阿朗並沒有察覺到阿有的變化。
 
「我……唔開心……」阿有搖了搖頭。
 
「咪係囉，既然咁做會令你唔開心，咁就唔好再做啦。其實做錯事，肇事者道歉當然重要啦。但受害者學識放下，都係十分重要！只有原諒對方，先可以令自己真正咁得到解脫，如果唔係，只會成世俾仇恨束縛。」阿朗用心地對阿有說，希望阿有真的能有所轉變。
 
「要我原諒佢地？」阿有想到這裏，眼內又燃點起怒火了。
 
「無錯，原諒，既可以令肇事者釋懷，其實受害者亦一樣可以得到解脫架。你原諒佢地啦。」阿朗緊盯著阿有。
 
「我……我明白啦……」阿有閉上了雙眼。
 
看來，阿有已經有所決定了。