Lucy話過,佢呢生人最撚引以為豪既就係響中學時期佢利用呢個能力搵左唔少錢。
 
F1果陣佢用能力透視曬全級既男老師,發現左其中一個阿sir不單止同老女人副校上過床,仲搞過幾個F1女同學。
 
Lucy利用佢所得情報試圖勒索果個男老師,一開始對方梗係死口唔認,但Lucy將佢d床上表現繪形繪色咁描述出黎,佢當刻幾乎嚇到瀨尿,拿拿臨俾左兩百蚊Lucy做掩口費。

但區區呢兩百蚊又算得係乜野,Lucy抓到個阿sir咁大痛腳又有乜可能凈係收得兩百蚊就算數,梗係有幾多就攞幾多啦!

Lucy當正個阿sir係銀行提款機,一得閒就去撳幾舊水洗下。據說果個阿sir每個月份人工至少一半係俾左Lucy,最後因為實在頂唔順所以索性辭職走人。
 




正所謂一雞死就一雞鳴,上到F2又被佢搵到某某男老師同某某女同學發生過關係。

Lucy報稱成個中學生涯,佢發現全校上上下下每個年級都分別至少有兩個任教男老師同女學生搞過野,每個學期佢至少響班鹹濕佬身上勒索過八、九萬。
 
後黎上到大學,佢開始少左使用呢個能力。原因係佢果陣成日掛住上莊同溝女,無心思搞其他野,有一排我同阿輝約親佢都話唔得閒。

提到阿輝,呢條友被Lucy拒絕後仲一直對人地念念不忘,考大學果陣佢為左想繼續同Lucy一齊返學所以就揀埋同人地同一科,最後爆左幾個五星星俾佢同Lucy一齊考到環球金融系。

然而,無論阿輝做d乜,作為一條gay婆,Lucy係點都唔會回心轉意。





跟住到左Yr2阿輝突然被佢老豆召去繼承家族生意,我地三個之後間中都約出黎飲野,但大家各有各忙見面時間減少左,而佢對Lucy既感情亦都減退左。
 
大學畢業之後,Lucy際遇同我差唔多,都係去左間細公司度做,人工得果萬六。

對於中學單單係一個學期就搵開八萬九萬既佢,呢d雞碎咁多既人工根本無法滿足佢既野心。
 
我果陣話辭工出黎搞偵探社都係佢第一時間話加入。
 
佢話工字無出頭,要搵大錢就要自己出黎闖一番事業。





我同佢目標雖然唔同,我就想拯救香港,佢就諗住賺大錢,幸好兩者并不衝突,於是乎我地迅速地將各自d儲蓄拎出黎租左土瓜灣某工廈個現成單位做office。

 前後搞左唔夠一個月,就成立左我地依家呢間立生偵探社。
已有 0 人追稿