那些年，我被女朋友狠狠地戴了頂綠帽: 第十二章 Ch.12

我同佢都玩到有啲口乾，就行左去買野飲。
我一路行一路講：「好耐冇去過冒險樂園啦。」
「我都係啊，上一次去應該小學畢業。」佢回應，
然後拎部手機出黎望左望，發現差唔多要交人。
就同我講：「我係時候返屋企食飯啦。」

於是我地慢慢行去輕鐵站，路途中微風吹過。
我同佢雖然冇野好講，但係完全唔尷尬。
我隻手有時會碰到佢，但係佢完全唔會宿。
係呢個時候，我好有衝動拖住佢、同佢表白。


可惜，我冇膽拖住佢。

返到屋企，我成個腦都係有關啊言既野。
我真係忍唔到，決定打電話俾啊言表白。

「嘟、嘟、嘟」「嘟、嘟、嘟」......
「喂？」
「啊言？」我說話。
「你係阿輝？做咩啊？」
「係啊，其實有樣野我想同你講好耐。」



呢個時候，心跳加快到一百，連我自己都聽心跳。

「我...其實我...」我嘗試將我想講既野 講出黎。
「係？」佢疑惑。

「我...其實我...」
屌，你俾小小勇氣自己啦。同佢講你鐘意佢啦。

「我...其實我...」


講啦，你唔試又點知會失敗？

「我...其實我...」

結果我用左十分鐘都講唔出口。

「得啦，我知你想講咩啦！」佢首先開口。