飛一次大阪，談了一場六天的「同地戀」: 38

「買衫？」


「手信。仲有手信。」


她說的不錯，這裡有店舖林立的繁華商店街，還有各式大型的商場。


當然，無知的我們，在當時並不知道這裡就是梅田。




只是看見有大型商場，我們就逛進去繞一個圈。


某些女生看見服裝店，便會眼睛發亮，然後瘋狂試衣服。


BoBo也是其中一員。




短短十多分鐘，她已經試了五條連身裙、三條長褲、六件衫。


「好唔好睇？」


「哩件呢？」




「襯唔襯我？」


她總是這樣問，而我總是如下回答。


「好睇。」


「幾好。」


「好襯。」




「車。」她以為我是敷衍她。


我是說真話，非敷衍了事。她穿的衣服確是不錯，特別是穿純白色系列的衫或裙，會更顯氣質。


我對著幾步以外的fitting room說：「我終於發現妳有女仔嘅一面。」


她從裡面喊出來說：「係咩？」


「買野試衫嘅時候，終於似返個女仔。」




「哩個係讚美定係暗眨嚟？」


「嗯......妳嘅話，可以當係讚美嘅.......」


她忽然伸頭出來，以布簾遮著身體說：「卓樂民。」


「嗯？」


「你可唔可以入一入嚟？」




「吓？」


我還未反應得來，她已經一手拉我入去更衣窒，嚇得我的心臟頓時停頓。


「喂！！！」


「哈哈哈哈......」早已穿好衣裳的她笑得失控說：「都話你變態架啦。」


「喂！我有叫唔好，同大聲叫救命架。」還差點心臟病發。




「但你入咗嚟喎。」


「係妳拉我入嚟.......」惡人先告狀？


「咁你出唔出返去呀？」


狹窄的更衣窒，我也不禁尷尬起來，馬上退出。


對著這個愛惡作劇的女生，我不難想像我是某天死於心臟病發。


她買好幾件衣服後，便說要給家人買手信。


「咁即係要買幾多份？」我問。


「三份啦。」


她先買了一個銀包給爸爸，再買了一件衣服給媽媽。


「我通常買畀父母都係一份過。」我說，反正他們都不分彼此。


「我爸爸媽媽離咗婚，我跟爸爸。」


「喔......原來係咁，對.....」剛想道歉，馬上就止住嘴巴。


她似乎察覺到，嘴角上揚的微微淺笑。


「咁而家去買？」


「我想搵下有無貓咪圖案嘅牆紙貼，家姐話佢屋企嗰啲甩緊色。」她左右顧望：「但哩個商場又好似無。」


「睇落就應該係。」


「算啦咁，遲啲先買畀佢。」


「係咪可以到我買衫啦？」我興奮地說。


「好呀，我幫你襯啦！想唔想轉風格？」


「都想試下嘅......」


她說她幫我襯衣，根本就是一場災難，她只是把我當成芭比而已。


「小姐......女裝嚟架啵。」我對著不斷幫我配襯女裝衣服的她說。


身邊的女職員們，一直在旁暗中偷笑。


「又係你話要轉形象，女裝幾好呀，你又唔係未試過。」她奸詐的笑著。


「妳其實係咪S嚟？」


「你就S！」


「逼人著女裝仲唔係變態？」


她瞇著眼不說話，過了一會才說：「喂。」


「做咩？」


「哩個係咪你銀包？」


「喂，妳幾時拎咗？」


「頭先。」


我追著她跑，想搶回自己的，但她把我的銀包在手裡換來換去，害我始終搶不回，卻意外偷到她袋中的銀包。


「喂.....」她發現她的銀包被我偷了，才停下腳步。


「好彩有人質。」


「哼，一手交一手。」她說。


「等等先，梗係要睇下妳身份證。」打開她的銀包後，我愣住了。