心的距離: 28. 醫生的醫生

打左燈，鑽進那僅餘的泊位，拉手制，關掉引擎，打開車窗。
我拿下置於手機架上的電話，又滑起手機來。
阿諾終於跟女友和好如初，兩個相望而笑地自拍，並放在 instagram 上。
再往下滑......是 Kathy 拍下的美食照，是個大堆頭的漢堡包呢——厚實的漢堡排，還有芝士﹑生菜﹑蕃茄，看起來不錯，於是我按下了讚。
再往下滑......又是漢堡包，還要是兩個，一遠一近的，看起來跟 Kathy 的沒大兩樣，連背景都十分相近。
我看著帳戶的名稱......
是 Joseph。
照片下有一句「有漢堡包做宵夜，多謝老細」。

我雙眼移離手機，愣住望著前方。




剛才那個畫面在我腦內盤旋。
不知怎的，我明知他們的行為十分正當，亦沒甚麼大不了，但心裡就這樣無故埋下一根刺。
我想只是我太認真地看待這些事情。
似乎我輸了。

「嗶嗶！......」
我回過神來，從倒後鏡中看見康哥的小巴想排在我後面。
原來排在前面的發叔已經離開，到我埋位了。
我趕緊撻匙﹑鬆手制，把車移前。





靜待十分鐘後，關上門，打右燈離開站頭，在青山道上遊走著。
有人遞手，打左燈，停下來，開門上客，關門，打右燈，望倒後鏡，離開。
我漸覺自己只是個操控小巴的機械人，不斷重覆指定動作。
與此同時，腦袋卻是一片混亂，以往的片段在腦海中疾速掠過，又假想著 Joseph 與 Kathy 相處的情節。

「啲啲......」對講機響起，一把嘶啞的聲音把我拉回現實，一聽就知是發叔。「基仔，返到觀塘食飯。」
「哦......好呀。」我只簡單回道。

小巴來到九龍灣。
「街市呀唔該。」有乘客叫道。




我聽在耳內，腦袋卻沒有反應過來，繼續把小巴開著。
眼前的綠燈正亮著，於是我繼續踏著油門，怎料身後傳來一句：「司機有落呀！」
我眼睛頓時明亮起來，才發現自己已駛過站，於是立即踩下剎車，使小巴停在燈位前，並按下死火燈。
「啊......唔好意思。」我立即向搭客道歉，從他手中接過車資後，他即匆匆下車。
關門﹑按熄死火燈﹑繼續前行。
走走停停的來到觀塘後，隨即趕到茶餐廳跟發叔會合。

我步進茶餐廳，到處張望著發叔的位置。
「喂呢邊呀。」發叔在不知那處喚著。
環顧四周後，才見他在右邊的卡位。
「三魂唔見六魄咁款，搞咩呀你？」我還未坐下，他已看見我有點不對勁。
「無，攰啫。」我嘗試胡亂搬個理由來堵住他的嘴巴。
「扮咩呀，你再攰極都唔係咁嘅樣。」
果然不行。
於是我打算向侍應招手點菜。




「幫你嗌咗啦，京都豬扒﹑中湯﹑熱奶茶呀嘛。」
看來他就是要迫我說，但我都不知從何說起。
發叔見我不作聲，逕自說道：「男人只會煩兩樣嘢，一係錢，一係女人。你而家咁搏命開工，睇你都唔會係煩錢啦，咁即係煩女人啦。」

「發叔，我想問吓你。」我喝過一口奶茶。唔，有點澀，看來茶煲得過久。
「你有無試過若即若離嘅感覺？」
發叔思索了一會，才說：「唔......我後生嗰時都有嘅，嗰時有個女仔成日坐我車返工，我見傾得幾投契咪試下追佢囉，」
從搭車中培養感情，看來是小巴佬談戀愛的不二套路，古今亦然。
他拿起瓦杯，呷了一口咖啡，再續道：「點知佢就開始同另一個男仔一齊坐我車，就冷落咗我。但有時約佢一齊食飯佢又肯喎。」
「咁結果呢？」我追問。
他緩緩答道：「結果就係，佢有一日主動搵我食飯，咁我就滿心歡喜，諗住今次得米啦，」

「但係食食吓飯，佢同我講，佢同嗰個男仔已經係埋一齊。」發叔一臉淡然，似在陳述歷史多於說自己的往事。
「咁我咪即刻扮晒無嘢咁話，恭喜晒你哋呀，你哋好襯呀咁囉。」發叔模彷著當時的語氣，還苦笑了幾聲。





「事後諗返，都覺得自己幾傻幾天真㗎，以為自己肯付出，人哋就一定會見得到，但係邊有咁簡單呀，仲有好多嘅考慮，有無未來，靠唔靠得住......我哋嗰時拍拖，點會好似而家啲後生咁是但，嗰時啲人諗得好長遠㗎！」他又呷過一口咖啡。
「咁我識路多過識字，咪唯有疊埋心水揸小巴囉。揸小巴係無咩未來㗎，但係可以點啫，咪等一個唔介意無未來嘅傻妹嚟投靠我囉，哈哈，結果一等就幾十年。」說罷，他把手擱在椅上，另一手就拿起咖啡來喝。
「所以話緣份呢啲嘢真係無得強求，希望愈大，失望就愈大。個天就鐘意玩人嘅，你認定呢個人就係啱嘅人嘅話，通常都唔會係嗰個人。」
發叔這話說來有點唏噓。

「嗱，基仔，我知你係好有心嘅，但係唔好因為咁樣而抱住好大希望，你要有心理準備去接受所有嘢都係鏡花水月。雖然我唔知道你哋之間嘅事，但如果呀 Cat-fie 真係咁鐘意你嘅，我諗去到某個地步，佢會去留住你嘅。」
他特別強調「我諗」這二字。
「我揸車幾十年，無論去邊，幾遠、幾耐我都知道，但人與人之間嘅距離係最難捉摸，至少我做咗咁多年人，呢方面好多嘢都仲係答你唔到，呢啲嘢都係要靠你去摸索。」

青山道與美孚，五分鐘的車程，相距一點四公里。
但現在，在我心目中，這一點四公里與十四公里沒有分別。