那年，我在補習社遇上她..: 第三十二章 隱瞞

我個心當下沉左一沉..有人同佢表白？咁..咁點解angela要喊？

係咪angela接受左佢跟著個男仔係玩佢？咁..咁我咪玩完？

「吓 咁..咁跟著你有冇應承佢？」我唔可以比angela知我怯..

「冇..因為我根本唔中意佢」話筒入面傳黎呢句

周圍嘅空氣變得寂靜無聲..我心入面既係開心又緊張..



咁既然佢鍾意個男仔咁點解要喊？

「咁..咁你都唔洗喊成咁呀 死蠢」

「吓…冇…冇呀」

點解angela會咁驚嘅？好似好心虛咁

算啦，係我自己諗得太多，佢冇啦啦又點會對著我心虛



「我..我驚個男仔會做啲咩傻事姐..」佢講

「哦，食檸檬姐，男仔冇乜野嘅，一係你叫佢搵我呢檸檬王」

「邊會有人叫自己做檸檬王架」

見翻angela笑，我都放低左心頭大石..

我地傾左好多好多野…



「你之前有冇拍過拖呀」佢問

嘩屌，冇啦啦問埋啲咁尷尬嘅問題？！嚇親我

「有呀..拍左半年姐，離離合合，之後都散左」我講

無錯，係我同crystal..

「點解一開始會散嘅？」angela問

「佢去外國讀書..一開頭都好地地..跟著又話自己好忙，原來係識左第二個」我自己講完自己都feel到好sad..

點知..

「吓，點解我會同你一樣架？！我同我個初戀拍左4年拖，跟著佢出外國讀，點知又係識左第二個」



我估到估唔到，原來angela同我有同樣嘅經歷

比人拋棄嘅果種痛，比起切腹之痛更要痛上一百萬倍..

係我腦海入面…我靜係想同crystal講對唔住..

當然，我一直係心入面咁諗，我唔想比angela知道得太多之後嘅事

我唔想比佢知道我係為左佢而狠心咁拋低crystal..

「嘩，你條件咁好個男仔都唔要你？！」

「佢一開頭同我講曬對唔住，又話以後唔會見個女仔，我一開頭仲on居居咁信左佢，之後咪又係一9樣」



我第一次聽到angela爆粗…第一次..

睇黎呢件事真係係佢個心刻左好大好深嘅烙印..

「唔緊要啦，係個男仔唔識珍惜你姐..」

如果你想，我會一世捉著你..唔比你走
我會好好珍惜你…唔會再令你受到傷害..

吳詠希，我愛你

「冇呀..我冇乜野啦依家，係wo，你聽日唔洗翻學咩？」佢問

「要呀，見係你先同你傾咁耐咋」



「賣口乖，聽日你起唔到身我實笑死你，死蠢」佢講

「有你打電話7點果陣提我起身咪唔會遲到囉」

「吓，我聽日放假唔想咁早起身wo」

「死蠢，我講下笑咋，你放假就訓晏啲啦」

「得啦得啦，嘩，依家3點幾架啦，你快啲去訓啦，聽日我驚你真係起唔到身呀」

「知啦，你都早啲訓啦」我講

「知啦，早抖」佢講

呢晚，我徹夜難眠



既興𡚒又疑惑..
Angela當我係咩？

互吐心事，唔係情侶先會做架咩？

我唔知…

「我不願讓你一個人..」

係我電話鈴聲

我屌你老母，邊撚個打黎

「我屌，邊撚個呀」我一開口就係呢句

之後？之後就仆街啦

原來係Angela

「喂！我晨早流流打電話叫你起身都要比人鬧」

「我屌，呀唔係，我冇心架死蠢，岩岩發緊夢唔知係邊個先會咁架，唔好嬲啦」我講

「唔呀，好嬲呀，你應承我食完早餐再翻學我先考慮嬲唔嬲你呀」

講完angela就cut左我線..

我會心微笑…我心入面好甜好甜..

我咬左兩啖包就衝左出門口..

一翻到學校，諗著同仆佳，高佬俊「報喜」

我一拍仆佳個膊頭

「我屌，做乜春」

仆佳好似做左虧心事咁，我未見過佢咁驚

仲有..點解？點解佢隻眼咁腫？個眼黑圈仲咁大嘅？

「喂，使唔使咁驚呀」

「冇..冇野呀…」佢流曬冷汗

我都唔知佢搞咩…

「鈴…」係時候要翻上課室，係走廊果到，我同crystal迎面撞上，佢，睇上去殘左好多…但係都仲係散發著一種仙氣

佢..唔係同仆佳拍拖咩？唔通..散左？

我諗翻起琴晚我同angela講嘅野，我一直都冇勇氣同crystal講句對唔住，依家，係機會。

「crystal..對唔住」

「做咩冇啦啦同我講對唔住呀？」佢塊面即刻變紅左好多

「我..我仲差你一句對唔住..」我講

「算啦，都過左咁耐...」佢塊面好紅好紅..

「係wo，你最好小心啲林明佳…」crystal講..

「吓..做咩？」

「陳逸希做咩做唔返入黎」又係個教畜班主任係課室入面叫我

「總之你小心啲啦」講完，crystal就返翻去佢自己個課室到..

上午嘅堂，我一啲心機都冇..

我有時望著仆佳…佢嘅眼神好似迴避緊我咁…佢到底做咩？

我好肯定crystal唔會呃我…

咁即係…即係仆佳真係有野瞞著我？