公司開左業三個月一個客都無。
 
開頭一個月我同Lucy都會落街派下傳單,上forum洗版幫間公司做下廣告,但後尾發覺成效極細,慢慢我兩個越做越頹,索性留響office等運到。
 
等啊等,正當我地等到意志消沉之際,終於迎黎左開業四個月以黎第一個客:黎先生。

黎生年約三十歲,一身頹look裝扮。白tee,爛牛,con屎,且面掛口罩。
 
雙方交換卡片過後,Lucy清一聲下喉嚨說:「黎生,你好呀,我地公司提供感情調查專門搜集通姦證據,經驗豐富,全個過程包括會談內容絕對保密,你可以放心將你既問題交比我地解決。收費方面呢,就分三個部分……」
 




未等Lucy介紹完,黎生就劈頭一句:「我有愛滋。」
 
……我同Lucy我眼望你眼靜左三秒。
 
黎生聲音沙啞,繼續說:「結婚咁耐除左我老婆我完全無掂過出面其他女人,由細到大我都行得正企得正,咩一樓一,援交,北上按摩呢d唔正經既地方去都無去過,但係,但係我竟然惹到愛滋,你話搞笑唔搞笑,哈,哈哈—」
 
黎生既經歷同苦笑令我同Lucy不禁打左個冷震。
 
我問「黎生,愛滋咁大件事,你check清楚架啦?」
 




佢抬頭望一望我,眼神顯得空洞虛無,說:「我去左幾間醫院,檢查左好幾次,結果都係一樣。」
 
「咁唔好意思呀,黎生,你係咪搞錯左地方,我地呢度係偵探社,唔係醫院,睇怕我地幫唔到你。」Lucy說。
 
「我黎搵你地,係想你地查下我老婆。我懷疑佢響出面同d唔三唔四既男人搞野惹左愛滋,然後返黎屋企惹俾我……」講到一半,黎生失聲啜泣。
 
Lucy連忙遞上紙巾,說:「黎生,你肯定係你老婆傳染俾你?」
 
「係,我好肯定,我對天發誓,由細到大除左我初戀女朋友,我淨係同過我老婆上床,出面d女人我真係掂都無掂過。」





見黎生情緒有d激動,於是我地停止提問免得進一步刺激佢。
 
隔左陣,Lucy見黎生仲係喊到五顏六色,無曬符,於是行近佢講:「黎生,我地再問多一次,你試下望住我對眼回答,你真係無同過其他女人上床。」
 
黎生眼泛淚光咁望住Lucy言之鑿鑿講:「無!」
 
Lucy同佢完成三秒對視,成功獲取黎生呢三十幾年所有既性愛史。
 
響Lucy忙住窺探黎生性愛歷史期間,黎生情緒仍然唔穩定,淚流不住,而一旁既我唯有繼續嘗試安撫佢。
 
雖然我暫時對黎生一無所知,但見佢喊得淒涼,我諗佢應該無講大話而且仲受左唔少委屈同痛苦。
已有 0 人追稿