《我竟然同左一個陌生男仔去歐遊...》: 《波蘭篇- 克拉科夫 Kraków (2.4)》

「Hi…你可唔可以黎接我？我有少少醉…. 我個Uber App又用唔到…好麻煩啊哈哈… 」


我努力組織完整句子黎掩飾我既九分醉意，除左未斷片或者喺街訓著之外，我獨自一人支撐到呢個程度，仲要識搵Ｗi-Fi已經好難得。


「你依家自己一個？你喺邊？我黎接你。」


佢語氣聽落去比我仲緊張自己，無論我地發生過咩事，佢都係咁在意我，仲係當初我認識嗰個「暖男」。




「唔…其實我…都唔係好知，對面好似有間 ___Hotel，我都係偷緊嗰度Wi-Fi用…」


「咁我依家搭Uber過黎，應該好快到，你企係附近唔好周圍走。」


對時間已經失去觀念既我，唔記得Nick隔左幾耐先到，只記得我坐喺路旁欄杆，抬起頭時，見到既係Nick，然後被佢「執屍」到Uber座位上。



佢一坐下我就成個人挨左喺佢身上，因為佢永遠都係令我最放心既人。


「你自己一個女仔就唔好飲醉酒啦，喺呢啲國家特別危險架…..（下刪一百字）」 佢一片苦口婆心不停地講落去，但我都冇聽入耳。


「哈….我飲醉都係因為你咋…」


「關我乜事？」




喺我未比任何回應佢之前，Uber已經到達我地間Airbnb既門口，嗰度係一間四五層高既舊式公寓，連電梯都欠缺，我諗Nick嗰陣一定好辛苦，好辛苦先抬到我上二樓。


經過一番擾攘，我再次回到最溫暖既被窩，我呆滯地坐喺床邊，正覺得嘴巴乾渴時，Nick就已經向我遞上一支礦泉水。


我接過後就如一個剛從沙漠荒地中死而復生既人，一口氣將大半瓶水喝掉，事實證明Vodka真的起不了水的作用。


「估唔到同你分開行一日就咁，你以後點算啊？」Nick一臉憂心忡忡。


「以後…? 以後你陪著我咪得，仲要好好睇住我，唔好比我做傻事…哈哈… 」




果然喝醉既我都少不免會間歇性傻笑。


「傻妹，我陪唔到你一世架，你要自己識諗啲，你唔係啲十七，八歲唔識諗既妹妹仔喇。」


可能係我聽錯或記錯，估唔到佢仲會用傻妹黎稱呼我。


「點解…點解你唔可以…乜你真係咁唔鍾意我？」


若非酒精仍然停留喺我身體，我大概唔會有勇氣去問呢種自取其辱既問題。




「我諗係我唔知點樣再去鍾意一個人。」


我已經不想再用言語同佢將此話題繼續糾纏下去，就主動吻上佢既嘴唇，與佢舌頭不停地纏繞着，佢順從着我一兩分鐘後，就慢慢拉開我地之間既距離。


「唔好咁，你會後悔。」


聽到後，我眼泛淚光，我不甘心一次又一次被拒絕。


「我從來…都唔會後悔任何事。」