那年，我在補習社遇上她..: 第十五章 謊言

「記得，張蔚詩呀嘛」我果陣唔想再同佢有咩糾纏，最令我唔明嘅係，點解佢要搵返我..

「你記得我就好啦，一唔一齊食糖水呀，我依家係你樓下啦」之前拍拖，佢上過黎我屋企 ，當然我地冇做啲咩越軌行為，只係正正常常煮下野食，吹下水咁。估唔到，你仲會記得我住邊…

「唔啦，我今日有啲攰」我想拒絕佢，我相信正常男仔呢刻，面對著一個你對佢冇feel嘅女仔，再加上呢個女仔曾經狠心咁飛過你，你都會拒絕。

「吓，我專登黎到你樓下架，陪我一次咁多啦」佢好似小朋友咁同我講。我果刻開始心軟…

「唉，得啦，我依家落黎。」估唔到，我應承左佢…
「快啲啦，比1分鐘你，1分鐘落唔到黎你就要請我食野」佢講


「哦」之後我收左佢線…

其實我真係唔明，點解Crystal可以當冇事發生過，點解佢要搵返我，我係佢邊個？最恐怖係，點解佢同我講啲野咁似一個女朋友同男朋友講嘅野咁..

係咪我自己諗多左？

我求求其其著多件u記，一條nike波褲加對拖鞋就落左去。

一落到去，見到Crystal，一年冇見，佢仲係咁靚，頭髮染左深啡色，外貌成熟左少少。佢著左一件hollister嘅tee，一條牛仔短褲，加對nmd。Angela其實已經係女神級，但係，Crystal比起Angela更加靚，不過，我已經對crystal無曬感覺....無論Crystal個樣點變都好…我個心靜係裝左Angela…



「算你啦，咁快落到黎」佢咁同我講，我都唔識比咩反應好..

見到Angela，我會心跳加速，塊面會變得好紅好紅；對著Crystal，我真係冇呢啲感覺..

「好快咩..」我對著佢，強顏歡笑，摸下自己個後腦
「行囉」佢翹著我隻手，冇錯..係翹著

我完全唔識反應，推開佢？繼續比佢翹？我唔知，我頭腦一片空白..

最後..我都係比佢翹著行左去甜品鋪..我地兩個行緊嘅時候冇出到聲，我見到身邊好多男人都對我投以嫉妒嘅目光，但係你地又知唔知，我有幾辛苦..我地一路行，冇出過聲，我成程dum低頭，插著褲袋..



去到甜品鋪..

「你地好呀，依家我地做緊個情人優惠套餐，你地可以係呢四組入面各揀兩款甜品，比起正價平好多架」個職員咁樣同我地講

我心諗：我屌！！我同佢唔係情侶呀！hi你auntie，呢個時候你sell咩情人套餐呀！

「唔洗啦，我靜…」我本身真係唔想同crystal一齊食個咩情人套餐

我靜係想同Angela一齊食咋…

點知crystal冇啦啦插嘴..

「佢要心太軟同香蕉船，我要木糠布甸同草莓蛋糕呀，唔該你」



估唔到，一年，一年佢仲咁記得我中意食香蕉船同心太軟..

落完單，佢打開左話題..

「逸希，我今次可能會留返係香港唔返翻去美國果邊」

「吓，點解」我發誓，我只係出於朋友友善嘅問候

「之前我老豆比公司調去美國果邊做野，但係點知點解今年又比公司調返黎香港，仲升左佢職做ceo，即係短期唔會走，所以我會留返係香港」

「哦..」如果係我以前，一定會好開心，但係，我依家真係對佢冇曬感覺…

我毫無情感咁講完，拎左部手機出黎

仆街



原來我唔記得左我岩岩同Angela wts緊，即係我由屋企出黎，到依家係糖水鋪都一直藍刪緊佢…

正當我打緊字嘅時候，我望到crystal都拎左佢部手機出黎…

佢仲用緊我一年前送比佢嘅情侶手機殼…個手機殼黑色底，印左個粉紅半心，半心入面係藍色字，印著Devin…

我屋企都有一個，只不過個名寫著Crystal..我同佢都係用iphone 5，理論上如果兩部機合埋，個心係好完整。

但係依家，我寧願個心變做半心..

「係wo，我走左之後，你有冇識返個女朋友呀？」佢冇啦啦咁問，見到佢塊面紅紅地..仲好似好緊張咁

Hi auntie，無啦啦咁問都有嘅？！



「吓，冇呀⋯⋯」我dum曬頭咁答佢..

之後見到佢個樣好似放鬆左啲咁..跟著佢再問…

「咁..咁你有冇中意嘅人..」

操！唔通我同你講我中意Angela咩講你都唔信啦，補習社識女，點解要問埋呢啲咁尷尬嘅問題呀！

「冇呀..」我講左一次大話..
見到crystal個樣，由好緊張變到又露返個招牌笑容出黎

我其實心入面諗：對唔住，Crystal，我唔應該呃你，唔應該呃你感情…









見到Angela，我會心跳加速，塊面會變得好紅好紅；對著Crystal，我真係冇呢啲感覺..