《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (6.1)》

如果一手拎住部MacBook Air，一手拎住杯Starbucks喺香港算係一種「生活態度」既話，咁喺荷蘭，腳踏踏板，雙手都放喺單車扶手，就係佢地既生活態度。

呢度除左一個又一個既「巨人」之外，見得最多既就係單車，聽講1600萬既人口，卻有1900萬架單車，就證明佢既普及性。

喺荷蘭，踩單車已經唔係一種週末得閒先會做既運動，而係一樣好重要既生活習慣，當地人無論去邊，返學，返工，買餸，甚至去Party，好多時候都會選擇以單車代步。

馬路上既讓路次序為：單車>行人>汽車，踩住部單車，基本上係暢通無阻。

我地一早已經諗好要踩單車遊阿姆斯特丹，所以就預先Google左可以租車既地方。



睇左幾篇遊記同Review，都見到好多人推薦一間叫”Mac Bike”既 鋪頭，話嗰度租單車既性價比最高，所以幾乎唔洗考慮其他option 就揀左去呢間。　

單車就好快租好，但我地並冇計畫過路線，只想隨心而行，見到邊度風景靚就踩到邊度。缺少方向感既我，就一直都跟喺Nick既後面。

嗰陣我先發覺，原來我甚少望過佢既背影。

無論去到邊，佢總係好貼心咁企喺近馬路既一邊，而我亦將呢樣野當作理所當然。

我踩得比佢慢好多，因為我覺得自己仲未完全從琴晚嗰種幻覺走出黎。



一路踩，眼前既風景卻唔係阿姆斯特丹，而係一啲我曾經去過既地方，我要不斷像瘋子般搖頭，先令自己既思緒冇咁困擾，令我有一下差啲維持唔住重心，好彩冇比Nick見到，唔係又比佢嘮叨。

午間既陽光將佢既影子拉長，距離感越黎越遠，我覺得自己唔會追得上佢既步伐。

我地喺市中心沿著唔同既運河走，果然喺呢度踩單車，係別有一番風味，好似完全融入左當地人既生活咁。

我地幾乎冇停過咁踩，都唔太清楚要去邊，同要做啲乜，但係卻好享受踩緊單車既每一秒，完全冇平時嗰種做運動做到氣喘，想快啲停既感覺。原來有時漫無目的，比精心計畫一切來得更舒適。

直到我開始餓得雙腿無力發軟時，我地先決定停落黎，稍作休息。




「睇黎你真係好返曬喇喎！踩咁耐先叫攰。」


Nick望起黎仲係精力充沛，究竟係點做到。


「我咪話左我okay囉….」


我只能勉強擠出笑容，免得佢知道我腦海仲產生緊斷斷續續既幻覺。


「我問你一樣野丫。」佢平淡的說道。




「咩事？」


「你今朝係咪stalk我instagram？」