「Good afternoon sir !我學童S325412蔡衡 sir! good afternoon sir Thank you sir !」
「蔡衡.」
「Yes sir !」
「黎到呢到五個月了喎,覺得點嘛?」
「同sir報, 我覺得每日都生活得十分充實,日日都見到自己既進步!」
「嗯, 講得好好啊, 睇返你呢五個月既報告, 各方面都話你表現得唔錯, 所以下個星期就會批准你離開沙咀懲教所,落豐力樓. 記住出返去之後,比心機返工返學啊.  」
「Yes sir ! 」
「仲有無嘢想問?」
「Sorry sir !」
「好, 留心, about turn !」




喔呵, 原來我好奇左咁耐既出冊board,啲阿sir會咁樣話俾你知你要出冊
步出board房, 我忍不住嘴角上揚, 晴空萬里的藍天, 敘述著我的心情
這短短的幾句說話, 我足足等了五個月
想不到當真的聽到自己拎走期的時候, 我心情竟是如此平靜又開心
我終於要返出去喇
那麼走期board的第一站, 自然是最近board房的洗衣,張sir
「Good afternoon sir  ! 」

我靜下心來, 對著張sir揼地舉手
「得喇, 笑成緊, 走期啊嘛,入黎擺位喇」





張sir立即道
「咁快 !? 同sir報我都未...」
「誒唔好廢話啦, 過黎過黎 . 」
頓時, 我便要準備迎接擺位的喜悅了
想不到當初我不知幾想有得找既開心走期數, 到宜家有得找了, 我又有啲不情願

啪 !
「哇!Thank you sir  1 ! 」
屌, 果塊洗衣板找屎忽,仍舊係痛到仆街 !




「啊sorry sir ,sorry sir... 可唔可以唔好咁...大力呢...?」
「屌, 宜家你話事咩!格高返個籮柚喇 」
「Yes sir..」

啪!
「啊! Thank you sir......2...呃..」
「快喇, 一次過捱埋最後三板, 走期三年班唔係浪唔到啊嘛」
「Yes.Yes sir... 」
啪!

「Thank you sir  3 !  哇..」
啪!
「Thank you sir  Thank you sir !  」
啪!





「Thank you sir 5 !   」
哇屌...
唔使問, 個patpat一定紅撚曬了, 我揉著屎忽望返眼前呢個仆街,說
「Thank you sir  ......」
「哎好啦好啦, 唔找喇,  出返之後記住比心機做人啦..呢排唔夠人, 中意既就Recall返黎幫手啦 」
「Sorry sir...」 仲返黎俾你玩咩...
「返去做嘢啦 ,誒, 呢個咪係傑哥?」
「Sorry sir... 」

武傑在後面尷尬笑了笑
「你都走期啊?  」

「Yes sir !  」
「咁就埋位啦, 你知點做嫁啊」張sir賊笑道
「Yes sir...」武傑亦不情願地埋位. 接下來的自然又是一番找數盛宴




總結而言, 今個board不出我所料, 我和武傑如期拎到走期了
洗衣收工後, 我們回到大棚, 報board的鬧市再次開鑼
首先係子藍sir
「走期啊? 」子藍sir見我操埋黎,先問道
「Yes sir ! 」我開心地向佢報告自己既喜訊
「好啊, 終於等到了嘛, 不過宜家唔得閒住, 遲啲再搵你.」

說罷子藍sir便走開去忙了
然後下一個係虎sir
「報啊.」
「Yes sir ! good afternoon sir 我學童S325412蔡衡sir, 我學童於今日下午開board拎走期sir, good afternoon sir thank you sir 」

啊哈, 呢個對白, 我真係想講好耐了
「嗯, 走期... 喂閪仔傑, 你都係走期啊嘛?」虎sir順便問埋了我身後的武傑
「Yes sir !」





武傑在我身後應道
「嗯呵呵呵, 兩個都走期, 真係喜慶既姐, 好喇, 遲啲虎sir準備個大餐俾你地啊~ 」
我聽了之後楞了楞, 然後諗起虎sir既沙咀特製, 黑暗地獄無雙料理
頂...
「Thank Thank you sir . 」我略顯緊張應道
「做咩啊? 好期待我果餐啊哈哈? 放心喎, 無毒既, 包你地兩個食過返尋味啊 ~」
「Yes  sir ... 」我倆心有餘悸地陪笑道
跟住,虎sir就微笑地, 好真摯地對我倆說

「好啦, 唔講笑啦, , 捱左咁耐, 呢個星期就繼續乖乖地捱埋佢啦.知道嘛?」
「Yes  sir !」
隨後, 我倆操去J那邊
羅sir和音sir已經坐在椅子上, 等著我們
「誒肥衡, 閪仔傑, 報board啊? 」





羅sir故作輕佻地笑問
我倆自然亦是笑了笑

「Yes sir 」
「哇,笑得咁開心,笑笑笑,笑你家姐咩,點嘛, 係唔係走期啊? 」羅sir問
「Yes sir 」

應完,我望向音sir那邊
其實我最想將呢股開心話俾音sir聽
但音sir故意係呢個時候使壞, 專登唔講嘢,扮cool咁唔望我地, 搞到我地有啲尷尬
於是我

「同sir報..多謝音sir...」
音sir說

「誒多謝我做咩? 又唔係我拎走期 」
「呃...我..」

一時之間我又答不上了, 因為要多謝你既嘢, 實在太多了
「唉好喇好喇, 唔玩你地啦哈哈... 睇下你啊, 食檸檬果陣就喊屎喊忽, 宜家咪又係笑到見牙唔見眼.衰仔」音sir潤我道
「呃嘻嘻, 無啊音sir.」

「喔~ 駁嘴添啊, 好,戈sir啊, 佢地兩個祭天果晚,記得叫埋我地啊. 」說罷音sir就向我們S那邊嗌話
「無問題~! 無任歡迎啊音sir !」戈sir在遠處回應道
「Sorry sir..」
「得啦, 唔使Sorry sir啦傻豬, 我地一早知你地兩個走期啦, 返出去後, 知道點樣生活了嘛?  」
不知怎的, 這些問題, 一句比一句洋蔥, 問得我心中暖暖的
「Yes sir...」
「嗯, 返返去戈sir果邊啦, 有啲咩遲啲再講  」
回去自己Team後, 我倆的走期, 君實sir和戈sir早就知道了
報完後, 兩位阿sir都是簡單一句,

「知啦, 祭天既時候你地就知味道, 準備下啦」
「Yes..sir」
懷著少少不安, 總算當日右班當班的阿sir都報得差不多了
進入夜晚,返到倉後, 心情當然是開心又雀躍
但興奮完後, 心靜下來後, 我才發現內心竟然有些不捨
心中頓時, 諗起左好多事.
可能我由細到大, 都係一個討厭分離的人吧
不知怎的, 我總覺得, 這個就將來到的出冊之日, 同我以前某些日子相似
這個走期, 讓我諗起了我小學畢業, 中學畢業的時候.

這些本應人人都高興的日子, 我反而會比較惋惜這些分離的時候,

那些時候,其實我覺得好無奈, 點解要同識左咁耐既同學,老師分開喎...雖然一早知道個制度會咁, 但為了去讓自己進步,而進入新環境, 再告別舊時的一切...
這真的很殘酷呢...
但宜家, 我卻發現,   過程雖然難受, 但人的確係需要咁做.
就好似今次係沙咀咁, 我無理由繼續留係呢到, 因為這個地方, 我學的已經夠多了.
啊對了, 呢個時候, 啲阿sir講過既金句真係可以大派用場
我諗起輝sir的一句 :
乜嘢叫捨得啊? 就是要有捨,才有得
嗯, 我果陣聽到, 硬係覺得同鋼煉既等價交換差唔多, 但仔細想想, 這何嘗不是個應景的道理呢..
我們總要為了自己, 去蛻變成蝶...  沒錯啊, 那就捨去吧...
「喂肥衡, 你背左監管令未啊? 幫我背下啦」
「下? 你仲未背啊? 」
「係啊, 黎啦, 幫我睇下我有無背錯, 提我」
「哦好啊, 咁不如錯一個字一下額頭呢, 有痛苦先有記憶啊嘛」
「屌你啦, 不過好似會有用wor. 」
「黎啦. 」
「咳咳, 好啦, 監管令第一條... ...」
好了, 走期的第一晚就這樣結束了, 係出冊前, 我地三年班其實都要做啲準備
一, 就係上面提過既監管令啦, 要背曬佢先俾走.
二,係星期六, 最後一封家書要改寫為 "給自己的信"
三, 就係盡量唔好衰, 最後一個走期, 係人都想輕輕鬆鬆地走吧, 我甚至覺得走期都要再受啲咩大找啊, 多餘既體能或者找數呢啲, 真係好唔抵.
但偏偏, 世事真係好撚中意弄人.
我宜家諗返都覺得,比起以前先走一步的三年班, 我既走期簡直係坎坷到不堪.
點解咁講呢? 因為隔天, 我們S又衰嘢了
再次輪到右班當更既時候, 戈sir一聲令下, 大找開始, 我找了有史以來,我覺得最巴既一次大找.
哎, 屌.
俾我抖下啦...
現時, 已經係四月尾.

雖然我們身上的衣裝仲未轉季,但大嶼山的夏天其實一早到了, 因此在這種炎熱的天氣下著住長袖衫, 其實都幾巴下, 因為真係好撚熱
說回這次的大找吧, 搏衰的人, 是旁邊倉內的三年班子藍,和已經做左指模仔, 同圓圓同期既黃子豪.
而事情則源於隔天的夜晚, 他們兩個在倉內傾計吹水, 期間提及到了一個值日官的名字, 並且在倉內直呼了那位值日官的全名, 然後, 俾夜更行過既戈sir聽到了
就好似昏君顧忌百姓討論自己一樣,  如此大逆不道的行為自然惹來誅殺

第二日接更後, 就連我們洗衣都要被叫出來,  直接命令換衫, 就在熾熱的空地上開始找數
由於S已經少人, 所以戈sir故意改了改找數的動作,就係將袋鼠跳同四聲掌上壓加埋一齊做混合動作, 即是跳完袋鼠跳中途順住個勢做埋掌上壓, 一下就已經勁巴
一組十下, 一聲龍頭鳳尾,鳳尾龍頭, 這就是已經是讓人絕望的大找場面了
全個S計埋洗衣, 大概十五人,合共三十組雖然不多, 但巴在就巴在呢個天氣, 實在難受得很
頭頂的太陽就好似一個火爐, 瘋狂地烤著我們的身體
這個溫度就算係齋企係到, 都叫人痛苦不堪, 更何況要找體能
但更巴的還在後面
由於成個找數動作都需要訓落去,然後靠手掌扶起撐起自己,但我萬萬想不到, 地面的溫度居然如此之高, 空曠的石地就好似一個平底鍋般, 俾太陽順勢加熱左
於是每次手掌落地, 手上都會遭到猶如燙傷般的痛楚
雙重的痛楚, 再加上打數的壓力. 有蓋空地那邊還不時傳來戈sir的喝罵和加組數的威脅
這個下午的大找, 真的很消磨人的意志
一聲又一聲的一二三四, 口渴同渴望解脫的訴求, 在心裡形成強烈對比. 好想唔做, 但又不得不做
五組未到, 身體已經覺得乾涸
十組一過, 我已見到手中被燙紅, 某些指骨位更磨破了皮, 但又有何辦法... 這些都不是停下的理由, 若然唔跟上, 等陣加組咪仲得不償失
做到汗流浹背, 身上的衣物就好似浸完水一般, 但烈日當空的天氣, 仍舊無情.
好不容易頂完了第一個龍頭鳳尾, 想不到戈sir又話頭先做得唔好, 加多五組
這當然讓人灰心,但更加讓人憤怒
因為找數既時候, 個個都覺得自己做得好, 個個都覺得, 係其他人搏衰自己.
雖然事實未必如此, 但當下的環境絕對會令人火燥.
不過怨氣點都要忍住先, 眼前既五組做埋佢, 就可以暫時飲一飲啖水
又是頂多五組, 終於可以暫時停一停, 等派水.
但這短暫的休息真的好想讓人延長, 任誰都不想再趴下, 做著痛苦的體能,再順便煎埋自己塊手掌
「繼續 !」

一聲怒喝, 我們只能繼續
重新再進入鳳尾龍頭的第二個循環, 不知是錯覺還是身體已經頂唔順, 總覺得氣溫好似越來越熱, 頭腦越來越興.
再次開始, 幾組過後, 居然連一向體能好既武傑都頂唔順, 辛苦地舉起手報話想嘔. 然後就真係去左草叢到嘔
太難頂了, 就好似浸左入一個滾燙既游泳池入面, 只不過入面啲水係我地既汗水
全身熱到好似就黎爆炸咁, 每個人都心諗, 不如, 真係中暑好過啦...
幸好的是, 戈sir似乎亦怕我地中暑,但佢仍然想我地繼續完成個大找
所以佢諗到了辦法幫我地降溫
水管駁水喉, 開關一扭, 戈sir就咁拎住個水喉,肆無忌憚地射出一條水柱向天, 幫我地製造一場人工雨
我心裡暗吃一驚, 咁都得?
不過當水柱射到我個位時候, 又真係頓時舒服了不少
「繼續做喇 !」

 

「Yes sir !」
少少降溫後, 我地繼續做, 做下做下, 這炎熱的溫度居然開始讓地上的水潭開始蒸發,仲可以見到幾縷被蒸發了的水氣
竟然熱到如此地步? ! ! ! 無錯, 果個巴到猶如夢幻般既影像,真係難忘, 我都唔知係我頭暈定係出現幻覺, 做下做下, 我仲以為自己開緊二檔,附近的地面竟然蒸氣瀰漫
頂住頂住頂住
終於, 最後一聲打數, 係滿身汗水,大口大口既喘氣中結束了
果下解脫既感覺, 就好似自己已經頂唔住, 但個停下既時機就岩岩好停在係自己既極限之前
如此舒暢
隨後既時間, 戈sir叫了那兩個罪歸禍首跪在三手房前,真係雙膝跪下果隻跪

然後不斷大嗌著"Sorry sir, 我唔應該叫sir全名"
嘛...見怪不怪了
不過點都好, 這次的大找,真的是我覺得最最最最難受既一次大找, 每分鐘我都覺得自己隨時會暈去, 每一下體能我都感覺到無比又清晰既痛苦
找完後,沖涼換衫, 途中俾水流過傷口,先知手掌上已經多處水泡同破皮, 更不要說全身的酸痛和曬傷
去到夜晚, 真係好想快啲入返倉抖, 不過當戈sir話今晚有信派既時候, 精神又來了.
只不過,戈sir佢就好似仲未玩夠咁, 拎住啲信對住我地不斷賤笑,

我地S亦熟知佢既習性,自然心知不妙, 個老頑童一定又想玩我地
第一封信係圓圓的, 佢出去後, 戈sir問了
「想拎信啊? 嗱, 俾你選啦, 電子音樂頂係手指?」
......呃

手指的話, 我都仲可以聯想到夾手指呢啲刑法
但電子音樂就真係諗唔到係咩,新玩法?
「呃..同sir報, 電子音樂?」圓圓尷尬笑了笑說,我則在心裡佩服他,勇者
「哦, 選得好啊, 嘻嘻嘻」說罷戈sir便拎了兩粒沙咀隨處可見的跌落松果.
然後戈sir一手一粒,擺在圓圓兩耳的太陽穴邊, 大力一按
唔使講都知, 松果既尖銳面如果大力按落皮膚,絕對會痛, 戈sir仲要用手掌罩住佢耳仔按.
唉..難怪叫電子音樂...處罰既畫面的確有啲似戴耳機聽音樂既...
「肥仔, 有信啊.」

Fuck !到我了
「三年班, 選啦嘻嘻 」
「呃..同sir報,手指..」跟住,戈sir又拎出兩粒松果
WTF?  然後佢將兩粒松果攝入我手指和手指之間, 再大力握落去.
痛撚到呢..
總算頂到了返倉.回到倉後,打開封信, 一望又是兒子二字開頭

誒嘻? 又話唔再寫信俾我既,媽? 哈......
兒子:
「這真的是最後一封信了, 媽咪知道你擔憂自己的將來, 不開心. 」

誒..?

是上次探訪的時候露出了馬腳嗎...
「其實每個人的人生路都不是一帆風順的.諗開啲, 每個人都有犯錯的時候, 知道錯, 改了不就行了. 想到這次的教訓, 以後不在錯了就行了,掛住這些過去的東西幹什麼呢? 你已經為自己犯下的錯,而負上了不可推卸的責任了, 沒必要再給自己壓力,知道嗎? 媽咪爹地都愛你, 不怪你, 當初我們也有責任, 不光是你錯, 我們也有, 如果我們多啲耐性開導你, 你就不會犯這些低級錯誤了, 原諒我們好嗎? 是我們沒教好你, 讓你受罪了. 我還以為兒子大了, 應該也明白這些了, 懂事了, 但其實,你還是那麼小, 需要讓我拖著你的手, 告訴你這些是什麼. 那些是什麼.」
「 都是媽咪的錯, 以為你高了,壯了, 懂得也更多了. 可惜我忘記你的性格, 你什麼都喜歡刨根問底, 好奇心太重, 又好學, 從小我都知你什麼都要明白. 我後悔太遲發現你當時幼小的心靈, 忽視了你對性的好奇和控制. 其實我們這兩個過來人, 應該好好地同你上一堂課的. 所以我真的好後悔. 原諒我們好嗎? 仔」
「 這幾個月來, 我的心裡好難過, 後悔, 但見到你天天成長, 成熟, 雖然沒自由,但見你一下子懂得了好多, 也是我們做父母的欣慰. 兒子, 你雖然比我高, 要我抬起頭望你, 但以前我低頭,蹲下同你講話, 原來一晃眼都快二十年了. 媽咪不認老都不行了. 所以你一直係媽咪的驕傲, 別灰心, 這一點點的挫折, 我們捱過去就好了, 媽咪同爹地一直都會在你身邊支持你, 鼓勵你. 堅強啲, 你以後的路好長, 再遇到不開心的事, 難道你又要放棄自己嗎? 你媽都算是從閻王爺手上回來的人, 不知撐過了幾多回了, 但你看, 我還不是一樣和你們在一起. 開開心心的. 雖然媽咪不能讓你有名牌衫, 沒那些奢華的東西給你, 但媽咪生下你, 就要對你負責任.給我最好的給你, 讓你健康,開心. 可媽咪還是失敗了. 因為我沒教好你, 讓你受苦了」
不是啊...應該反過來,是我對妳好吧
「兒子,想開啲, 如果將來, 你身邊的人看不起你, 難免會有幾個老鼠讓你煩惱的話, 只要想起我地永遠是你的親人, 不會拋棄同你在一起, 什麼人, 什麼事, 你都覺得不重要了.  我知道你想讀書, 放心, 媽咪讓你讀, 你爸不讓我幫你交學費, 只要你別浪費自己的時間同青春, 就是對得起媽咪了. 不用覺得對不起我們, 等你以後為人之父, 你就會明白媽咪的心情了. 我的父母生的太多, 所以我沒有得到他們的愛. 只有我從小到今對他們的付出. 所以不管我那時還小, 但我說過我要麼不結婚, 如果真的有那麼一天有了孩子, 我要用我的一生來滿足我的孩子. 其實兒子, 我生下你的時候, 我自己還是一個孩子, 我根本不懂怎麼去愛你, 只是母性的天性, 讓我離不開你, 也讓你跟著我受那麼多的苦. 」
「但我不相信命, 為了你, 我撐過來了, 一直以來你是我的驕傲. 所以媽咪為了你,堅強地活過來了. 所以你也要堅強地, 好好地, 開開心心地陪著我,好嗎? 很多事過去了, 我也不再去想了. 所以你也不要為一點點小小的挫折倒下去, 自暴自棄..說了那麼多, 你應該懂媽咪的心了吧? 好兒子, 等你出來, 我陪你去食大餐, 以後遇到的問題, 讓我們一起去解決, 知道嗎?
媽咪字

2015.4.29」

是我...

是我表現得太沒用了吧...
才讓身邊的人,擔心我這麼多.
阿媽呢封信又長又沉重, 沉重到讓我覺得, 如果出去之後沒有活得更精彩的話,就會對不住她一樣

不過睇完後,我已沒有力氣多想了,

精疲力盡下, 我早早入睡

隔天早上, 上PE堂,琴日既疲勞和傷痕仲殘留在身上, 但一同戴sir報完board後, 戴sir便藉我倆走期為由, 高興地將PE堂的強度升級, 改曬做六聲袋鼠跳, 仲要係包埋三個team人數的龍頭鳳尾,

唉我屌.

好不容易操完後, 戴sir走來我倆面前,洪亮而又硬朗地說
「記住啊, 出到去之後, 你就係個男子漢,大個仔嫁啦 ! 既然大個左, 就唔好再令身邊啲人擔心你喇 !  收唔收到 !」
「Yes sir !」
「會唔會再返黎啊 ?」
「Sorry sir !」
「嗯, 保重喇 . 」
「Thank you sir ! 」
沒有多餘的說話, 戴sir和我們的臨別贈語,就是如此的簡短和受用.

然後這段走期的時間,心急又難捱, 但仍然會過.
來到最後的兩日, 這是我在沙咀的最後一個星期六和星期日
接更後, 最後一個星期六輪到左班
今日接管我們S的竟然是勁sir和嚴sir
對於這些久而未見的阿sir,我們的走期board總是要報的.
先同嚴sir報
「咦走期啊? 咁找曬我啲數未啊? 」
嗯??!
我心中一沉,立即諗起啲嘢
只見嚴sir拎出了佢果本隨身攜帶既計數簙
「喂肥衡武傑, 你地仲差我300幾組未找俾我wor」
Fuck ! 竟然出冊之前撞到你返工! ?
「咁你等陣唔好係到寫信啦, 找曬我啲數你先好再去寫. 做掌上壓, 今日食飯前你地兩個點都要找一半俾我先啊.」
「Yes..Yes sir...」
隨後的那個下午, 我倆就這樣被逼操了三個多鐘, 同一個動作做咁多次,真係巴撚到仆街,直到真係頂唔住,手都舉唔起了,嚴sir才肯暫時放過我地.
身水身汗, 個掌上壓又磨破了之前大找的新疤...不過無所謂喇. 頂埋聽日, 後日就可以走了,還介意些什麼呢
沖完涼後, 原來時間仲有啲剩, 我地仲可以寫耐啲封信...
最後一封信, 是要寫一封給自己的信
我提起筆, 先落了台端和自己的S325412
然後就愣住了, 傷腦筋, 我都係第一次寫呢啲咁既嘢.
應該點寫呢..
既然是給自己的信, 那麼內容當然是要鼓勵自己吧?
雖然我可以寫得hea啲, 搬一些類似雞湯般的廢話敷衍check信的戈sir便算
但這樣無意思...

我總覺得這最後一封信, 是一封總結自己五個月沙咀歷程的信
咁..要寫啲乜呢?
提醒自己不要Recall? 還是說,提醒自己的夢想?
雖然話就話寫game姐, 但本質上, 我係想傳遞能量俾人...
而傳遞能量的方法有好多種, 如果論興趣的話,  其實導演, 小說家同遊戲開發, 我都有興趣
哈哈, 又好似諗多左了, 真係笑話.

單單係寫Game都難啦, 仲諗咩小說家同導演wor
不過, 如果真係做到的話, 又好似好有型, 好浪漫呢...哈哈
幻想自己的未來, 真係一件好開心的事, 不過都係算啦, 比起呢幾樣, 寫game好似易實現啲, 不如就寫呢樣落去喇

「全部收嘢, 飯堂開飯啦! 留返聽日再寫, 執嘢搬嘢! 」
「Yes sir !」

.

.

.

.

.

食完飯後, 回到大棚, 見到秋sir, 就醒起我地原來未同秋sir報走期
於是我們上前,舉手
「誒, 終於走期喇?」

秋sir笑了笑,問我
「Yes sir  !」
「咁咪好咯, 睇下你之前半隻檸檬就搞到你喊曬口, 嗚嗚嗚咁喊得幾鬼可憐, 出返去之後仲捱唔捱到嫁?  好多嘢仲巴過果半隻檸檬既wor.」
「Sorry sir,   」點會呢, 果半隻檸檬真係我遇到過既最大的坎坷.
「同sir報..我唔會再隨便喊嫁喇.」
「哈哈,  睇下點, 」秋sir意味深長地笑了笑,
「不過衡仔, 其實係到食呢半隻檸檬,都未嘗不是一件好事. 好多早走既,好醒既人出左去, 其實大部分都會再返黎. 你估沙咀真係可以靠呢一套改變你哋份人咩, 我哋會管到你個身體, 管到你係呢到生活既態度, 但出左去後, 邊個再管你? 得返你自己要管自己嫁喇..所以出面既世界, 先係真正既考驗.不過, 你得既, 見你下下咁認真做嘢, 答秋sir一句, 你個內心, 有無一齊改變到? 」
「......Yes sir !」
「嗯, 咁就得喇, 秋sir都大概知道你係個咩人, 在意呢個檸檬都好既,因為有遺憾,你先會發自內心記住這裡的事, 呢到咁巴, 唔好Recall返黎啦. 」
「Yes sir, Thank you sir ! 同sir報...我唔會返黎嫁啦.」我堅定地說
「嗯, 好喇, 不過要返就快啲返wor, Recall都就黎走曬, 無人幫我手教新人啦.」

秋sir講笑說
「嘻嘻,Sorry sir」
玩笑完後,時間已經不早, 到勁sir了

處理完包奶, 勁sir便二話不說,拎了把大飯鏟出黎便話
「邊兩個走期啊? 出黎~」
「Yes sir !」我倆心裡一驚, 行出隊伍
「唔使驚wor, 今晚祭天就唔會祭嫁啦, 留俾隔離班做啦, 不過, 數還數, 走還走, 伸隻腳出黎喇, 爽快啲, 兩板 !」
作為一個資深三年班, 兩板當然不在話下
醒目的我倆更加知道勁sir的性格, 所以要找,就要找得痛快些!
「Yes sir !」
啪 !
「Thank you sir 1 !」
啪 !
「Thank you sir 2 ! 」
「好喇, 點樣做人既呢啲經我唔多講喇,第日有機會係街到見到勁sir我, 中意打招呼就打啦. 不過, 最後記住多一樣嘢.」
「Yes sir ...?」
「行返出呢個門口果陣, 記住喇, 你哋既債已經還曬, 無再欠任何人啲咩嘢,所以唔好再衰入黎啦, 衰仔 」

勁sir爽快地笑道
「Yes sir  ...」

我倆也百感交集, 微笑回應
真的嗎.. 還曬了嗎..?
進入夜晚, 我已經消化不來了...
得返聽日, 係最後一日, 心中已是感慨萬端
新人組的那時, 一年班既艱辛, 二年班既意外, 三年班的檸檬
轉眼間, 這五個月的時間就好似同我開了玩笑,
我到底聽了多少句應該記住的金句, 又找了多少次無辜的數...
無數的記憶,在腦海溢出
回過神來, 原來我真的快要走了
不過點解, 我還是不安呢? 我知道我唔應該呃自己,我知道我應該壓下呢股害怕
但我就是沒有自信
我無自信出返去後, 可以挺起胸膛, 做返自己.
我禁不住問自己一句
我真的準備好, 重返外面的世界嗎?
你準備好了嗎? 蔡衡?
.

.

.
眼訓了, 聽日再諗吧.